2008: Lettre Jèrriaise

 Lettre Jerriaise Samedi L'5d'Aout 2008

 

Ch'est trejous un pliaisi pour mé Clifford Laisney d'vos présenté tchiques histouaithes dans ma premie langue, et ch't'occasion n'est pas a l'éxception.

 

A chutte saison d'l'année, auve les écoles freunmées cause des vacances d'été, hardi d'gens sonts en prépathation d'viaigi en cherche du solé et autres amusements. Tchi diffethence achteu a compathaitre es temps quand l'ile 'tait invadée d'touristes a chu temps d'l'année. Les routes 'taits remplyis d'môtos d'louage les locales announcaits lus chambres a loué et la ville et cafés faisaits un commerce robuste. Peut_etre cause de la recession du jour, et les temps d'insécurité de chés jours, j'erveth'ons une ernaissance du touriste.

 

Ch'est bein d's'années d'pits q'j'avons souffert la détresse causée par l'incident du feu tchu lieu a St. Pierre i'a tchinze jours. Ichin a St. Sauveu, j'viyais les nuauges de feunmée tch'iattaits, et tout d'abord j'Pensit que ch'tait un incident a l'aéroport. Ch'est impossiblye d'imaginer la detresse et minsèthe causée es habitants d'chutte pliaiche de logement et ch'est vraiment un miraclye que nul personnes souffrites aûtchunne bliesseuses en resûltat.

 

Dans chés temps quand un diffethent nuauge a couvert l'ile resûltat des nouvelles tch'onts d'cendu suivant les enchêtres a St. Martin, ches satisfant et erconnaisant de realisé qu'el peuplye s'est uni et v'nu au s'cours des gens affectées par la destruction et perte de lus possessions. Puis_que ch't'avarie servitha comme leçon et nos f'tha prendre toutes précautions envers la securité contre le feu. 

 

J'pense que ch'est impossiblye dans chés temps modernes d'értergi l'progrés, mais j'me d'mande si tout changements sonts pour le bénefice du peuplye et l's'envithons. J'vos mène au sûjet d'l'import d'insemination en orde de preserver et d'augmenter la vaque jerriaise. Pour passant deux chents ans, la vaque jerriaise a 'tait etablyie dans l'ile de Jerri. Aûtchun import d'aut race a janmais 'tait permins d'etre introduit en orde de preserver l'él'vage du pedigrée et la production d'lait. J'viyons dans les anciens portraits comme tchi qu'l'appathence de la vaque jerriaise s'est dév'lopée, grâce a l'intethet et l'él'vage le travers d's'années. L'ile de Jerri est rconnue comme la domicile et la pûre'té de la vaque, oulle est etablyie en toutes regions du monde. Dreinment, nos Etats, onts cédé a la pression d'une section d'él'veurs de bêtes, et dans lus sagesse, onts décidé d'permettre l'introduction d'import d'insemination en orde d'augmenter la production d'lait et d'introduithe du nouvieau sang a la race. J'me d'mande si ch'est une decision positif, ou ch'èst ti une démarche en arriere de tchi qu'nos d's'cendants regrett'rons le resûltat.

 

J'comprends qu'au mais D'Novembre quand l's'électeurs sonts vonts élithe une nouvelle assembliée d's'senateurs et d'Deputees, que j'allons etre demandées etout, par vote de signifier not préference envers changi l'heuthe pour etre au couoûathant d'l'heuthe Européanne, ou bein d'rester a l'heuthe d'aniet, l'heithe de Greenwich. Chiers auditeurs, tchi, comme mé borde sus la sethée d'lus jours a compathaitre de la matinée, lus r'appell'thons des jours de la dernié dgerre quand les forches d'otchûpation nos forchimes d'adopter l'heuthe centralle Européanne. Vos onts rapp'lous des longues sethées d'été quand nou travaillait dans les clios jusq'ua neuf ou dgiex heithes du sé, mais le matin ch'tait neuf heuthes devant qu'el jour se formé. Pensous tchi i'aûtha un avantage d'avanchi l's'houologes d'un heuthe? Tchi consequences tchi i'autha auve le commerce des batieaux, les avions, les programmes de radio et télevision, le commerce finnanccyi, les heuthes des mathées. Dans l'fond d'hiver les éfants sortithonts d'la maison pour l'école dans les tenêbres. La sole consolation que'je vait dans chés changements est que les gens d'Offices et d'commerce authonts pus d'temps d'louaisi. Pour tchi pas tandi qu'ji sommes de suggether que tout traffique suit le continent et adopte de condithe a la drouaite. Le Conmité d'Utilités et d'Transport est bein accouoteunmer a faithe des changements, un examplye etant le debaclye au Bel Royale, et d'même iun d'pus pour bouonne mésuthe ne f'tha pas grand difference.

 

J'vos r'mercie tous pour vot attention aniet. Ayiz tous une bouonne semaine.

 

A LA PRECHAINE.

 

Clifford Laisney