1981: Av'-ous des véthues?

 Av'-ous des véthues?

 

San Antonio,

Texas, U.S.A.

 

Lé 28 dé novembre, 1981.

 

Moussieu l'Rédacteu,

 

Les mousses d'à ch't heu ont-i' des véthues? Quand j'sis en Jèrri en êté, les mousses qué j'vai sont d's êcolyièrs dans les beusses en r'vénant d's êcoles en ville. I' sont si enjouardés et mal êl'vés, et font tant d'brit et d'catchet, qué ch'est bein à aîsi d'les compather ès cheins du vièr temps tch'avaient à marchi à l'êcole dans les campangnes ou aller par train dé Bieaumont pour les cheins tch'allaient au Collège Victoria et ès aut' êcoles en ville. Dans chu temps-là i' lus comportaient bein mus et 'taient bein pus polis qu' les cheins d'à ch't heu. Et il' avaient bein pus d'respé pour les grand' pèrsonnes.

 

Mais r'vénant au sujet des véthues. I' m'sembl'ye qué touos nous mousses en avaient, et ch'est bein seux tch'i' y'avait toutes sortes d'manniéthes à s'en dêfaithe. J'm'èrsouveins qu' j'en avais deux bouannes grosses sus iun d'mes dés - ch'tait l'pus long d'la main, lé chein du mitan - et i' m'veint à l'idée qué les Bulletîns d'Quart d'An d'L'Assembliée d'Jèrriais nouos donnent les noms d'touos les dés dans l's arînmées d'nouôrriche. Y'en a eune liste des divèrses vèrsions. Eune vielle version St. Ouënnaise c'menche par le p'tit dé étant Pièrre des p'tits, (2) malachis, (3) longis, (4) liquepot, et (5) ponchot.

 

Ch'tait don sus l'côté du longis d'la main drouaite qué j'avais deux belles grosses véthues. Dans chu temps-là ch'tait l'Sieur John Francis Frederick d'Aubert (lé fréthe à m'n oncl'ye et parrain Fraînque d'Aubert) tch'était Chef-Gardgien du phare dé La Corbiéthe, et j'allais souvent l'vaie dans l'phare. Un bouan jour, en ramontant lé p'tit c'mîn tchi mène à l'entrée (nou pouvait couôrre en amont à ch't'âge-là), j'frottis ma main accidentellement contre lé rotchi, et l'rotchi m'êrachit mes deux véthues, et i' n'sont janmais r'vénues. Mais j'n'èrquémande pon chutte manniéthe-là. Oulle est un mio trop rude et sangliante.

 

Y'a bein des manniéthes dé s'dêfaithe dé véthues. I' m'sembl'ye aver ouï man fréthe Fraînque dithe tch'i' vendit les siennes au bouanhomme Jacques Gavey d'La Mouaie, à St. Brélade, pour quat' sou et tch'i' s'en allîdrent lé lendemain. Chose assez drôle est qué ouaithe qué j'nouos comptons gentiment êcliaithis d'nouos jours, y'a acouo tchiques anciens tchi prétendent pouver les cachi, et p't-êt' auve raîson. I' s'pâsse un tas d'choses dans l'couothant d'la vie qué nou n'comprend pon. À m'n idée, la fouai a hardi à y faithe. I' n'faut pon oublier qu' les Saintes Êcrituthes nouos disent qué la fouai peut bouogi eune montangne!

 

Ieune des miyeu manniéthes dé cachi des véthues 'tait la dêcompt'tie. Quand j'tais janne y'avait un bouanhomme tchi s'y prannait comme chennechîn pour clièrgi véthues, d's êteurses, du feu sauvage et même aut' maladies. Où'est qué l'ma s'trouvait i' faisait sîngne dé la Crouaix à c'menchi. Et pis i' c'menchait à compter à l'arbours du nunmétho neuf jusqu'à rein. Lé deuxième jour i' c'menchait du nunmétho huit, lé traîsième jour dé sept, lé quatrième de six et continnuait d'même jusqu'à rein, et les véthues avaient dispathu. Un aut' dêcompteux vouos invitait d'vouos assiéthe. Et pis en vouos touannant l'dos i' barbélotait tchiquechose solonnellement et, sans s'èrtouanner, i' vouos ordonnait d'sorti d'la maîson sans mot dithe et tch'i' n'dévait dgéthe vouos vaie ou bein qu' la dêcompt'tie tch'i' v'nait d'faithe né vaudrait rein. I' n'y'avait don qu'à s'en aller et les véthues s'en allaient étout d'vant longtemps.

 

Eune aut' manniéthe était dé voler eune bédache dé viande pour frotter sus les véthues et pis la fliantchi par sus l'êpaule gauche et les véthues lus en allaient. Ou bein eune aut' manniéthe 'tait d'entèrrer la viande auprès l'aver frottée sus les véthues, et i' s'en allaient à m'suthe qué la viande sé dêpensait dans la tèrre.

 

Mais ch'n'est pon 'couo tout. Nou pouvait voler du pouothé pour frotter les véthues atout et env'yer l'pouothé à pouôrri.

 

Eune manniéthe qué j'n'aimais pon était d'frotter un colînmachon sus les véthues et l'pitchi sus un pitchet d'êpinne ou du bouais. V'là tchi m'pathaîssait trop cruel pour lé pouôrre colînmachon.

 

Y'avait acouo d'aut' èrmièdes, mais jé n'm'en vais pon vouos enn'yer à les raconter. Auve touos ches r'mièdes ch'est ravissant tch'i' ieûssent des véthues d'restant! Mais comme pour les grands maux i' faut des grands r'mièdes, ch'tait bein à propos d'en aver pour les p'tits maux étout!

 

George d'La Forge

 

Biblyiographie:  Les Bulletîns d'Quart d'An d'L'Assembliée d'Jèrriais.