Lettre Jersiaise Dinmanche le 14 Juillet 1996

  Bouon-jour a tous, chés Clifford Laisney tchi vos presente la lettre jerrsiaise aniet Dimanche le 14 Juillet 1996.

 

Lettre Jersiaise Dinmanche le 14 Juillet 1996

 

Premierement une announce envers L'Assembliée d'Jerriais.

 

La prêchaine reunion aura lieu Vendredi le 26 d'Juillet. La venue est Brantwood St. Martin, la domicile de Brian et Joyce Gilbert.

 

La reunion prendra la forme d'un Pique-nique dans l'gardin et y'autha plusieurs divertissements. Ous'etes priés d'apporter vos tchaises et du mangi que je s'sait pour vous-même ou sharer a tablye. Habillious sensiblement et en cas d'mauvais temps, la reunion setha dans la Salle Publique de St. Martin.

 

Prennais avis, la sethée c'mmenctha a 6.30, pas 7.30 comme announcer sus les cartes.

 

Dans l'calendrier francais le 14 Juillet est d'grand significance car chés la celebration d'la Fête de la Bastille, le c'mmenchement d'la Revolution Francaise en 1789. Dans l'temps que les ouvriers francais v'naits en Jerri pour defoui les patates j'tais bein important que tuous travaux fusse finis en temps pour ieux ar'tourner siez ieux pour celebrer la Fête de la Bastille.

 

Dans l'temps que chaque fermi soignait une dgiexiene de vaques et craissait trente a quarante vregies d'patates, ch'tait bein important d'aver d'la bouonne main-d'oeuvre pour la saison tchi 'tait l'principa gagne-pain, car dans chés temps, l'aidge des Etats 'tait inconnu, et dans d'mauvaises années ch'tait pas inconnu d'vait un fermi alles souos l'fou.

 

Dans hardi d'cas les ouvriers ertournnais a la meme ferme année auprés année, meme i v'nnaits presque partie d'la fanmillye.

 

Auprés aver prepather lus accomodation pour la saison nous aller les rencontrer sus la cauchie. Ch'tait un centre de grand activité et excitement auve hardi d'catcher. Les uns arrivaits ayant bein rejoui d'une bollée ou deux d'trop dûthant l'passage, les uns apportaits lus faux, et i 'taits trejous chérgis d'provisions, beurre, lard sallé, pain etc. Tout ch'la gardait l'armouaithe remplyie pour plusieurs semaines.

 

Devant c'mmenchit la tâche, ch'tait l'contremaitre d'la d'gainge qu'allait siez l'tchîncailli pour choisi la froque tchi 'tait si nécessaithe. Une froque auve un bouon plier et quatre panniers etait tout l'nécessaithe pour la saison. J'em trompe, un engin n'peut pas courre sans petrole, et patheilment un homme peux pas travaillyi sans bouaisson, et s'il patron n'avait pas une barrique ou deux d'cidre fallait aller en cherchi, et dans chu cas fallait payi une visite siez marchant d'cidre. Auprés aver gouoter de plusieurs bathis i faithaits lus choaix.

 

Normallement le fermi arrangeait auve le tacheron un prix chaque vregie pour défoui, élopper et glianer les patates, et s'il tacheron 'tait d'accord de donner un coup d'main a chergi, un louis ou deux d'extra la vregie. En c'mmenchant a chinq heuthes du matin travaillions j'usqua huit heuthes du sé, une etchipe tchi fouissaits 25 a 30 perques par jour n'avaits pas passer lus temps coucuchits a l'ombre une partie d'la journée.

 

Ch'tait trejous un spectaclye quant une cliosée d'patates avaits 'tait defouis, de vaie les vignes en riolles, la terre meublye en arretant pour la prechaine recolte.

 

Une fais la saison d'patates finie, fallait fauchi et rentrer l'fain, et acquo une fais ch'tait un travas entreprins a la tache. Un prix 'tait accorder pour fauchi et faggoter, et j'vos assuthe que dans l'temps passé le solé avait pus d'forche qu'achteu, et ch'tait une teuthie quand nou 'tait a tasser l'fain dans l'solyi souos s'ardouaises.

 

J'em rappelethait trejous d'un couplye que j'avaits a m'aidgi quand j'tais en ferme. Y s'appellaits Yves et Yvonne. Y vintes pour bein d's'années et chaque fais ils arrivaits chergis d'provisions. Y travaillaits comme des escliaves, et allaits en ville une fais seulement duthant l'temps tch'il 'tait en Jerri, et ch'tait pour la seule raison d'changi lus sou d'vant ertourner siez ieux. Le seul luxe que Yvonne permettait a son bouon-homme etait d'fumer, et l'pourre Yves vivait auve une cigarette entre les leves, souvent eteinte.

 

Devant r'tourner siez ieux, fallait trejous faithe seux que tuous les fossées en d'dans et en d'tors de chaque clios 'taits taillis, et bein important étout qu'el branchage de routes etait fini. I'n y'a que l'ouvryi francais tchi sait affiler une faux ou faucilye et faut etre expert pour battre chés otis tchi copaits comme des rasêurs.

 

Am'sûthe que l'temps s'avanche les affaithes changes, et en toutes choses j'avons moderniser not vie accordons a not choaix. Les pus anciens tc'écoutes a matin ont vêtchu dûthant un temps de changements immense, et j'em demande si chés toup pour le miyeu.

 

Une chose que je sis certain est que la patate royale avait miyeu goût dans l'temps d'la frouque.

 

A Bêtot, il est temps que j'vaits ermouer les betes.

 

Clifford Laisney