1981: Nou n'peut contenter tout l'monde

 Nou n'peut contenter tout l'monde

 

Trenton,

Michigan, U.S.A.

 

Lé 31 dé juilet, 1981.

 

Moussieu l'Rédacteu,

 

Lé porteux d'lettres veint d'êt' dé bouân tchoeu - i' m'a apporté trais gâzettes dé Jèrri chutte sémaine; les cheinnes du vîngt-chînq dé juîn respectivement. Ch'est drôle comme i' veinnent bigbichies d'même. Les 4 et 18 dé juîn n'sont pon en veue. Bouan Dgieu sait quand tchi tch'i' veindront! P't-êt' janmais. J'n'ai janmais r'chu les cheinnes du 13 dé novembre et du 31 dé dézembre, 1980. Tel est l'sèrvice încèrtain des bureaux d'postes d'nouos jours, ouaithe qué l'couôtement du “timbrage” hauchis d'pus en pus. Enfîn, les nouvelles dé Jèrri, r'chues tôt ou tard, sont tréjous les beinv'nues pour lé Jèrriais à l'êtrangi.

 

En liaîsant les gâzettes nou sé d'mande si y'a janmais des pèrsonnes tchi sont contents d'lus sorts et d'la vie, eune vie tch'est bein aîsie à compather à la cheinne du temps jadis. Par exempl'ye, en ouvrant la gâzette du 28 dé mai la preunmié chose tchi m'frappe est qu' les maîtres et maitrêsses d'êcole sont mârris viyant qué l'Conmité d'Êducation a jugi l'temps propice pour réduithe lus nombre en activité à cause tch'i' y'a mains d'êfants tchi vont à l'êcole. Ch'est r'mèrquabal'ye qué châque fais qué l's autorités veulent faithe tchiquechose pour lé bein du publyi, i' y'a d'l'oppôsition par les gens tchi dév'thaient les loûser à la pliaiche dé l's oppôser. Ch'est probabliément un trait d'caractéthe tch'est dans l'sang du monde entchi, car ch'est la même turlutte ichîn en Améthique étout.

 

J'tais content d'vaie l'portrait, chutte fais souôriant, du Sieur Réné Liron sus la preunmié page dé la gâzette du 25 dé juîn, et d'liéthe tch'il est satisfait d'l'arrangement d'payi la hauche dé douze pour chent d'gages à la main d'oeuvre des Êtats. Mais j'mé d'mande si ch'est à cause dé la hauche tch'il est souôriant, ou si ch'est tch'il est content d'vaie qué v'là tchi s'en va faithe lé Trésoryi d'Jèrri dêbourser un million d'livres stèrling? Tchi chance tch'il' ont, les travailleurs des Êtats! Eune hauche dé gages touos l's ans, un empliai cèrtain en temps d'plyie, d'né ou solé, et des vacanches payies! Ch'n'est pon l'pouôrre dgiâtre d'fèrmyi tch'est à négrer sa vie à l'înjuthe du temps tch'a chutte chance-là, et ch'est pourtant li tch'a contribué à chu millions d'louis qué L's Êtats s'en vont lus donner. Et les travailleurs des Êtats n'pathaissent pon rêaliser qué toutes les hauches dé gages, pon seulement les leu mais les cheins tch'en ont (j'allais quâsi dithe “tch'en gângnent”!) sont en grand' partie la cause du hauchissement du couôtement d'la vie pour tout l'monde.

 

Lé fait qué l'tourisme a souffèrt ch't année n'm'êtonne pon. Y'a longtemps qué j'm'attendais d'vaie chutte catastrophe. V'là tch'a prîns du temps à s'montrer, mais comme nouos l'dit l'vièr diton: “La fîn du temps f'tha tout vaie.” Sans doute, quand nou vait chein tchi couôte à viagi par avion ches jours, et chein tchi couôte à pâsser eune niet dans eune hôtel, sans pâler d'tchînze jours, nou sé d'mande comment qu' pèrsonne peut affaûrder des vacanches.

 

Chein tchi m'êtonne est d'vaie qué la m'niche dé la pèrte à v'nîn de tourisme n'empêche pon l'bâtissage d'additions d'chambres et d'bains dans l's hôtels et maîsons d'pension, et qué l's autorités continnuent à bâti des maîsons - 35 acouo d'pus à côté d'La Rue Trachy. Et pis y'a acouo la tragédie d'înnonder La Vallée des Moulîns, mênommée “Queen's Valley”. Et j'tais surprîns d'vaie qué l'Sénateu d'Carteret a entanmé la tchestchion d'aver d's expèrts dans l'tourisme v'nîn dithe ès Jèrriais tchi faithe pour agrandi l'conmèrce en 1982. V'là tchi couôte, d'aver du monde à v'nîn adviser les Jèrriais - tchi s'y connaîssent d'habitude bein mus qu' ieux - et i' n'est pon bésoin d'aver des leunettes pour vaie qué l'couôtement d'la vie, du transport, et l'mauvais temps sont la cause du manque dé touristes.

 

J'fais bein content d'vaie l'portrait du Député Edgar Bétchet dans la gâzette du onze dé juîn, et d'vaie tch'il est întérêssi d'saver tchi faithe dé la biblyiothèque actuelle dévant en bâti eune neuve. À m'n idée, ch'est ieune des pus belles biblyiothèques qué j'aie veu dans un p'tit pays, la vielle dans L'Vièr Marchi, et j'espéthe tch'i' s'en vont faithe en sorte qu' ou s'sait prêsèrvée en tchique sorte d'fonction qué l'publyi étha l'opporteunité d'y entrer et d'joui d'la bieauté d'la lueu des vèrrinnes couleuthées d'san “dôme”. Ch'est seux qu'la proposée nouvelle biblyiothèque né s'sa pon si pliaîsante, et ou n'étha pon san cachet distînctif. Ché s'sa eune aut' affaithe d'architectuthe fonctionnaithe pûtôt qu' “esthétique”!

 

George d'La Forge.