1952: Rêunion Mensuelle

 L'Assembliée D'Jèrriais.

Rêunion Mensuelle.

 

La rêunion mensuelle eut lieu Vendrédi au sé, lé 29 d'Août 1952, à 8 heuthes, dans la Salle d'Agritchultuthe en ville, souos la présidence du Sénateu Hedley Le Riche Edwards. L'y-avait eune huip'tantaine dé membres présents.

 

La Sociêté Jèrriaise à Londres.

 

Moussieu Philip M. De Veulle, Ségrétaithe distîndgi dé la Sociêté Jèrriaise à Londres, tchi s'adonnait êt' en Jèrri et tch'avait fait l'honneu à l'Assembliée d'et' présent à la rêunion, fut présenté ès membres par lé Président Edwards, et i' fut învité à lus d'viser au sujet d'sa Sociêté. Moussieu De Veulle fut r'chu à bras ou'èrts, et présentit les compl'yîments d'la Sociêté d'Londres à l'Assembliée.

 

En bouan Jèrriais, i' c'menchit à raconter l'histouaithe d'un p'tit c'mench'ment tch'est ach't'heu' eune grande association d'Jèrriais f'nés partout l'monde. L'y-a un tas d'pèrsonnes d'împortance en Angliétèrre et à l'êtrangi, d'origine ou d'pathenté Jèrriaise, parmi ses membres.

 

La Sociêté eut un c'mench'ment tchi n'est pas ordinaithe. En 1896 Moussieu Arthur Balleine, fréthe du défunt Révérend John Arthur Balleine, Recteur d'St. Brélade, 'tait ieune des grosses têtes dans l'Gouvèrnément Angliais à Londres. Comme touos les Jèrriais houors Jèrri, il avait l'ennion chaque fais tch'i' pensait à san p'tit pays natal. V'la tchi lî donnit l'idée d'aller à la station d'Waterloo au sé vaie s'i' l'y-avait des Jèrriais tchi s'en v'naient à Londres. Quant il en trouvit i' s'faîthait un d'vé d'lus aidgi à trouver un hôtel ou un louogement.

 

Comme l'n'y-avait pas mal dé Jerriais tchi d'meuthait à Londres, Moussieu Balleine eut l'idée, étout, dé l's'înviter à s'associer auve li pour former eune sociêté et dîner ensembl'ye eune fais par an. A c'menchi, il' allaient à un hôtel ou restaurant tchi n'couôtait pon trop chi, - mais dans l'couothant d's'années lé nombre grandit, et adjourd'anniet lé dîner annuel est eune occasion d'importance tch'est tréjous présidée par Moussieu l'Bailli d'Jèrri. Hardi d'mêssieux distîndgis dans la vie du rouoyaume ont fait des discours a ch't'occâsion, et même la rouoyauté a fait honneu à la Sociêté par la présence a iun des dînièrs du Duc et d'la Duchêsse dé Kent.

 

Moussieu De Veulle a eune fanmeuse maniéthe dé raconter, et l'Assembliée l'éthait êcouté pour des heuthes dé temps. A la fin d'san discours, lé Président Edwards lé r'mercyit bein des fais au nom d'touos les membres pour aver prîns la peine dé v'nîn à la rêunion et d'donner un discours si întérêssant.

 

Lé Vièr Garçon!

 

Pour montrer au Sieur De Veulle que touos l's'artistes né sont pas à Londres et qu'l'y-en a parmi les membres d'l'Assembliée, lé Président învitit Me. Winter Du Tot à dithe pourtchi qu'l'y-a d's'hommes tchi veulent rester vièr garçon! Lé Sieur Du Tot, tch'est certainement iun des champions r'citeux d'Jèrriais dans l'île, r'citit la fanmeuse plieiche êcrite par Messire Robert Pipon Marett, “Lé Vièr Garçon,” comme i' n'l'y-a qu'li tchi peut l'faithe. I' fît les membres quâsi plieuther d'rithe, et les pliaudissement tchi lî fûtent accordés par tout l'monde 'taient assez pour dêfoncer la salle!

 

La Fraid dans les Pays du Nord.

 

Viyant tch'il a fait si caud ch't'êté, lé Président ermèrtchit qu'tchitch'un pouorrait p't'êt' nouos d'vîser un mio au sujet des pays fraids, et l'Ségrétaithe, tch'a d'meuthé à la Côte, fut învité d'en dithe tchiquechose.

 

Lé Ségrétaithe ramémouaithit à l'Assembliée qué feu Moussieu John Picot avait traduit en Jèrriais tout pliein d'histouaithes dé la vie des chèrcheurs d'or dans la fraid des pays du Nord, - et qu'ieune des plieiches composées par Robert W. Service, “La Crémâtion dé Sam McGee,” en 'tait ieune qué Moussieu Picot avait traduite si supèrbément qu'ou' sèrvithait d'monûment pour tréjous à sa capacité comme êcrivain du Jèrriais. Lé Ségrétaithe la r'citit pour prouver ès gens qu'un être humain peut vivre assez longtemps dans l'gliaichon et la mé pour même envîsagi du pliaisi dans l'idée d'êt' crématé auprés sa mort!

 

Nouvieaux Membres.

 

Les nouvieaux membres êlus sont: Mmes Eva Romeril, Kathleen Darnborough, Eileen Le Sueur, et Mlles Marguerite Le Couteur et Eileen Le Masurier.

 

Eune Raide Bouanne Séthée!

 

A la fîn d'eune raide bouanne séthée, lé Président Edwards ermèrcyit les membres pour êt' vénus, et les mêssieux tch'avaient aidgi à faithe la séthée si intérêssante, et l'Assembliée fut ajournée d'vièrs dgiex heuthes.

 

1952