1979: Mémouaithes du temps jadis

 Mémouaithes du temps jadis

 

Trenton,

Michigan,

U.S.A.

 

Lé 27 d'octobre, 1979.

 

Moussieu l'Rédacteu,

 

Comme j'vouos l'disais la s'maine pâssée, les fielles dé bouais tchaient partout dans chu vaîthinné ches jours et l'temps c'menche à nouos annoncer l'arlévée d'l'hivé. Ch'est drôle qué v'la tchi m'donne des pensées d'Jèrri, car la scène ichîn est tout-à-faite difféthente à la cheinne dé l'arrivée d'l'hivé en Jèrri. Ichîn, ch'est dans un air quâsi silencieux qu' nou vait les fielles tchaie, et la fraid est pus secque. I' m'sembl'ye qué l'vent est pus violent en Jèrri et l'air pus à la plyie. Ch'est p't'-êt' viyant qu' man vièr Ménage est sus l'haut des Landes et pus à l'înjuthe du temps. Ichîn, j'sis pûtôt à l'abri d'grands bâtisses et d'rues plieines dé maîsons bâties côte-à-côte.

 

Beintôt, probabliément l'préchain mais, la né s'en va faithe sén appathence et tout s'en va êt' blianc. Les bouais (un tas éthont pèrdu les fielles) f'thont un mangnifique spectacl'ye tchi m'fait tréjous penser ès portraits d'hivé qu' nou vait sus les cartes d'Noué. Et la né m'rappelle les hivièrs pâssés au Cannada, dévant m'en v'nîn d'meuther en Améthique, quand la fraid 'tait si extrême qué j'eus l's ouothelles g'lées dans eune tempéthatuthe dé quarante dégrés en d'ssous d'zéro Fahrenheit. Pourtant, chutte fraid-là et l'hivé n'étaient pon aussi pénibl'yes comme un hivé dans l'camp d'batâle en Flandre à la dgêrre dé 1914-18, où'est qu' vent, plyie, pité, “obus” et balles d'arme et d'can[on] pathaîssaient s'associer à faithe la vie minsèthabl'ye.

 

Un vièr diton Jèrriais nouos dit tch'i' faut vivre vyi ou mouothi janne, et quand l'Bouân Dgieu vouos fait la grâce dé vivre vyi nou-s-est plieins d'mémouaithes dé toute eune longue vie. Les meinnes mé mènent souvent en Jèrri et j'êprouve à r'vivre les jours, si heutheux, d'man janne temps. J'pense à la chaleu d'l'êté de y'a huipante ans, et à la mûsique du bourdonnement des moûques et des bourdons parmi les flieurs dans l'gardîn et l'long des f'nêtres siez nous à La Forge, et à la fraîcheu délicieuse dé la mé quand j'allais m'bangner à L'Eta. Et j'pense au calme et à la trantchilité, quâsi mystéthieuse, dé l'aube du jour quand nou viyait la feunmée dans cheunm'nées monter comme dé l'enchens vèrs les cieux.

 

Pour mé, mousse, la vie 'tait eune belle aventuthe. L's êvènements d'touos les jours m'întérêssaient comme s'il' avaient lieu spécialement pour mé. La lectuthe, apprînse à l'êcole, mé donnit un accompte des pays êtranges tchi m'pathaîssait mèrveilleux et tchi m'faîsait vouler les vaie. L's histouaithes d'aventuthes en mé et à La Côte, Tèrre-Neuve et Labrâdor qué j'ouiyais dans la forge au sé m'donnaient un d'si additionnel dé navidgi et d'viagi.

 

Lé temps vînt qu' man fréthe Fraînque s'en vînt d'meuther à La Forge étout et j'faîthions la route à l'Ecole Wesleyenne ensembl'ye au Haut du Mathais, eune affaithe dé trais milles - tchi nouos sembliait êt' chînq. Chutte marche dé siex milles par jour né n'nouos empêchait pon d'jouer ès marbres ou au tireli et à la topie quand nou r'vénait à la maîson en êté. Nou-s-avait tant d'ênèrgie à ch't âge-là qué j'ai veu même couôrre atout l'cèrcl'ye, qué nou dgidait atout un cro, tout l'long du c'mîn des Landes au Haut de Mathais.

 

En marchant, nou grîmpait les muthâles lé long d'la route et j'mé r'souveins d'aver veu bâti la cheinne du côté sud d'la route tchi mène dé Vanilla House au Champ Donné. Oulle est pus haute qué d'habitude, et j'soulions êprouver à vaie létché tch' arrivethait au haut l'preunmyi. La grîmp'thie d'muthâles et l'jeu des marbres où'est qu' nou m'ttait un g'nou à tèrre, 'taient dueurs sus l'but d's ortés des bottes. Nou-s-en ûsait, des bottes, dans chu temps-là, et Mait' Elie Maugi, du Pignon, dans La Route des Landes, faîsait un bouan conmèrce comme cordonn'yi.

 

Un êvènement tch'eut un êffet sus m'n îmaginnâtion quand j'avais huit et neuf ans 'tait la Dgèrre des Boèrs. Les noms Transvaal, Pretoria, Mafeking, Bloemfontein et Ladysmith m'étaient familièrs. Lord Kitchener, Lord Roberts et Sir Redvers Buller 'taient mes grands héros, et lé fait qué man p'pèe et m'a oncl'yes Winter et Adolphus 'taient soudards dans la Milice Rouoyale mé donnait eune idée d'la raîson-d'être d'eune armée d'soudards en temps d'gèrre. Dé ma chambre à haut siez nous j'pouvais vaie Spion Kop dans Les Blianches Banques, et j'm'înmaginnais pouver vaie les soudards Angliais grîmper amont l'vrai Spion Kop en Afrique du Sud. J'n'avais autcheune idée dans chu temps-là qué j'îthais en dgèrre me-mème pas tard dans la vie.  Mais i' faut qué j'tchitte à vouos embêter d'toute ma reunminn'nie du temps pâssée!

 

George d'La Forge.