1953: Les biautés natuthelles

 Les biautés natuthelles.

Merrienne sethait tchi faithe.

 

Moussieu l'Editeu,

 

“Mais, tchèsqu'y font don dans l's'Etats chais jours,” s'fit la Merrienne. “Y m'semblye tch'y n'avanchent pas fort, et y m'semble étout qu'y'a bein trop d'membres tch'aiment à baillyi d'lûs bèques. Dans les viers temps, nou laissait chonna es Jurés-Justiciers et Recteurs, et les membres d'Campagne s'endormissaient comme des mêssieux, et s'rêvilliaient pour dithe “contre,” mais ach'teu ch'est prèsque touos d's'orateurs, et la consequence en est que rain n'est fait. E'rgarde chutte semaine. Deux jours de pérdus!”

 

“Oh, nouffé, Merrienne,” j'l'y dit. “Y n'faut pas dithe que l'temps a tait tout-à-fait pérdu, car le Comité des Biautés Natuthelles ont attrapé une sale tappe, et je n'sais pas tchèsque en s'sa la fin. Par une mâjorité de deux vouaix, la Chambre a décidé qu'ou n'a pas d'confiance en yeux, et l'Baillyi lûs a donné jusqu'à Mardi tchi veint pour décidé tchèsqu'y s'en vont faithe. A ma veue, y faut tch'y résignent, pour être rempliéchis par un autre Comité.”

 

“Oh, ch'est d'même,” ou dit. “J'avais qu'menchi à lièthe la gâzette, mais j'abandonnit d'vant v'nin à la fin, car j'avais grand ma-à-la-tête. Ach'teu, j'ai ouï bein des fais d'chu Comité des Biautés Natuthelles, mais j'n'ai jamais comprint tchèsqu'y taient supposés d'faithe. Peux-tu m'éxplitchi?”

 

“Eh bein, Merrienne, yunne de lûs djobbes ch'tait d'empêchi les gens d'bâti sûs d'la terre tchi pouvait craitre des patates ou autchune autre récolte. Et ch'tait un raide bouon plian, car autrement tout Jêrri éthait bétôt tait couvert de maisons.”

 

“Sans autchune doute,” ou dit, “y nos s'sait v'nu un fliantchet d'Angliais, avec lûs pouchêttes plienes de sous, et dans tchiques années nous éthait peut dithe à-betot au fermage. Mais ach'teu, tu n'm'as pas dit ocquo pourtchi que l's'Etats l's'ont mint à la porte. Estche tch'y n'ont pas fait lût d'vé? Y m'semblye que quand j'fut bèthe du tais ch't'arlevée-là au S'tembre que j'vit une neuve maison bâtie dans la cârre d'un biau clios. Tu t'en r'souveins. Ch'tait siez ma couosine tch'y d'meuthe aupi d'l'églîse d'la Trin'té.”

 

“Vèthe,” j'l'y dit, “j'l'ai veue étout chutte maison-là, mais la terre appartcheint ès Etats, et sans doute ch'est là la raison.”

 

“Oh, tu crai?” ou s'fit. “Eh bein, quant à mé, j'éthais creu que l's'Etats éthaient deu être les preumiers à montré un exemplye. Mais, èstche à cause de chonna que l'Comité en a attrapé?”

 

“Pas tout-à-fait,” j'l'y dit. “Y'avait autre chose. Pour mettre l'affaithe en un mot, l'Comité n'avait pas tréjous agi avec la discrétion et l'bouon-sens qu'nou s'attendait d'yeu. Quant à mé j'ai tréjous creu qu'nou lûs avait donné trop d'pouvé, et ach'teu j'viyons l'résultat. Ecoute une minute, et j'm'en vais l'explitchi. Tu sais bein qu'y'a dêjà longtemps qu'j'avais idée d'bâti un bouon poulaillyi dans l'bas du gardin.”

 

“Tu'en as pâslé assez longtemps,” ou s'fit, “mais tu n'l'as jamais fait. Au jour d'agniet j'ai au mains une demié-douzaine de poules tchi crèvent de la mouoiellêtuthe et d'la fraid. Y'a quatre jours que j'n'ai pas yeu un oeu.”

 

“Ch'n'est pas d'ma faute,” j'l'y dit. “J'vit un membre du Comité un jour, et j'y'en pâslit. Y châtchit la tête en dîsant que j'pouorrais plianté des caboches-là, et tch'il tait seux que l'Comité dithait nânin. Il ajouôtit que même si donnaient lûs consentement, j'éthais ocquo à pâssé d'vant quatre autres Comités, et que chonna prendrait au mains un couplye d'années. Ch'est d'même que j'sommes gouvernés au jour d'agniet.”

 

“Eh bein,” dit la Merrienne, “si ch'est d'même, ch'est d'envié tous chais Comités-là à s'prom'né, et l'pûs vite tant mûs, man Ph'lip.”

 

Ph'lip.

1953