1956: La Baie d'Saint-Ou

 La Baie d'Saint-Ou.

 

Jusqu'à la fin d'ses jours la Merrienne voudra savé. J'me r'souveins même que la séthée que j'l'y d'mandit s'ou voulait m'mathié ou voulit savé, d'vant dithe oui ou nânin, combain d'sous qu'j'avais à la banque, et s'ou pouvait s'fié qu'une fais mathié, j'n'îthais pas couôre les qu'mins de niet, car n'ou y'avait dit que ch'tait m'n'habitude. J'reussit à la rasseûthé sûs chaque point, mais, entre nous, Moussieu, j'eut une djobbe.

 

Et toute sa vie oulle a tait d'même; a tréjous voulu savé, comme, en liêsant mes léttres ous avez deu vais pour vous-mêmes. Pûs d'une fais j'ai tâchi d'la dgéthi d'chutte mauvaise habitude, l'y ram'nant à la mémouaithe ouèsque les tchuthiers vont quant y dîsent à-bétôt à chu monde, mais j'éthais aussi bein capuchi ma tête contre une muthaille.

 

Hier au sé ou voulit savé tchèsque l's'Etats avaient idée d'faithe dans la baie d'Saint-Ou. “Pourtchi qu'y n'lûs mêlent pas d'lûs affaithes?” ou s'fit. “La baie est bein comme oulle est et Saint-Ou n'a pas d'mandé autchun changement. Quant ès maisons, y'en a dêjà bein trop là. Quand j'tais jeune fille et qu'nous allait en picnic du but des Bianches Banques, nou criyais siez l'Pierre Quenault pour du lait et d's'oeufs et tchiquefais deustrais gâches à vraic, si y'en avait. Ach'teu ch'est des manièthes d'hotels tout l'long, et si nou veur une tâsse de tais et un couplye de p'tites gâches y faut péyi des prix abominablyes. Oulle est dêjà assez gâtée, notre baie, sans l'y faithe ocquo pûs d'ma.”

 

“Eh bein, Merrienne,” j'l'y dit, “je n'sais pas, mais ch'ne s'sait p't'être pas un ma d'bâti tchiques belles petites maisons, mais pas du bord de la mê.”

 

Et l'têrrain d'chu bord-là?” ou d'mandit; “tchèsque nous en f'thait?”

 

J'l'y dit que l's'Etats dév'thait l'accaté. “Y n'vaut pour en bein dithe rain du tout,” j'ajouôtit, car même une biche y crève de faim, et y faut tchiquechose de drôle ouèsque une biche ne peut pas trouvé la nouorrituthe. J'en ai veu d'vieilles là tchi taient couochies, car y n'pouvaient pas s't'nin d'but.”

 

“Ch'est vrai asséz,” ou dit, “mais ach'teu as-tu considéthé que pour tes belles maisons d'l'autre bord y faudrait deux choses, de l'iau et d's'êgouts.”

 

“Quant à l'iau,” j'l'y dit, “y'en a tout-plien sûs l'haut, et nou pouorrait méttre des tuyaux, mais quant ès êgouts, vraiement je n'sais pas trop. Nou n'pouorrait pas laissi toute chute salop'thie-là coulé dans la baie, et an autchun cas le Comité d'la Santé Publique ne l'pérmettrait pas, sans compté les Biautés Natuthélles et les Travaux Publiques. Y faudrait trouvé tchique autre moyen.”

 

“J'n'ai autchune fouai dans les comités d's'Etats,” ou dit, “car par chein qu'j'en vais y sont capablyes d'autchune chose. Et quand tu dis qu'nou n'pouorrait pas laissi les sales-iaux couôre dans la baie, ch'ne s'sait rain d'nouvé. As-tu oublié d'vant la dgêrre la rangie d'chais bungalows sûs la C'mune de Grouville? Ch'tait généralement au Sam'di qu'les Villais arrivaient, et la piupart r'fichaient lûs camp le Lundi matin. Ach'teu ouêsque-y viedgaient toute lûs salop'thie?”

 

“Ma fé! Merrienne,” j'l'y dit, “je n'le sais pas. Sans doute y n'remportaient pas chonna en Ville.”

 

“Pas si bêtes,” ou dit. “A mathée bâsse y d'vallaient sûs la grève avec lus boutchets, faisaient des creux et r'venaient la s'maine d'après pour r'quémenchi. Sans doute tout chonna encouothageait les baigneurs et en graisaient les muléts. Si l's'Allemands n'avaient jamais fait autre chose de bein, y méthaitaient une médaille quand y n'os dêtruisîtes chais baraques-là. Et n'oublie pas qu'si y'a des comité d's'Etats agniet, y'en avaient étout dans chais temps-là. Peux-tu t'êtonné ach'teu que je n'me fie pas d'sûs?”

 

Et, Moussieu, je n'sut pas tchi l'y dithe.

 

Ph'lip.

1956