1963: Un jour d'Êté

 Un jour d'Êté

Ph'lip va ès courses

 

à Portinfé,

Saint Ou.

 

Moussieu l'Editeu,

 

Oh mais, tchi bieau jour agniet! Vraiement, le preumié jour de l'êté! Si j'avais yeu même vîngt ans d'mains, j'éthais 'té d'hors à jour et j'n'éthais pas rentré sinon pour mes r'pas, quand j'n'éthais pas peut y vaie. Tchi malheur, Moussieu, d'être si faillyi de n'pouver pas seulement sorti d'la maison du temps tchi fait! Dehors les ouaisieaux chantent à lûs câsser la gorge et toute la natuthe se rêjouie. I' n'y a que le pouôre vièr Ph'lip tch'est, comme nou pouôrrait dithe, en prison. La Merrienne, tch'est ocquo solide sûs ses gambes, a pâssé san temps dans l'gardîn, et j'l'ai entendue plusieurs fais se sérvi de langage, en d'mandant à la Providence de dêtruithe les taupes, que j'si seux que nou n'trouv'thait pas dans autchun dictionnaithe respectablye. I' pathaît que l'bieau solé a fait les sales bêtes deshaller en mâsse. Comme ou s'fait, “ch'n'est pas seulement les pèthes et les mèthes, mais un fliantchet d'mousses, sans compter les couôsins et tout l'restant d'êtchu!”

 

Dans ma bordeuse les patates s'enviennent à ch'teu', et nou pouôrrait les houetter mais, quant à mé, j'n'en ai pas la forche, et la Merrienne, têtoigne qu'oulle est, r'fûse absolûment de s'y mettre.

 

À ch'teu, Moussieu, pour la Visite Royale le djix du préchain mais. Sav'ous bein que j'ai souvent pensé que quand des royautés nos font l'honneu de v'nîn nos vaie, nou f'thait bein mûs de les laissi à yeux-mêmes un mio pûs. Ch'n'est pas un pliaisi pour yeux d'aver tout lûs programme arrangi, d'aver à châtchi d'main avec des chents personnes tch'i' n'ont jamais veu et tch'i' ne r'vêrront jamais, et d'être forchis d'aller ichîn et là tout l'jour dans des parties d'l'Ile tchi sont bein lyien d'être les pûs belles, et tout l'temps d'aver un souôrit sûs lûs visages et, j'n'en doute pas, des maledictions dans lûs tchoeu. La Merrienne dit qu'oulle aim'thait mûs être gratteûse de route que reine d'Angliétêrre et, sûs un sens, oulle a raison.

 

Y'a bein d's années, quand le rouai George et sa reine vîntent nos vaie, j'avais 'té à la Cour Royale le samedi pour être assermenté comme un “Special Constable”, et tout l'jour d'la visite j'tais à patrôler un but d'route ichîn à Saint Ou pour laissi le qu'mîn cliait pour la longue procession. I' faisait une chaleu abominablye, mais je n'pouvais pas bouogi d'man poste pour aver une fais à bèthe à l'auberge et, Moussieu, j'fus près d'en crever.

 

Mais y'a ocquo des compensâtions dans la vie, même pour un homme de m'n âge, car lundi pâssé yun d'mes bouons vièrs amîns vînt m'cherchi dans san auto pour aller ès courses à Grosnez. Il est vrai, Moussieu, que l'temps était bein fraid, mais i' s'y trouvit du monde, et, étant à l'abri, car je n'sortis pas de l'auto, j'n'enhannis pas du tout. J'eus un mio d'chance étout, car le bidet sûs tchi que j'éthais mînt mes chînq ch'lîns éthait 'té mûs ès Abattoirs. J'ai tréjous 'té pour les bidets, mé, Moussieu, et une bordée, ès sports sûs l'Mathais, j'avais entré un ânon tchi m'avait 'té prêté par un vaisîn. I' l'avait garanti trantchille, mais i' n'm'avait pas dit un mot d'la vilaine habitude tch'il avait quand i' s'trouvait parmi d's ânes. Y'en avait d'autres tchi n'sé comportaient pas, le r'sultat en étant qu'après ch't' année là les ânons restaient siez-yeux.

 

I' pathaît, par chein qu'a 'té dit dans la "Post", que Jêrri n'a pas yeu autant de visiteurs comme de couôtume à Pâques. Ch'est de mauvaises nouvelles pour le Comité du tourisme, car nou-s-avait ouï tch'ils en attendaient pûs que jamais. Mais j'somme d'accord, la Merrienne et mé, que j'en éthons bétôt pûs que j'n'aimthaîmes en vaie et que y'étha pûs de trafic sûs les routes d'la Ville, et même d'la Campagne, que jamais.

 

Quand à nos nouvelles patates, la gâzette nos dit qu'en Angliétêrre y'a ocquo tout plyien de vielles patates et que y'étha hardi d'compétition de plusieurs parties du monde tchi s'vendront à pûs bas prix que nos Royales. Ch'là s'peut, Moussieu, et nou n'peut pas l'contredithe, mais, comme de l'ai dit bein des fais, et j'en si ocquo seux, i' n'y a pas une nouvelles patate, quande ou veindrait d'la Chine ou du Japon, tchi peut touchi, en matiéthe dé qualité, à la Royale, tch'a 'té pour si longtemps le maintchein de notre prospéthité. J'en avons dans les djais-huit milles vrégies ch't' année, et je n'peux pas les vaie données ès couochons. Nou-s-étha des bétchets à vendre, si nos fermiers éthont autchune diffitchulté à dispôser de chein tch'ils ont, mais si j'tais yun d'yeux j'dormithais ocquo trantchillement de niet. Il est vrai que j'eûmes une raide obgelée à la fîn d'la s'maine pâssée, mais ch'n'est pas comme si j'n'avions pas veu chonna d'vant bein des fais dans l'pâssé, et nous et nos patates nouvelles j'sommes ocquo là.

 

Nou n'éthait pas creu, par le temps que j'eûmes l'année pâssée, que j'éthions yeu pûs d'heuthes de bieau solé que Djernézi, et hardi pûs que l'ile d'Orgny, mais les chiffres officiels le prouvent, et nos visiteurs peuvent s'attendre à tchiquechose même miyeu ch't' année, si la Merrienne a raison quand ou dit que j'allons souffrit des grandes chaleurs après avé 'té si punis par la fraid ch't' hivé. Ou peut s'tromper tchiquefais, la bouonnefemme, mais par bordée ses prédictions n'en sont pas d'lyien.

 

Assez pour chutte semaine, Moussieu, et j'espèthe que chein que j'veins d'vos dithe ne s'sa pas sans intéthêt.

 

Ph'lip.

1963