1979: L'Temps jadis

 L'Temps jadis

 

Le Mènage ès Feuvres,

St. Ouën.

 

Lé 26 d'mai, 1979.

 

Moussieu l'Redacteu,

 

Lé temps n'a pon 'té trop bé d'pis qué j'vouos êcrivis la s'maine pâssée et j'ai ieu l'occâsion d'reunminner et d'penser à mes p'tits jours dans chutte contrée des Landes. Ouaithe qué jé n'fus pon né ichîn dans L'Ménage, j'vai les cheunm'nées d'la maison où'est qué j'vis l'jour la preunmié fais. Oulle 'tait appelée La Forge dans chu temps-là, mais oulle est appelée “Mossgiel” à ch't heu. Ou fut bâtie par man Papa L'Feuvre. I' n'tait pon l'grand d'sa généthâtion - ch'tait san fréthe Charles tch'etait l'grand et tch'avait héthité L'Ménage. Mais man grand-oncl'ye Charles né mathyit pon et à sa mort ch'tait mé tchi l'héthitis, étant l'grand d'man P'pèe (décédé), tch'était l'grand d'man Papa (décédé), fréthe dé Charles.

 

Ch'tait tard dans la séthée dé mardi, l' 29 dé septembre, 1891, qué j'fus né. Au moment qué j'vîns au monde, lé tas d'fain au Sieur Vibert, à “Highlands”, siez tchi ma grand'tante Lîsabé gardait maîson, fut brûlé, et nou viyait la lueu des fliambes dé la f'nêtre dé la chambre. Là, don, ou-s-allez m'dithe qué jé n'peux pon m'en r'souv'nîn - huiptante-sept (appréchant huiptante-huit) ans pus tard? Pourtant, j'm'èrsouveins qué ch'tait l'Général C. B. Ewart tch'était Lieut'nant Gouvèrneux à ch't' êpoque-là, Messire George Clément Bertram 'tait Bailli, lé Très Révérend George Orange Balleine 'tait Douoyen, et l'Révérend John Pépîn 'tait Recteu d'St. Ouën. Ch'tait li tchi m'bâptisit à l'Églyise dé St. George lé onze d'octobre, 1891.

 

Ch'tait Moussieu Ertu L'Chèr tch'était Connêtablye. V'la tchi m'ramémouaithe qué hardi d'nouos bouannes vielles fanmil'yes Jèrriaises ont dispathu. Y'a acouo tchiques Balleines au jour d'aniet, mais i' n'y'en a pon fort. J'm'èrsouveins du temps qué les Recteurs dé St. Brélade, dé St. Sauveux et d'St. Cliément 'taient tous des Balleines! La fanmeuse fanmil'ye Le Chèr (Le Cerf) est absolûment péthînmée.

 

Mais pour èrvénîn à mes p'tits jours. Des blianches-femmes hantaient les c'mîns dans chu temps-là. L's anciens d'visaient d'fantômes et d'enchorchel'lie. I' lus r'souv'naient acouo des jours dé la fraude lé tou des côtes et en racontaient souvent d's histouaithes. Nouos pathents nouos disaient qué lé balle-à-leunettes veindrait nouos qu'si si nou 'tait mêchants. Les gens allaient dans les clios ramâsser des couêpieaux pour brûler dans l'âtre.

 

Jé v'nais souvent au Mènage vaie ma grand-grand'-méthe, née Lisabé L'Brun en 1806. I' m'sembl'ye qué j'la vai acouo atout sa coêffe assise au coin du grand âtre, san pot à s'no à côté d'lyi et un rouoge mouoché sus ses g'nouors. Ou mouothit en 1895 dans sa nénant'tch'ième année quand j'avais quâsi quatre ans. J'm'èrsouveins tout à fait bein dé s'n entèrrement. Y'avait des plieunmes sus châque côté d'la hèrse et ieune sus la tête du j'va tchi faisait des saluts quand i' marchait, et les gens tchi marchaient driéthe la hèrse avaient des cipres sus lus chapieaux.

 

Au sèrvice d'entêrrement dans l'églyise, Moussieu Pépîn montait tréjous dans la tchaise pour liéthe l'Evangile du sèrvice funéthaithe, le tchînzième chapitre de l'Epitre ès Corinthiens, c'menchant au vîngtième vérset, iun des pus bieaux chapitres dé la Bibl'ye, et hardi impressionant en Français.

 

Dans chu temps-là les femmes portaient l'deu pour trais ans d'temps, la preunmiéthe année auve un long vouaile de crêpe. Les près-pathents du défunt allaient à églyise “prendre lé deu” lé preunmié Dînmanche auprès l'entêrrement. I' s'assiévaient ensembl'ye dans un banc (ou deux ou pus) dans lé tout d'vant d'l'églyise et restaient assis pour la duthée du sèrvice. I' n'lus l'vaient pas pour les cantiques. Lé Minnistre faîsait allusion ès bouans caractéthistiques du défunt dans san sèrmon.

 

J'pensais à tout chenna Dînmanche pâssé quand j'tais à l'églyise dé St. George où'est qu'les services son ten Angliais, comme partout ailleurs à ch't heu. Les sèrvices 'taient si bieaux en Français. Lé langage dé nouot' bouanne vielle Litourgie est supèrbe, bein pus bé, à m'n idée, qué l'chein des nouvieaux sèrvices d'à ch't heu. Ma Litourgie m'fut présentée à l'Êcole du Dînmanche à St. George lé treize dé novembre, 1898, et j'y tcheins.

 

En pensant ès bouans vièrs temps dé y'a eune huiptantaine, i' m'sembl'ye qué les gens allaient à l'églyise et à la chapelle bein pus souvent qu'à ch't heu. Les méthes allaient tréjous à l'églyise pour êt' “èrlévées” auprès la naîssance dé lus êfants. Ouaithe qué l'Méthodisme 'tait bein êtablyi dans l'Ile, la grand' partie des gens avaient les êfants bâptisis à l'églyise, et i' n'y'avait pon fort dé femmes tchi n'allaient pon à l'églyise pour êt' èrlévées.

 

N'est-i' pon temps dé nouos mettre à r'nouveler et siéthe ches bouannes moeurs et habitudes du temps jadis?

 

George d'La Forge.