1982: Choses et autres

 Choses et autres

 

Trenton,

Michigan, USA.

 

Lé 10 d'avri, 1982.

 

Moussieu l'Rédacteu,

 

Ch'est întérêssant d'vaie tch'est tch'i' s'arrive en Jèrri quand nou-s-en est si liain comme en Améthique. À ch't heu qué les gâzettes veinnent par avion, les nouvelles n'ont qu' eune sémaine quand il' arrivent ichîn. Les dreines sont sîngnes d'activité r'mèrquabl'ye pour un p'tit pays, compathées à chu grand pays d'Améthique tch'a eune populâtion dé 220 millions d'pérsonnes.

 

Comme i' s'adonne, j'avons un Président tch'est consèrvateu. Il est à êprouver à r'miédgi l's affaithes d'un déficit d'dollars atchumulé par les précédents gouvèrnements “libéraux-socialistes” tch'ont supporté l's unions d'travailleurs à agrandi lus gages au point tch'i' couôte tant pour fabritchi un moto ichîn qué nou peut en acater un Japonais, fabritchi au Japon et transporté ichîn, à miyeu marchi. Lé troubl'ye en est, sans doute, qué nouos politiciens savent bein qué ches hauts gages, un tas à dgiex-neu dollars par heuthe, et un tas d'bénéfices comme des vacanches payies et l'rembours dé comptes dé dentistes, etc., sont grandement la cause du prix des motos, mais tch'i' n'lé mentionne janmais viyant tch'il' ont peux d'pèrdre la vouaix des travailleurs dans l's êlections. Et la tragédie en est qu' un Président tch'êprouve à r'miédgi eune affaithe dé même est atchûsé d'êt' l'anmîn des riches et l'ennemîn des pauvres!

 

Pour lé moment, il est hardi embêté, nouot' Président. La prînse des Îles Falkland par l'Argentinne lé met entre deux feux, car l'Angliétèrre et l'Argentinne sont touos les deux nouos alliés et i' n'ose pon montrer d'favoritisme, sustout comme par la “Monroe Doctrine” touos l's êtats d'l'Améthique sont supposés s'euni contre l'ennemîn tch'en attaque iun d'ieux. Quant à mé, j'sis ordgilleux d'vaie qué l'Angliétèrre est à sé r'bînfrer comme i' faut. J'voudrais êt' janne assez pour m'engagi soudard ou frégatîn pour aller lus aîdgi à les r'prendre, les îles.

 

Mais r'vénant ès affaithes dé Jèrri. Dans ma lettre du seize dé janvyi, j'disais qué l'Sieur Maurice Buesnel 'tait bouân pèrdant dans l'êlection pour Sénateurs. Ayant gângni eune êlection pour Député il est hardi acti à d'mander des tchestchions dans L's Êtats. I' m'veint à l'idée qué s'i' continnue d'même i' faudra beintôt qué L's Êtats nomment un Conmité Spécial pour rêpondre ses tchestchions et les cheinnes du Député Le Main!

 

Quant à ch'la, i' faut dithe qué ch'n'est pon eune mauvaise habitude dé tchestchionner les présidents des Conmités d's Êtats, prîncipalement quand ch'est eune affaithe dé couôtement comme, par exempl'ye, lé couôtement dé tchînze chents louis d'extra, par maîson, pour un p'tit “local vitré” ou sèrre (“Conservatory” en Angliais) en d'vant d'eune maîson pour prendre avantage du caûffement du solé. J'sis du même, avis du Député O'Connor qu' eune fais assis d'dans en hiver, chein qu' nou sauve en chaleu est assez pour vouos g'ler!

 

La tchestchion d'la valeu du Fort Régent à l'Île est bein întérêssante, et ch'est aîsi à comprendre qu' un déficit dé quat' chents mille louis par an s'en va gêner un tas des Membres d's Êtats tchi sont consèrvateurs au point dé vouler même înstaller un casino pour tâchi dé réduithe, et p't-êt' aboli, lé déficit. Et jé n'sis pon êtonné d'vaie qué l'Sénateu Jeune et l'Député Jean L'Maistre, deux fanmeux Chrêtchiens, sont contre l'idée d'un casino.

 

Eune chose tchi m'pathaît hardi tchestchionnabl'ye est l'idée d'faithe un travailleux tchitter à l'âge dé souoxante ans à la pliaiche dé souoxante-chînq. La grand' partie d's hommes sont acouo dans lus prînme à souoxante ans, et les cheins tchi n'ont pon dé pâsse-temps ou d'êcants lus trouvent souvent êpithotés et malheutheurs sans aver rein à faithe. Et pis s'il' ont des pénsions, v'là tchi couôte eune forteune à les payi en c'menchant à 60 ans.

 

Ch'n'est pon comme lé temps pâssé quand un homme mettait tchiquechose dé côté pour sa vieillèche châque fais tch'i' r'chévait ses gages. Au jour d'aniet, les gens dêpensent lus gages à m'suthe, ayant dans l'idée qu' l'Êtat s'en va prendre soin d'lus vièrs jours. À m'n idée, septante es'sait pûtôt eune bouanne âge à tchitter d'travailli. J'espéthe qué L's Êtats n's'en vont pon adopter eune folâtre idée d'même. Né v'là eune chose tchi m'sembl'ye qué la Chambre né dév'thait pon aver à pèrdre san temps à considéther. Les gages sont hauts assez ches jours pour qu' eune pèrsonne piêsse mett' tchiquechose dé côté pour ses vièrs jours, tout spécialement les cheins tchi travaillent pour L's Êtats!

 

George d'La Forge