1957: Les avocats et les docteurs

 Les avocats et les docteurs.

Merrienne a une brilliante idée.

 

Moussieu l'Editeu,

 

La Merrienne avait liut la gâzette, l'avait minse bas, avait print la catte sûs ses g'nors et la v'là tch'y me r'garde en fache. Chonna m'dit tout'suite qu'oulle avait, comme de couôtume, veu tchiquechose dans la gâzette qu'ou n'comprenait pas, et don je m'prépathi pour être tchéstchonné. J'neut pas longtemps à attendre.

 

“Ph'lip,” ou s'fit, “as-tu veu que y'a trais nouviaux Avocats d'vant la Cour Royale, Samedi, pour être assermentés?”

 

“Oui,” j'l'y dit, “et j'comprends étout des rafraichissements à un hôtel. Je n'sais vraiement pas pourtchi que j'n'ai pas tait invité...”

 

“Fiche des rafraichissements,” ou dit. “Chein que j'voudrais savé ch'est pourtchi qu'Jêrri a besoin d'chais Avocats. J'éthais creu que j'en avions déjà pas mal.”

 

“Ch'est d'lus affaithe,” j'l'y dit. “J'pense bein tch'y craient tant pûs tant mûs, et je n'doute pas tch'y pouôrront tous gâgni lûs vie.”

 

“Quant à chonna, tu peux t'en faithe seux,” ou dit, “mais êstche que n'y'a pas tchique limite au nombre tch'y peuvent être assérmentés. Si chonna continue, n'y'étha pas assez d'sièges dans la Cour pour le publyic.”

 

“Y'a une autre chose,” ou continuit. “Prèsque touos les Sam'dis y'a tchique individu tch'y présente tchiques dotchûments et tch'est admint à pratitchi comme docteu dans l'ile. Combain qu'j'en avons déjà au jour d'agniet de chais docteurs?”

 

“Damme, Merrienne,” j'l'y dit, “la liste est dans l'véstibule de la Cour, et la dérnié fais que j'pâssit par là, y m'sembliait qu'ou tait longue asséz, mais j'n'eut pas l'temps d'les conté. Avec chonna ch'est seux qu'y'en avait pûs d'une chinquantaine, et il en est v'nu d'autres dépis. Par chein qu'nous entend, la piûpart font raide bein.”

 

“Y n'peuvent pas sinon,” ou dit, “car au jour d'agniet les gens couothent au docteu pour un rain.”

 

“Vèthe,” j'l'y dit, “tu'as raison, mais ch'est des grimaches quand y r'chévent le compte. Les docteurs d'ach'teu n'sont pas éxactement comme les siens qu'nou connaissait y'a chinquante ans, tch'y v'naient vos vais au liet pour une pièche d'êtchu, et tch'y n'éthaient jamais pensé à envié une action quand nous oubliait à les péyi.”

 

“Comme j'l'avons p't'être fait pûs d'une fais,” ou s'fit. “Bein souvent l'compte du docteu 'tait péyi après l'entêrrement et pas d'vant. Mais ocquo une tchéstchon, Ph'lip. Pourtchi, avec chutte mâsse de docteurs que les entrepreneurs d'entêrrements ont ocquo tant d'travas? Pourtchi que dans bein des pâraisses les chim'tièthes se remplyent si vite? Pourtchi tant d'maladies de tchi qu'nou ouait que les docteurs ne peuvent pas dithe tchèsqu'y cause le ma?"

 

"Je n'sais pas pûs qu'té, Merrienne," j'l'y dit, "mais j'ai dans l'idée qu'la nouôrrituthe n'est pas si saine ni si bouanne comme aut'fais, épis étout n'y'a pas de r'pos parmi les gens. Ch'est tout à la grande vitesse et tu sais bein que si nou cache un engin trop vite, y veint à s'lâssé dans p'tit d'temps. Ch'est de même avec le corps humain, et ch'est parsque les gens d'agniet n'le comprennent pas qu'les entrepreneurs ont tant de djobbes."

 

"Ch'est m'n'opinion étout," ou dit, "mais y n'faut pas oublié qu'la vie est pûs duthe ach'teu qu'ou n'tait pour lûs pèthes. L'homme tchi n'se prêsse pas est bétôt souos l'fou, et si j'n'avais pas 'tait ichin toutes ches années, y'a un bouanhomme assis dans sa grand'tchaise, fumant sa pipe, tch'y s'sait sans autchune doute ès Petites Soeurs."

 

J'tais à considéthé ma raîponse à chutte insulte-là, Moussieu, quand ou continuit.

 

"Y'a une chose," ou s'fit. "Comme tu l'sais, la Jane a idée d'méttre san traisième, tch'y n'est pas trop bein dans sa tête, le pouôre êfant, dans l'office d'un êcrivain, pour en faithe un Avocat pus tard, mais j'ai pensé à tchiquechose de bein miyeu, et j'm'en vais l'y dithe tout'd'suite.”

 

“Et tchèsque ch'est chutte belle idée que tu'as yeu?” j'l'y d'mandit.

 

“Ch'est bein simplye,” ou dit, “y faut en faithe un ministre...”

 

Ph'lip.

1957