2012: Lettre Jèrriaise

 Lettre Jersiaise Lundi l'5 de Mars 2012

 

Aniet L'5 de Mars 2012, et ch'ést un plaisi pour mé Clifford Laisney d'vos présenter un p'tit discours dans ma premier langue.

 

I'a tchiques semaines l'idée m'print de prendre une viste a la vendue a l'encan a Glencoe dans La Paraissse de St Louaithains. Telle vendue s'passe chaque Mercredi d'chaque semaine. L'encanteu tait l'Sieur Drieu, un gas bein versé dans son mêtchi, et portant la vouaix nécessaithe pour le travas.

 

Etant que j'navaits autchhunne intention d'acater, j'en me troubjis pas d'engristrer, une chose nécessaithe aujourd'aniet si nou's a intention d'faite des achâts. Malgré toup, j'n'ertouoni pas a la maison les mains viedes, car j'happi une soaie d'fraid tchi ma boulverser d'pis. Je sethas tchiques temps devant que 'je prends ma prechaine visite.

 

Quouaiqu' iavait une foule raissonablye, duthant les deux s'heuthes que j'taits la, j'n'entendis pas un mot dljerriais, et même j'vit que deux personnes que j'connaisaits. Pas coumme dans l'temps passer quand tout qu'nou s'entendait 'tait l'cactage de jerrriais, et même l'encanteu érpeter les offres en jerriais a coté d'l'angliais.

 

La vendue même a changi complietement au temps passé. Une grand portion d'la vendue consiste de vetûthes de s'conde main, materieaux et meublyes. Dans l'temps passé i'avait trejous du bestchias, fourcées d'cououchons, toutes sortes d'volaille, lapins etc. Et pis l's'éffets d'ferme. Hernais a C'hva, Tchêthues a touounner, a Brisi et Plianter, Vannes, une assortiment D'ôtis, Becques, Frouques, Houettes, autchun ôti d'fermage, et i'avaît trejous un acateu pour n'importe.

 

Le Sieur Maillard tchi prennait cherge des vendues dans chés temps la conaissait tuous les fermiers, et ch'tait rare de l'entendre d'mander l'nom et addresse de l'acateux. Hardi d'compagnards prennaits l'opportunité d'suivre les vendues en ordre de rencontrer lus anmins et d'rejoui d'un bouon cactage. Tellement 'tait l'cactage, que i'avait d's'occasions quand l'encanteu 'tait forchi d'applé 'SILENCE' en orde de pouver continnuer la vendue.

 

Autrement qu'les vendues collectives, i'avait etout les vendues d'fermes quand un fermyi tchittait l'fermage cause d'ertithage ou autrement. La vendue authait 'tait announcée dans la Gazette du Se, et acquo ch'tait l'occasion pour les compagnards de lus reûni en conversation, distchutons les differents lots a vendre. Normallement, a la fin d'la vendue, l'encanteux et s'n'adjoint authaits joint la fanmillye dans un r'pas prépathé pour l'occasion.

 

Etout, i'avait les p'tites vendues d'saison. Les vendues d'patates, rachinnes, et d'fain par la vregie, les maies d'funmyi d'cont'nu d'la cieterne d'épu et les tas d'vrai sé. Même i'avaît les vendues d'meublye en maison. J'em rappelle d'une vendue envers l'année 1950. Ch'tait une vendue d'meublye tcu lieu dans une maison a Léoville. L'encanteu 'tait l'Sieur Edgar Benest. La maison 'tait remplyie d'gens, telle en fut qu'les poutres suous l'plianchais écroulites resultant que l'meublye, gens et l'Encanteux fites une descente de dgies huite pousses dans les fondations personnes fûtes bliéssés mais heutheusement ch'tait pas l'étage des chambres car le resûltat authait tait different.

 

Aujourd'aniet, nou'n vé pas d'vendues d'ôtis d'ferme. Etout les vendues d'meublye de maison a l'encan n'sonts pus. Ches les commerces de boutiques s s'conde main ch'onts profites, la majorité d'ieux supportants des charités. Pour examplye, la boutique de vente 'Jersey Hospice' est bein erconnue pour ses conteurs divers de toutes sortes choses d'utilité pour la maison ou le d'hors. Toutes articlyes sonts données la majorité d'assistants donne lus temps volûntaithe et tout profit aidge a sout'nin une charité si significante et bein faisante es malades.

 

Achteu une announce consernant L'Assembliée d'Jerriais. Le Diner Annuelle autha lieu Dinmanche le 25 de Mai a l'Hotel Ambassadeur. Titchets !17 peuvent etre ob'tins de Mde Anne Herod. Tel 855196.

 

J'vos r'mercie pour vot attention aniet. J'vos souhaithe a tous une semaine heutheuse, bouonne santé et remplyie d'joueix.

 

A LA PRECHAINE

 

Clifford Laisney