1982: Aux armes, Jèrriais d'race

 Aux armes, Jèrriais d'race

 

Trenton,

Michigan, USA.

 

Lé 24 d'avri, 1982.

 

Moussieu l'Rédacteu,

 

Si nouot' langue Jèrriaise mouothit dans la gâzette du preunmyi d'avri, ouelle à èrsuscité dans la cheinne du huit d'avri, tchi veint d'arriver. Mais, sans droute, oulle est bein liain d'êt' morte quandi qu' j'avons des pèrsonnes comme lé Docteu Fraînque Le Maistre, lé Juge Lucas, le “Jersey Evening Post” et Madanme Eileen Le Sueux à combattre ses enn'mîns. Et i' n'faut pon oublier Moussieu Ph'lîppe Maugi de Veulle et L'Don Balleine et L'Assembliée d'Jèrriais.

 

J'dév'thais mentionner La Société Jersiaise étout, mais j'crains qu' ou n'est pon hardi întérêssie [...] nouot'  langue, ouaithe qué j'sai bein qué Moussieu l'Député Bailli Crill, san Président et bouân Jèrriais, es'sait bein content dé supporter autchun mouoyen qu' La Société pouôrrait entréprendre pour la garder en vie. Ch'tait întérêssant d'vaie tch'i' d'mandit à l'assembliée annuelle générale combein des membres présents pouôrraient convèrser en Jèrriais. Probabliément pus qué quat' ou chînq, mais ch'est à bein près seux tch'i' y'en avait pus quand-même si y'avait des vièrs membres présents.

 

Ch'tait mangnifique dé vaie l'protêt d'Moussieu de Veulle et l'discours dé Moussieu Maurice Richardson en d'fense dé la vielle langue. Moussieu Richardson eut l'couothage dé dithe qué ch'tait triste d'aver à admettre qué La Société avait néglyigi d'faithe autcheune chose pour sa présèrvâtion avau l's années.

 

La r'mèrque dé Moussieu Crill au sujet d'la langue Portûndgaise est sîngne tch'i' y'a assez d'gens d'Portûnga en Jèrri pour prendre avis d'lus présence et d'lus înfluence dans la vie d'l'Île. J'ai r'mèrtchi qu' nou parmi les naîssances, mathiages et décès. Iun d'ches jours nou-s-en vèrra p't-êt' iun ou deux dans L's Êtats!

 

Enfîn, ch'est mangnifique dé vaie l'portrait d'la Salle Publyique dé St. Martîn plieine à l'occâsion du concèrt organîsé par nouot' fanmeuse anmie Eileen Le Sueux. V'là tchi montre qué la vielle langue Jèrriaise a acouo d'la vie dans l'corps. Et j'sis bein content d'vaie qué la couôsinne Audrey Lucas est r'vénue en Jèrri et qué san séjour en Angliétèrre né l'a pon faite oublier sa langue natale. Ch'n'est pon comme lé Cannadien-Français Jean Baptiste Trudeau, natif dé la Provînce dé Tchubec au Cannada. Quand il 'tait janne, i' s'mîns dans la tête d'aller chèrchi forteune dans L's Êtats-Unis d'Améthique. Êrvénu vaie san lieu d'naîssance en Tchubec tchiques années auprès, ses gens allîdrent à sa rencontre à la stâtion du “train”. Sa fanmil'ye et eune dgaîngue d'anmîns lî fîdrent la beinv'nue en Français d'Tchubec, mais i' l's arrêtit tout court et lus dît tch'i' n'pâlait pus comme ieux, qué ch'tait en Angliais tch'i' pâlait à ch't heu et qu' san nom n'tait pus Jean Baptiste Trudeau - ch'tait Mr. John B. Waterhole!

 

Mais r'vénant à la tchestchion d'prêsèrver l'Jèrriais. Dépis tch'il est connu qu' la maintchi d'la populâtion d'l'Île a 'té née hors-pays, et qu' les pathents n'font pus lus mousses pâler l'Jèrriais, ch'est bein seux qu' la langue est en dangi du trépas prononcé par Moussieu Crill. Mais si Madanme Eileen a l'temps et couothage d'organîser plusieurs concèrts comme ch'tî-là à St. Martîn, v'là tchi r'tèrgétha s'n entèrrement tch'étha probabliément lieu à St. Ouën, comme j'l'ai souvent pensé. Heutheusement, j'né s'sai pon là à la vaie, ch't' entèrrement. Mais grâce au Docteu Fraînque Le Maistre ou vivra dans les biblyiothèques dé la Nouormandie et de bein d'aut' pays pour lé bénéfice des êtudiants lînguistiques tchi lî donn'nont eune nouvelle vie.

 

Ieune des choses tchi m'a fait pliaîsi à liéthe dans la gâzette du preunmyi d'avri est qué Moussieu l'Bailli a dêcliathé qu' l'Assembliée du Gouvèrneur, Bailli et Jurés est d'avis tch'i' y'a assez d'aubèrges en Jèrri. À m'n idée, y'en a bein trop! Mais ch'est encouothageant d'vaie qué l's autorités c'menchent à garder l'nombre à bas.

 

J'avais r'gret d'vaie qué Moussieu l'ex-Connêtabl'ye John Richardson d'La Trinneté et sa danme ont 'té bliessés dans un accident dans lus moto. I' fallait qué ch'fûsse un mauvais accident pour qué Madanme Richardson eûsse la gambe rompue. Nou n'aime janmais vaie d'bouans anîns estropiés d'même, et j'lus souhaite dé lus r'faithe comme i' faut au pus vite.

 

J'vai qué cèrtains membres d's Êtats sont à consilyi d'aller douochement quand veint tchestchion d'haûchi les gages d'empliyés. Comme ichîn en Améthique, à mains qu' chu hauchement d'gages n'apporte un hauchement productif, ch'est un couôtement destructif dans un conmèrce compétiteu. Ch'est bouân sîngne dé vaie qué L's Êtats lus en d'mentent.

 

George d'La Forge.