1964: Ph'lip a 'té au liet

 Ph'lip a 'té au liet

Les bouonnes résolutions

 

à Portinfé,

Saint Ou.

 

Vendrédi au sé.

 

Moussieu l'Editeu,

 

Comme sans doute ou-s-avez entendu, j'ai 'té au liet pour pûs d'une semaine, et ch'est à ces sé, pour la preunmié fais, que j'ai peut me l'ver pour vos êcrithe chais tchiques lignes. Un mio à la fais, je ravigotte, et j'espèthe dans tchiques jours de pouver dêshaller d'hors pour deus-trais minutes pour prendre l'air, car nou n'prend pas hardi d'forches enfreumé dans une chambre et incapable de s'faithe servi d'ses gambes. Mais, enfin, j'vais sûs l'mûs un mio et j'ai décidé d'vos êcrithe pour vos souhaiter, et à tous concernés dans la publicâtion d'la “Post”, tout ch'que y'a d'miyeu dans l'année tchi veint de qu'menchi.

 

Ou-s-allez être intérêssi, Moussieu, quand j'vos dithais que j'me r'souveins d'aver accaté l'preumié neunmétho d'la gâzette. I' m'couôtit un sou, et i' n'y avait pas grand'chose déssus. Pour dithe la véthité, nou n'criyait pas qu'ou s'en allait duther longtemps, mais grâce aux Sieurs Guiton et Tchéthée et l'restant des travailleurs, ou pâssit à travers des mauvais temps, et oulle a cru, année par année, à la gâzette que j'avons à ch'teu', et de tchi que je n'pouorrâimes pas nos pâsser, et de tchi étout que l'Ile est bein ordguilleuse. Oulle a prospéthé comme jamais n'ou n'éthait peut craithe, et agniet oulle est autant yunne de nos institutions comme l's Etats et touos les comités mints ensemblye.

 

Ch'est la saison, Moussieu, pour des bouonnes rêsolutions. N'ou dit que les rues de l'enfer en sont pavées, et, si ch'est d'même, j'avons, sans autchune doute aidgi, la bouonnefemme et mé, car touos l's ans j'en avons fait, mais, la maintchi du temps, j'les avons négligies ou oubliées. J'm'en vais vos donner un exemplye. Quand j'nos décidîmes de nos mathier, la Merrienne et mé, j'n'avions pas l'sou. Mais l'couothage ne nos mantchait pas, et je décidîmes d'prendre une p'tite ferme et de travaillyi bein dû pour la faithe payi. J'décidîmes étout de n'aver pas d'famille pour au mains chînq ans. Eh bein, Moussieu, j'trouvimes la ferme, et j'nos mimes en travas, mais quant au restant, au but d'neuf mais le Bram appathut, et pour une djaizaine d'années après il en r'vint un autre, tchiquefais un garçon, tchiquefais une fille. Je n'm'en vais pas prétendre que j'n'en savais pas la cause, mais ch'est pour vos montrer que les bouonnes résolutions sont souvent des mêprinses, et qu'nou pouôrrait s'en pâsser.

 

Et nos fermiers - tchèsqu'est lûs prospect pour l'année tchi veint de qu'menchi? Tout ch'que n'ou peut lûs vouler, ch'est une miyeuthe année que la sienne tchi veint de pâsser car ou n'peut pas bein être pièthe. Mais j'si persuadé, quand-même, que l'fermyi tchi soigne à san travas et tchi garde d'bouonnes bêtes finitha tréjous du bouon côté car si le jour v'nait que la terre ne payait pas, i' n'y éthait pas grande espéthance pour notre p'tit Jèrri.

 

À bétôt, Moussieu, pour agniet.

 

Ph'lip.

1964