1955: Eune Sérée d'Chansons et d'Rêvillon

 L'ASSEMBLIÉE D'JÈRRIAIS

Eune Sérée d'Chansons et d'Rêvillon

 

La rêunion du mais d'Fevri eut lieu à St. Martîn avec eune sérée d'chansons et d'rêvillon. V'là tchi fait du bein dé temps en temps dé varier lé locale et l'programme étout. V'là tchi donne un nouvel intérêt à nos membres.

 

En arrivant à la Salle Publyique, ch'tait l'Comité Dramatique qui 'tait en chèrge. Me. Jean Richard comme président, 'tait là pour faire la beinv'nue à tout l'monde.

 

I' avait eune chentaine de membres présents. La municipalité d'la pâraisse 'tait bein r'présentée, et j'eûmes lé pliaisi d'aver auve nous lé Recteu (lé Rev. E. C. Lemprière), lé Connêtablye Henry Ahier, lé Député J. N. Germain et sa dame, lé Sénateu Fred Dorey et sa dame, et l'Chent'nyi T. G. Billot et Mme. Billot.

 

Nouvieaux Membres

 

Les affaires dé la rêunion, souos la présidence du Connêtablye S. G. Crill, fûtent raccourchies. Les nouvieaux membres êlus sont: Lé Rév. L. F. M. Helleur, M. ès A., l'Avocat P. H. Giffard, lé Député F. E. Luce et Mme. Luce, lé Rév. E. C. Lemprière, lé Connêtablye Henry Ahier, lé Député J. N. Germain et Mme Germain, lé Chentn'yi T. G. Billot et Mme Billot, lé Sieur Harold de Gruchy et Mme de Gruchy, lé Sieur Ronald Buesnel et Mme Buesnel, lé Sieur Gordon Le Breton et Mme Le Breton, Mme Ruby Noël, lé Sieur Francis Noël, Me. Ph. A'court et Mme A'court, Kenneth Vibert (membre junieur) et Sadie Le Sueur (membre junieur).

 

Comme divertissement, lé Trésôryi (G. W. Bertram), auve son ciné, montrit, en portraits, des êvenements d'L'Assembliée ichin, et là en magnifiques couleurs.

 

Ensuite lé Comité Dramatique nos présentit des chansons en Jèrriais, en en costume, avec Mme Eileen Le Sueur au piano. I'y en avait pour touos les goûts.

 

Dans les chansons comme “Mon bieau p'tit Jèrri”, “Dans mes pommes dé tèrre”, “L'haoulouoge dé nos anchêtres” et “Vive l'Amour”, i'y avait un réfrain, et les membres dé L'Assembliée trouvitent lus vouaix pour y joindre avec enthousiasme.

 

J'eûmes lé grand pliaisi d'êcouter not' anmîn Ph. Sarre nos jouer eune belle pièche sus l'piano. Ch'tait ravissant et i' r'chut bein d's appliaudissements.

 

Soudards dans la Milice

 

Vers la fin du programme, G. R. Le Masurier et G. Perchard, comme soudards dans la Milice, éraient mérité des médâlles, mais, après lus chanson, i' pâssitent lus chapieaux, à la plièche, et fitent la collecte!

 

Les dames du Comité Dramatique, auve l'aide de Mme Richard, avaient prépare des raffraichissements qui nos offritent libéralement - un magnifique souper, auve mérvelles, gâche à pâte lévée et aut' choses!

 

Dévant s'n aller, L'Assembliée chantit touos ensemblyes, “Not' bouan vieir temps”. Lé Connêtablye S. G. Crill offrit des r'mèrciements ès artistes, au Connêtablye Henry Ahier pour l'usage dé la salle, au Comité Dramatique, et à toutes les pérsonnes responsablyes pour lé succès d'eune si fanmeuse sérée.

 

1955