1955: Rêunion Mensuelle

 L'ASSEMBLIÉE D'JÈRRIAIS

Rêunion Mensuelle

 

La rêunion mensuelle eut lieu Vendrédi au sé, lé 29 d'Avri, 1955, dans la Salle d'Agritchulture, St. Hélyi, souos la présidence du Connêtablye S. G. Crill. Ch'tait la preunmié fais ch't année qué not' Assembliée s'tait rêunie dans son locale ordinaire, et i'y avait à peu près eune nonantaine dé membres présents.

 

D'vant c'mmenchi l's affaires sus l'agenda, lé Président dit comment qu'i' 'tait heûreux dé faire la beinv'nue à Moussieu Gilles Lefebvre, Professeur dé l'Université dé Montréal, qui 'tait parmi nous. Il est v'nu actuellement pour faire des êtudes dé not' vielle langue Jèrriaise.

 

Nouvieaux Membres

 

Dévant nommer les nouvieaux membres, Moussieu Lefebvre fut êlu Membre d'Honneur dé not' Assembliée. Les aut' membres êlus sont: Lé Sieur St. John Cabot et Madame Cabot, Mme Harold Billot, Mlle May Deslandes, Mme Hilda Moon, Mme Dorothy de Gruchy et Neville de Gruchy (membre junieur).

 

I' fut annoncé qué les règles dé L'Assembliée - en forme dé p'tits livres - ont 'té imprîmées. I' sont prêtes à distribuer, et touos les membres sont priés dé s'en protchurer.

 

Excursion

 

Lé projet d'aller en France en excursion lé 23 juin fut distchuté et quaique ch'est eune saison difficule pour les fèrmiers, i'y a un nombre dé membres qui sont prêts à en profiter. N'ou's éra les détails pus tard.

 

Divèrtissements

 

Lé Sieur Ph. Ahier, B. ès S., nos donnit un discours, ayant eune liste dé mots en usage à Yorkshire, en faîsant des comparaisons bein intéressantes avec nos viers mots Jèrriais - des mots, des noms et des plièches ayant la même prononciation. Il en avait toute eune collection et n'ou's érait voulu en entendre pus long, mais l'temps ne pèrmint pas.

 

Ensuite suivit des provèrbes mêlés. Nos gens c'mmenchent à s'y r'connaître, car ils y rêponnîtent hardi vite et vivement.

 

J'eûmes eune fanmeuse lecture par Mme Green entîtulée “Lé Poddin”, et écrite par “J. P.” Ch'tait eune vielle histouaire du temps des grandes tcherrues - bein risiblye! Pour suivre, lé Sieur Winter du Tot nos liut eune pièche appelée “La Vendue”, par Bram Billot.  I' nos montrit comment qué n'ou peut êt' trompé en acatant des bardgins, et i' nos apprint la milleu' manière dé s'en dêbarrasser!

 

Professeur Lefebvre

 

Pour fini' la sérée, lé Président d'mandit au Professeur Lefebvre dé nos addresser tchiq' mots. En exprimant l'pliaisi qu'il avait dé s'trouver parmi nous, i' nos ermèrcyit profondément dé l'aver nommé Membre d'Honneur.

 

Il avait fait des r'chèrches dans not' langue Jèrriaise, et il avait prins des r'cords étout pour rattrapper les accents différents dans les pâraisses. Avec sa machine à r'corder, i' nos en donnit des exemplyes. N'ou's espère lé r'vaie pus tard, quand i' r'veindra en Jèrri.

 

Lé Président ermèrcyit lé Sieur Ahier, lé Professeur Lefebvre, et l's autres membres qu'avaient contribué au succès dé la sérée, et il annoncyit qu'i' n'y érait pon d'rêunion au mais d'Mai, viyant qu'i' avait tant d'membres réprésentés dans les séances dé la Parade à Springfield.