1955: Dîner Annuel

 L'Assembliée d'Jèrriais

Dîner Annuel.

 

Lé Dîner Annuel dé l'Assembliée d'Jèrriais eut lieu Samedi au sé, lé 29 dé Janvyi, 1955, à l'Hôtel “Osterley Court”, à St. Hélyi.

 

Les membres arrivîtent dé sept heures et d'mie à huit heures. Tchi pliaisi dé s'trouver dans d's appartéments si bein cauffés, et dans un hôtel si confortablye. Ch'tait la preunmière fais qué j'avions ieu not' Dîner en Ville, et en chouaîsissant l'Hôtel “Osterley Court”, j'eûmes la chance, car i'n'y avait rein tchi mantchait pour not' confort.

 

Lé Comité Social avait fait l's arrangements pour lé Dîner, et les félicitations de l'Assembliée sont deues au Sieur J. W. Le Breton (Sécrétaire du Comité Social), pour lé décor dé l'apartément, et des tablyes en rouoge et blianc - les couleurs dé Jèrri. Souos la direction du Gérant, le Sieur Chs. Brown - j'eûmes un dîner superbe, bien sèrvi et soigneusement préparé. Chent-dgiex pèrsonnes lus assiévîtent à mangi! Né v'chin l'ménu:-

 

Soupe dé Tomates.

Filet Grilyi - dé Pliaie.

Lard rôsi avec Saûce de Pommes.

Patates et Choux-flieurs.

Mélange de fruits et Crême dé Jèrri.

Fromages et Galettes.

Café.

Cidre, bière ou limonade.

 

Lé Sieur John Le Breton, comme Maître de Cérémonies, d'mandit à Maître George Noel dé prononcer la prière dévant et à la fin du r'pas.

 

Lé Président, Moussieu S. G. Crill proposit la santé d'Sa Majesté (la Reine, not' Duchesse). Ensuite, Me. Chs. Billot proposit la santé du Juge F. V. Le Feuvre, et d'sa dame; du Sénateu H. Le Riche Edwards et d'Mme Edwards. Ches deux mêssieux sont nos Présidents d'Honneur. I' sont Membres Fondateurs étout, dépis lé tout c'menchement en 1951, quand i'n'y avait qué 27 membres. Not' Assembliée a grandi rapidement, car, au jour d'annièt, j'avons sus nos livres, passant 200 membres.

 

Lé Juge F. V. Le Feuvre rêponnit, et nos dit comment qu'i' tait content d'être là, auve sa dame, et en présence dé tant d'membres dé l'Assembliée. I' nos fit un charmant discours.

 

Me. Jean Richard proposit la santé d'l'Assembliée, et l'Connétablye S. G. Crill rêponnit pour les membres. Le Sieur Ernest Vibert proposit la santé des officièrs, et l'Trésôryi G. W. Bertram lé r'mèrcyit en tchiques mots bein chouaisis. Finalement lé Député Herbert Gibaut proposit la santé des visiteurs et Moussieu Frank Luce (Député) y rêponnit.

 

Dans l'couorant d'la sérée, Mlle Doreen de la Haye présentit un touffet d'flieurs à Mme S. G. Crill (La dame du Président), et lé jeune Jean Le Maistre présentit l'aut' touffet, en rouoge et blianc étout - à Mlle Lucille Picot (Sécrétaire). Les deux dames, en tchiques mots d'appréciation ermèrcyîtent les membres du Comité Social pour lus charmant geste.

 

Lé Président d'mandit qué lé Gérant - le Sieur Chs. Brown, s'apprèche, à fin qu'i' l'ermèrcyie et l'félicite pour lé magnifique dîner qu'i' nos avait sèrvi.

 

Lé reste dé la sérée fut passée amicalement en jouant ès cartes.

 

I'n'y eut qu'eune seule chose qui nos fit d'la peine, et ch'fut l'absence dé deux d'nos membres fidèles - not' Vice-Président, Me. Frank Trachy, bein malade siez-l'i, et sa dame, qui fut empêchie dé v'ner. Ch'est bein seûre qu'i' pensaient en nous. Avec not' sympathie, j'lus envions nos bouans voeux. J'espérons qué d'vant longtemps notre ammin s'en va erprendre ses forches et r'trouver sa bouanne santé, comme aut' fais.