1957: Les juges d'agniet

 Les juges d'agniet.

Ph'lip et Merrienne en paslent.

 

Moussieu l'Editeu,

 

Mêcredi au sé, quand j'avais dit à la Merrienne tchèsque avait arrivé au show d'l'Ile, j'nos mîmes à pâslé des viers temps et des hommes tch'y montraient d'belles vaques, et tch'y 'taient r'nommés comme Juges.

 

“Comme tout a changi,” ou qu'menchit. “Tu te r'souveins, Ph'lip du Frainque Hâcou avec sa Lady Viola, de grand Frainque Le Bro, de John Le Ruez et bein d'autres tch'y n'manquaient jamais au show.”

 

“Vèthe, sans doute,” j'l'y dit. “Y'avait à Saint Pierre Moussieu l'Bro, le marchand d'bêtes, épis à Sainte-Mathie y'avait l'William Alexandre des Mathais, Moussieu Dêsriaux, le Cap'taine Ph'lip Le Bro, le bouonhomme Jean Arthur de souos l'Eglyise, et d'autres que nou n'oublie pas. Dans d'autres pâraisses y'avait Ph'lip Ahyi, d'Saint Martin, les Falles, Dollfuas Née, le gros Ph'lip Le Boutillyi, le Jean Marrét, d'la Maison d'Haut, tch'y vendit le Golden Lad à Moussieu l'Bro. Et y n'faut pas oublié le John Perrée, tch'y fit tant d'bein ès férmiers en accatant lûs bêtes à bouon prix pour les Améthitchains. Ch'tait d's'hommes touos chais-la.”

 

“Tu peux l'dithe,” ou s'fit, “mais y sont touos hors, et ch'n'est pas la même chose ach'teu. Nou m'a même dit que les Juges des Sweepstakes ne sont pûs enfreumés avec une bouaite de dominos et une bouteille de cognac, comme ch'tait la règlye autfais, et j'ai ouï étout qu'les Juges, s'y fument du tout, fument des cigaréttes. Imagine-té le grand Frainque Le Bro ou l'John Le Ruez dans l'ring sans une cigare dans la bouoche!”

 

“J'ai tréjous yeu dans l'idée,” j'l'y dit, “qu'un homme tch'y n'fume pas une cigare ne peut pas jugi une clâsse et qu'ch'est pour chonna que y'a tant d'bêtises de faites au jour d'agniet.”

 

“Tu pouôrrais avé raison,” ou s'accordit, “mais dis-mé, Ph'lip, est-che vrai qu'agniet deux juges ont print trais-quarts d'heuthe à jugi une clâsse de boeux?”

 

“Oui, ma vieille,” j'l'y dit, “et nous en 'tait engnie. Et ch'n'tait pas une grande clâsse. Le John Falle, tch'y n'est pûs, éthait fini la djobbe dans djais minutes et n'éthait pas fait d'trompe. Mais y m'semblye que nos mêssieux d'ach'teu ont peux qu's'y finissent trop vite, y ne s'sont pas considéthés bouons Juges. Et pourtant j'ai ouï Moussieu l'Bro et d'autres dithe que quand les bêtes ont fait l'tou du ring un couplye d'fais, un Juge dév'thait avé fait san chouaix pour de bon. Mé, je s'sais pour donné une limite de vingt minutes ès Juges pour chaque clâsse, et s'y n'pouvaient pas fini dans chu temps-là j'les enviêthais à s'prom'né et j'en trouv'thais d'autres avec un mio pûs d'idée.”

 

“Nou m'a dit,” ou r'mértchit, “que hardi d'nos jeunes juges sont têtoignes comme des ânes, et que quand y'en a deux tch'y n'peuvent pas s'accordé y peuvent ardgumenté pour une démieuthe.”

 

“Chonna,” j'l'y dit, “ch'est bein seux, mais peux-tu m'dithe pourtchi qu'y'a un referee? Y n'y'éthait pas tant d'temps pérdu si les Juges ne s'accordant pas, r'cliâmaient ses sérvices, mais nânin, châtchun veur à toute forche convaincre l'autre, et ch'n'est que quand l'haleine lûs manquent qu'y d'mandent pour le referee, tch'y prend djais minutes à examiné les deux bêtes, faisant la mine tch'y n'avait pas fait san chouaix longtemps d'vant. Ch'est une farce, mais enfin ch'n'est pas sérieux et pour bein tchi faiche biau temps comme agniet, ch'n'est pas gênant. Si la brousse du matin avait continué les Juges n'éthaient pas 'tait si longtemps à faithe lûs djobbe, mais souos les circonstances y n'faut pas les bliaumé trop. Après tout, nou n'tait pas forchi de s't'nin aupi du ring tout-l'temps.”

 

“Oh!” ou s'fit, “tu n'as pas besoin de m'dithe chonna. J'l'ai veu tout-d'suite quand tu'as rentré.”

 

Ph'lip

1957