1952: Les Bieautées d'Jèrri dans la Lantèrne Magique!

 L'Assembliée d'Jèrriais

Les Bieautées d'Jèrri dans la Lantèrne Magique!

 

Nou dit qu'l'appétit veint en mangeant - et tch'i' faut êt' p'tits d'vant qu'êt' grands. Eh bein, nouos rêunions mensuelles ont prouvé la sagesse dé ches vièrs ditons-là! Châque rêunion a 'té milleuthe qué la dreine, et l'nombre dé nouos membres a monté à pus qu'chent!

 

Auve les cheins êlus à l'assembliée dans la Salle d'Agritchultuthe Vendrédi au sé, le 30 dé Mai 1952, j'en avons chent-deux ach't'heu! Les nouvieaux membres sont: Mmes Edith Laurens, Lydie Laurens, Mavis de la Haye, Anna Steel et Bertha Enders, Mlle Eunice Billot, Moussieu et Madame George Henry Le Rossignol, Stanley John Le Rossignol, J. E. Quérée et Frank R. Le Brun (dé Gambie, en Afrique). J'avons l'plaisi, étout, d'annoncer deux nouvieaux membres jûnieurs, les jannes Edward et Kenneth Syvret, dé Léoville, à St. Ou.

 

Lé Sénateu Hedley Le Riche Edwards présidit l'assembliée, et l'y-avait à bein près eune septantaine dé membres présents.

 

Vièrs Mots.

 

Eune pétite compétition pour traduithe des expressions Angliaiches en Jerriais, comme la cheinne tchi fut si populaithe à la rêunion de mais d'Avri, nous ramémouaithit des vièrs mots qu'nou n'ouait pon fort aujourd'hui - comme, par exempl'ye: un “oyi” pour eune faute. Les marchands dé j'vaux l'savaient bein, chu mot-là, et les fermièrs tch'en acataient étout. Combein d'fais qu'nou ouïyait: “Il a un oyi, chu j'va-là - i' mord!” Un aut' mot du temps passé, “offustchi,” singnifie un ombrage dévant la veue d'tchiquechose qué nou r'garde. Les feunmeurs n'eutent pon d'peine à nouos dithe qu'eune “autchie” est le nuage dé feunmée tchi dêhalle de la bouoche du bouan'homme tch'est en train d'feunmer eune bouanne pipée dé p'teun!

 

Pliantes Sauvages.

 

Mlle Florence Hacquoil avait apporté eune douzaine ou pus d'flieurs et pliantes sauvages, et les membres lus mindrent dé bouan-tcheu à nouos en donner les noms. L'y-avait des d'mouaiselles, des vièrs garçons, du pain à crapaud, des mauves, du s'nichon, etc., etc., et l'intéthêt des gens nouos montrit qu'l'y-a acouo un tas d'Jêrriais tchi savent les noms des belles pliantes et flieurs qué nou vait dans les clios et l'long des fossés d'not' supèrbe campagne!

 

Ditons Ayant Rapport au Temps.

 

Des listes dé ditons ayant rapport au temps fûtent apportées par Mmes Lilian Benest, Kathleen Le Maistre et Marie Trachy, Mlles May Orange, Kathleen Le Boutillier et Lucille Picot, et Messieux Raoul Lemprière et George W. Bertram. Le Comité Adjudicateur annoncit les mèrques données ès compétiteurs pour les noms d'paissons et d'flieurs et pliantes sauvages. Les listes s'en vont êt' publiyées dans la gâzette en temps opporteun.

 

Veues en Couleu d'Jerri.

 

Pour couronner eune bouanne séthée, lé Président annoncit qué j'allions vaie tchiquechose tchi vallait la peine, et touos les membres 'taient contents quant il invitit l'Trésoryi, George Bertram, à déteindre les veues et alleunmer sa lantèrne magique pour nouos montrer not' belle pétite île de Jêrri sur l'ridgeau. Lé Sieur Bertram expl'yitchit qué l'Ségrétaithe avait l's'idées offustchies quant il avait mîns dans la gâzette qué ch'tait eune lantèrne magique qué j'allions vaie! I' nouos dit qu'les lantèrnes magiques 'taient des lampes du temps passé tchi n'avaient vrainment pon d'magique, mais tchi soulaient enfeuntchi les gens, et qu'l'y-avait longtemps tch'il 'taient mortes d'lus belle mort! Il êprouvit à nouos faithe comprendre en tèrmes scientifiques qué la lantèrne tch'il allait faithe sèrvi est un maniéthe dé tracas dans eune bouaîte qué les gens tch'ont des p'tits boudins dans la tête appellent un “projecteur”, ou tchiquechose dé mème! Enfin! Auve chutte maniéthe dé lantèrne i' nouos montrit des belles veues en couleu d'Jerri - dépis l'Châté d'Grosnez jusqu'au Vièr Châté d'Gouâré - et tous les membres 'taient d'avis qué v'la tchi valait en êffet la peine dé vaie, et un vote d'èrmèrciments à Moussieu Bertram lî fut accordé d'bouan tcheu!

 

1952