1953: L'Assembliée d'Jèrriais

 L'Assembliée d'Jèrriais

 

Le rêunion mensuelle eut lieu à 8 heures, Vendrédi au sé, le 27 dé Novembre, dans la Salle d'Agriculture en ville, souos la présidence du Connêtabl'ye S. G. Crill. L'y-avait eune huip'taine de membres présents.

 

Quand vint l'temps pour l'élection d'nouvieaux membres, j'fûmes bein heureux d'en èrchever neuf autres. V'là qui montre qué not' total né diminue pon jusqu'ichin.

 

Après qué l's'affaires dé l'Assembliée fûtent finies, Moussieu Charles Billot - iun d'nos vice-présidents - 'tait v'nu tout exprès pour nos raconter ses expériences quand i' fit un v'yage par avion jusqu'en Kenya, i' y a trais ans. I' nos donnit des détails hardi intérêssants et ch'est bein seûre qu'i' n'pèrdit pas d'temps quand i' tait là, à ché qui nos dit.

 

Lé Président ermèrcyit Moussieu Billot pour nos aver intérêssis tellement, et i' r'chu eune bouonne ronde d'appliaudissements.

 

Deux jeunes artistes dé St. Ouen - Kenneth Vibert et Margaret de Gruchy - nos èrcitîtent un raide bouon dialogue appelé “Un ardgument”. I' 'taient bein animés touos les deux, et évidêment not' jeune amin Kenneth n'a pon d'pachience auve les filles de la ville. Nou vait bein étout qué Margaret né peut pas souffri' les garçons d'la campagne! Ch'tait eune plieiche bein risibl'ye et qui fit pliaisi à touos les membres.

 

Ensuite suivi un tchestchionaire sus Jêrri - sujets historiques et géographiques. Ch'en 'tait eune fameuse collection. Y'en avait d'faciles, mais d'assez difficilés étout. L'êpreuve 'tait entre quatre dames et quatre mêssieux. La résultat en fût qué les hommes battirent les femmes par 7 points.

 

1953