1982: Hièr et aniet

 Hièr et aniet

 

Trenton,

Michigan, USA.

 

Lé 22 d'mai, 1982.

 

Moussieu l'Rédacteu,

 

En ouvrant la gâzette du six d'mai, 1982, eune chose tchi nouos a fait pliaîsi, à man fréthe Fraînque et à mé, a 'té d'vaie l'portrait d'nouos bouans anmîns Ouoyamme (“Alfie”) et Hilda Anmîn et lus fanmil'ye, dé “Wayside”, au Haut du Mathais, St. Ouën, à l'occâsion d'la célébrâtion d'lus neuches dé diamant. J'lus souhaitons jouaie, bouân pid, bouan' yi, bouanne dent et acouo bein d's années à joui d'eune bouanne vie, et l'Paradis à la fîn d'lus jours.

 

Ch'est întérêssant pour un vièr Jèrriais d'nénante ans, tchi d'meuthe à l'êtrangi, d'liéthe la gâzette dé Jèrri et êprouver à compather les nouvelles d'à ch't heu auve les cheinnes dé san janne temps dans l'Île.

 

La preunmié chose tch'i' r'garde est la page tchi montre les naîssances, mathiages et décès pour vaie, sans doute, s'i' y'a d's anmîns tch'ont pâssé l'pas. La difféthence entre l's annonces dé y'a disons huiptante ans et pus et les cheinnes d'au jour d'aniet est les noms des annoncés. Dans la gâzette du six d'mai, sus vîngt naîssances i' n'y a qu' deux vrais noms Jèrriais. Sans doute, y'a tchiques noms Angliais tchi r'présentent probabliément des fanmil'yes nées dans l'Île pour deux ou trais généthâtions. Au c'menchèment du siècl'ye i' y'avait probabliément tchiques noms Brétons (i' y'en avait tréjous tchitch'uns tchi restaient à travailli comme domestiques sus les fèrmes auprès la dêfouithie) parmi les naîssances, mais la grand' mâjorité 'taient des vièrs noms Jèrriais.

 

Dans les mathiages, sus sept i' n'y'en a qu' iun qué les noms du coupl'ye sont Jèrriais touos les deux, et jé n'sis même pon seux dé ch'la dans l'cas du mathié.

 

Tout chennechîn s'comprend quand nou c'menche à rêaliser tch'i' n'y'a qu'eune minnorité d's habitants actuels dé l'Île tch'est native dé Jèrri.

 

Eune chose tch'est frappante dans l'rapport du Chef dé la Police Salariée est l'nombre dé crînmes - quat' milles chîn chents trente-deux - en 1981. I' faut trais Juges dans La P'tite Cour à ch't heu. Quand j'tais Commis Vicomte en 1914 i' n'y'avait qu' lé Juge John Vaudîn à la présider, et ché n'tait pon souvent tch'i' ieûsse un cas touos les siex jours dé la s'maine. Et i' y'avait tout pliein d'run dans la prison à côté d'l'Hôpita. À ch't heu, il a fallu en bâti eune grande à La Mouaie à St. Brélade tch'est dêjà décliathée trop p'tite!

 

Eune aut' chose frappante dans la gâzette est l'prix extraordinnaithe tch'est payi pour des propriêtés. Quand nou pense, deux chent quarante mille louis pour lé vièr probytaithe dé St. Pièrre! J'ai 'té d'dans bein des fais quand j'allais porter un message au Révérend Francis de Gruchy quand j'tais ségrétaithe au Connêtabl'ye Francis Vibert Le Feuvre au c'menchement du siècl'ye. Lé probytaithe couôtit probabliément entre trais et chîn chents louis à bâti. Et trais propriêtés montrées dans la gâzette sont vendues pour pus dé deux chents mille louis châque. Des prix tchi pathaîssent riditchules à un vièr Jèrriais tch'a connu san Jèrri d'vièr temps!

 

Les fêtes pour les mousses ès Landes à St. Ouën n'étaient pon nombreuses, mais y'en avait pus qu'à ch't heu. Sans doute, la vie du mousse d'à ch't heu a pus d'divèrtissement qué l'chein d'l'année 1900. I' va à l'êcole en ville par la beusse ou par moto quand il a acouo les talons jaunes, et r'garde la télévîsion au sé. En 1900 un mousse marchait à l'êcole. I' n'y avait qu' les riches tch'allaient au collège en ville. Pon d'radio ni d'télévîsion. Ch'tait don un divertissement quand les soudards dé l'armée rédguliéthe v'naient pâsser tchique temps dans des tentes à soudards ès Landes pour tither au blianc. Il' allaient à l'Églyise dé St. Georges lé Dînmanche matîn, et nou-s-avait l'pliaîsi d'les vaie en rouoges câsaques.

 

I' y'avait les courses, étout. Ch'tait eune fête pour les jannes. Ch'tait ès courses qué j'mangis ma preunmié crème à la glace. Ch'tait un Italien tch'en vendait. Il 'tait habilyi tout en blianc et il avait un p'tit hèrnais à bein près grand comme eune cârosse à mousse. La glace 'tait sèrvie entre deux finnes galettes. Oulle 'tait faite auve d'la vraie crème et 'tait délicieuse et bein miyeuthe qué la cheinne d'à ch't heu. Jé n'mé r'souveins pon combein qu'ou couôtait, mais ch'tait raide bouan marchi, autrément j'n'éthais pon ieu l'mouoyen d'en acater.

 

Quand v'nait l'mais d'novembre y'avait la mûsique dé “Guy Fawkes” (“Fax” pour nous), tchi pratitchait touos les sièrs pour eune sémaine dévant l'arrivée du sé qu' nou-s-alleunmait la fouée pour brûler l'bouanhomme. La mûsique 'tait compôsée du gros tambour et des fliûtes. I' y'avait pus d'son qué d'harmonie! Lé Sieur George Steuber 'tait l'Chef dé Mûsique.

 

Hélas! Où'est tch'i' sont hors, ches bouans vièrs temps?

 

George d'La Forge.