1953: L'Assembliée d'Jèrriais

 L'Assembliée d'Jèrriais.

Rêunion Mensuelle.

 

La rêunion mensuelle eut lieu à 8 heuthes Vendrédi au sé, lé 27 dé Mar 1953, dans la Salle d'Agritchultuthe, nunmétho 3 rue Mulcaster, St. Hélyi, souos la présidence du Juge Hedley Le Riche Edwards. L'y-avait eune souoxantaine dé membres présents.

 

Nouvieau Membre.

 

Lé Sieur A. Pipon, dé Cornouailles, en Angliétèrre, fut êlu membre d'l'Assembliée. Lé nombre de membres houors-pays continue à grandi, et ch'est intérêssant d'èrchéver d'lus nouvelles. Lé Sieur F. R. Le Brun, dé Gambie, en Afrique, s'en veint en Jèrri, et il espéthe êt' auve nous à la fîn d'Avri.

 

Présentation d'prix.

 

Lé Président Edwards présentit des prix ès trais preunmièrs gangnants dans les compétitions d'noms Jèrriais duthant 1952, pour les Paissons, Flieurs et Pliantes Sauvages, Ouaîsieaux et Ditons concèrnant l'Temps.

 

Lé preunmié prix: “The Bailiwick of Guernsey”, par C. P. Le Huray, fut présenté à Mme Kathleen Le Maistre. Lé deuxième prix: “Jersey in Jail”, par Horace Wyatt, auve des portraits par lé fanmeux artiste Jèrriais Edmund Blampied, fut présenté à Mme Marie Trachy, et l'traisième prix: “The Norman Isles”, par B. C. de Guërin, fut présenté au Trésoryi George Winter Bertram.

 

Touos les gangnants fûtent appliaudis quand i' vîntent à la tabl'ye du Président qu'si lus prix.

 

A la mémouaithe dé “Jock” Luce.

 

I' fut apporté à la connaissance dé l'Assembliée par lé Comité Exétchutif qué l'Président d'Honneu, lé Juge Francis Vibert Le Feuvre, avait mîns l'affaithe en main pour mett' un tombé sus la sépultuthe du Poëte Elie (Edwin John Luce), “Jock” à touos ses anmîns, et la rêunion décidit dé contribuer £10 ès frais du tombé.

 

Cèrtains membres avaient dêjà contribué pèrsonnellement, et les “Chroniques de Jersey” s'en vont contribuer étout, mais lé Juge Le Feuvre paietha la pus grand' partie des frais d'sa pouchette. La contribution d'l'Assembliée d'Jèrriais, tch'est là pour la consèrvation d'la langue, est bein à propos. Le tombé aiguetha à pèrpetuer la mémouaithe d'un Poëte distîndgi et iun des milleurs êcrivains d'not' vielle langue dans l'temps passé.

 

Tchestchions en Jèrriais.

 

Le reste d'la séthée fut passé à rêpondre eune tchînzaine dé tchestchions apportées par les membres. Le Ségrétaithe fut nommé: “Maître dé Tchestchions” et un Jury composé dé Mesdames Dorothy Gruchy et Lilian A. Benest, et les Connêtabl'yes Crills, dé St. Clément, et Le Marinel, dé St. Jean, fut nommé pour rêpondre les tchestchions.

 

L'y-en avait dé toutes les sortes et pour touos les goûts. I' prendrait trop d'temps et trop d'papi pour les détailli toutes, mais nou peut dithe tch'il' 'taient bouannes, et ch'tait magnifique dé oui l'bouan vièr Jèrriais d'St. Cliément, d'la Trinn'té et d'St Jean! Ch'est seux qu'les mêssieux et danmes du Jury s'saient engagis par le Radio en Angliéterre si l's Angliais avaient ieu la chance dé les ouï!

 

Les vièrs garçons et les belle-mèthes né futent pon oublyiyés dans les tchestchions. L'y-en a tchi sont d'opinion qu'les vièrs garçons dév'thaient payi doubl'ye taxes, et d'aut' craient qu'ch'est honteux d'faithe des rîselées des pouorres belle-méthes! Les membres du Jury avaient, comme nou peut s'y attendre, des opinions divèrses, mais i' pathaîssent craithe qu'un pouorre dgiâtre d'vièr garçon tch'a, auprés tout, mantchi l'milleu confort dé la vie et la compangnie d'eune bouanne femme, avait dêjà 'té puni assez! Quant ès belle-méthes: Eh bein: L'y-a des belle-méthes et des belle-méthes, - mais l'opinion 'tait qu'l y en a pus d'bouannes qué d'mêchantes!

 

Cèrtains tchestchions 'taient întérêssantes du point d'veue d'l'utilité publyique, - par exempl'ye, - nou dev'thait aver tchique sorte d'mèrque d'avèrti dévant v'nîn ès carres des rues quand nou cache un moto? Et lé Rât Parouaîssial dév'thait-i êt' au mème taux dans toutes les pâraisses? Lé Jury 'tait d'avis qu'les Jèrriais connaissent lus p'tit pays et bein tch'i' savent ioù qu'toutes les carres dé rues sont, mais qu'ch'es'sait eune raide bouanne idée d'aver pus d'avèrti pour l's êtrangièrs tchi cachent des motos en Jèrri en êté.

 

Quant au rât, - il est bein êvident qué chaque pâraisse a des bésouains difféthents et qu'nou n'peut pon aver un rât êgal partout. Ch'tait bein a propos d'aver deux Connêtabl'yes sus l'Jury pour pouver nouos explyitchi les problèmes dé pâraisses.

 

Autrément que l'Jury, les membres dé l'Assembliée fûtent învités à donner lus opinions sus chaque tchestchion, et l'y-eut des contributions întérêssantes dé la part dé l'audience.

 

Il 'tait d'vièrs dgiex heuthes quand la dreine tchestchion fut rêponnue, et l'Président Edwards ermèrcyit l'Jury pour ses sèrvices, et touos les cheins tch'avaient prîns part dans les distchussions.

 

La préchaine Rêunion

 

Le préchaine rêunion mensuelle étha lieu à 7½ heuthes Jeudi au sé, lé 16 Avri 1953, dans la Salle Parouaîssiale dé St. Ouën. L'y-étha un concèrt en Jèrriais à 8 heuthes. Lé publyique n'étha pas à payi d'entrée, mais l'y-étha eune collecte en argent pour couvri les frais d'la séthée. Touos les membres at anmîns tchi voudront aller à St. Ouën par beusse sont învités d'lus trouver au Weighbridge à un quart dé sept. L'y-étha eune beusse à l's attendre, en chèrge du Sieur John Wesley Le Breton.

 

Otis d'Ferme.

 

Les membres sont învités d'apporter les noms Jèrriais d'Otis et êffets d'Fèrme à la préchaine rêunion.