Ph'lip pasle des Etats
Y n'savent pas
tchesqu'y font.
Au Portinfé
Jeudi au sé.
Moussieu l'Editeu,
Tant pûs que l'temps va, tant mains que j'comprends nos
Etats. J'm'en vais vos dithe pourtchi, et j'n'ai pas besoin de m'prêssi, car la
Merrienne, après l'tais, s'en est allée siez notre belle-fille, la Jane, et je
n'm'attends pas qu'ou s'sa r'venue d'vant djais heuthes, au pûs tôt. Quand
chais deux-là s'rencontrent, pour bein que l'pot-à-tais s'sait sûs la tablye, n'y'a
pas d'fin à chein tch'ils ont à s'entredithe, et si y'a un mio d'scandale tchi
lûs êchappe, ch'est un vrai mithaclye.
Ach'teu, pour les Etats. J'ai liut l'rapport d'la séssion
d'Mêcredi, quand les membres restites là tout l'jour et n'fites prèsque rain.
Ou vos r'souveindrez, Moussieu, que dans les viers temps,
au mais d'Novembre, l's'Etats s'réunissaient pour considéthé l'Aperchu. Y qu'menchaient
avec les d'Mandes Ordinaithes, épis chonna fini, y prenaient les d'Mandes
Extraordinaithes. Au but d'un jour ou deux, l'Comité des Finances annonçait la
balanche en main et tout l'monde 'tait content, sachant qu'y'éthait une bouonne
somme dans l'coffrefort au mais d'Avri.
Mais ach'teu, ch'n'est pas d'même, car à la fin d'l'année
y reste ocquo des immenses sommes tchi faut distchuté pûs tard, la raison en
étant qu'au mais d'Novembre, y'a yeu de long débats sûs des tchéstchons de p'tite
importance, et prèsque rain d'fait à la fin du jour. Est-che pas de même,
Moussieu?
Mêcredi, la grande affaithe, ch'tait la d'mande pour
trais chents mille louis ou d'même, pour êlargi la cauchie. Il est tchèstchon
de pûs grands batiaux, et mé, j'voudrais savé pourtchi, mais ch'n'est pas là l'point.
Après avé liut l'rapport, j'vint à certaines conclûsions et les v'chin.
1.
Le Baillyi maintchaint que j'avons promint de faithe la
djobbe, et que j'sommes forchis d'l'entreprendre. Nou pouvait vais que pûs d'une
fais il avait un mio peux de chein qu'la Chambre pouôrrait s'mettre dans la
tête de faithe.
2.
Le Député Candlin, notre Chancellier, voudrait emprunté
les sous; mais dans l'couothant d'la journée y donnait l'impréssion tch'y n'savait
pas tchèsqu'y voulait. Y voulit s'mârri avec le Sénateur Troy, car notre
Chancellier est un mio court de pé, mais il avait chouaisi un moussieu qu'nou n'êffrite
pas facilement. Et du qu'mench'ment jusqu'à la fin y 'tait d'pûs en pûs irrité
par le Cyril Le Mérquand, tch'y dit qu'la cause de tout l'ma 'tait que l's'Etats
'taient trop dêpenseurs. Il insistit que la vraie chose à faithe dans les
circonstances, ch'tait d'ménagi avec la grôsse balanche en main et de n'voté
pas un sou que je n'pouvions pas êpeigni. Quant
à emprunté, che s'sait une folie.
A ma
veue, Moussieu, le Cyril a raison, et y'a une autre chose étout tchi m'est bein
cliaithe. Ch'est que l'Sieur Candlin et l'Sieur Cyril Le Mérquand n's'entre-aiment
pas. Faut éspethé tch'y n's'entre-rencontre pas tchique niet dans yunne de nos
ruéttes. Tout l'monde sait que l'Cyril voudrait la djobbe de Chancelier, mais
que l'Sieur Candlin tcheint bon comme un bêni sûs un rotchi.
Le
Député Hettich à ma grande surprinse est tout-à-fait de m'n'idée sûs la
tchéstchon d'aggrandi la cauchi, tchi d'montre qu'il est un homme d'une grande
intélligence. Y voudrait abandonné l'affaithe compliétement, mais j'crains bein
que n'y'en a pas asséz d'san bord, car le Baillyi insiste autrement. Quand au
Sénateur Krichefski, je n'sais vraiement pas s'y sait tchèsqu'y veur, étant
bein pûs intérêssi, et avec raison, dans notre airport. Et ch'est bein seux que si la mâjorité des
membres se contaient libres de dithe lûs honnête opinion, la cauchie réstethait
comme oulle est, et les grands batiaux pouorraient allé lûs faithe quatorze.
Mais
enfin, Moussieu, tchi difféthence que tout chonna nos fait, les patates sont
ocquo à un prix raisonnablye, et l'Sérgent d'Justice ne veint pas par ichin. Tout
ch'qui y'a à éspethé, ch'est que l'temps s'sa bé le jour d'la Vîsite Royale, et
une semaine après pour la Bataille de Flieurs. J'entends la Merrienne tch'y
crouaise le bél et il est temps que j'finisse. A la préchaine...
1957
No comments:
Post a Comment