1955: Rêunion Mensuelle

 L'Assembliée d'Jèrriais

Rêunion Mensuelle.

 

 

La rêunion mensuelle eut lieu à 7½ heuthes, Samedi au sé, lé 19 Mars, 1955, dans la Salle Parouaîssiale dé la Trin'té, souos la présidence du Connêtablye S. G. Crill. I'y avait un bouan nombre dé membres présents quand la rêunion c'mmenchit, mais il en arrivit d'autres pus tard. Lé rapport dé la rêunion du 25 Févri fut liu, approuvé et adopté. La Sécrétaire Assistante (Mme Amelia Perchard), rempliaichit la Sécrétaire, qui, pour la première fais d'pis longtemps, fut empêchie d'êt' présente. Lé Président dit qu'il espérait la r'vaie à la préchaine rêunion.

 

Nouvieaux Membres.

 

Les nouvieaux membres êlus à chutte rêunion sont:-

 

Lé Sieur Edward Le Quesne, Mlle Myra Godeaux, Mlle Janet de la Haye, Mlles C. Holt et M Holt, Doreen de la Haye et Francis H. Amy (deux membres junieurs), Mme A. Dorey, lé Sieur Henry H. Nicolle et Mlle M. Le Breton, lé Sieur Eugène Perrédès et Mme Perrédès, lé Sieur Harold Billot, Mme Cecilia Ahier et Mlle Lilian Godeaux.

 

La Parade au mais d'Mai.

 

Lé Président annoncyit qué l'Comité Dramatique a bésoin d'aide pour la Parade, au mais d'Mai, et si, parmi l'Assembliée y avait des pèrsonnes qu'avaient envie d'y prendre part, i' n'avaient qu'à donner lus noms au Comité.

 

 

Photographes.

 

Lé Sieur J. W. Le Breton avait r'chu des photographes dé Le Moignan et Gower, prins au dîner et i' les présentit au Président comme cadeau dé lus part. Ils espéthent qu'i' pourront faire la même chose chaque année et en mèttant touos les portraits ensemblyes dans un livre, ché s'rait un fanmeux souvenir des dînièrs dé l'Assembliée.

 

Préchaine Rêunion.

 

Lé Président annoncyit qué la préchaine rêunion mensuelle éra lieu lé 29 d'Avri, dans la Salle d'Agritchultuthe. Il est temps dé r'continuer nos rêunions en ville.

 

Jeux d'Cartes.

 

A 8 heuthes, lé Sécrétaithe du Comité Social, lé Sieur J. W. Le Breton arrangit les 29 tablyes dé “Whist”, et mins l's affaithes en marche. Comme d'amors, tout fus sus rouôlettes. L'Assembliée a la chance d'aver un Maître dé Cérémonies comme l'i, car i' s' dêvoue sans compter sa peine.

 

Quand vint l'intèrvalle, i' y avait eune punition pour l'homme pèrdant à chaque tablye. I' fut forchi dé sèrvi les raffraîchissements. Les dames en profitîtent et i' y eut bein du catchet, mais i' faut dithe qué l's hommes en r'pathîtes tout à fait bein et sans accidents!

 

A la fin des jeux d'cartes Mme Crill eut la gentilesse dé présenter les prix ès gagnants. I' y en avait des biaux, d's utiles et d's tchuthieux étout. I' fallait les vaie!

 

R'mèrciements.

 

Dévant s'n aller, lé Connêtablye S. G. Crill offrit ses r'mèrciements au Connêtablye J. E. Cabot pour l'usage dé la Salle, et au Comité Social, qui s'tait dêvoué occouo eune fais, dans la manière capablye qu'ils avaient organisé la sérée.