1972: En Améthique

 En Améthique

 

Los Mochis, Sinaloa, Mexico.

Lé 12 dé févri, 1972.

 

Moussieu l'Rédacteu,

 

Quâsi eune sémaine dans l' “train” en c'min pour Topolobampo, tchi n'est pon bein liain d'ichîn, auve rein à faithe sénon admither l'paysage, m'a donné l'temps d'reunminner entouorre chein tchi s'pâsse en Améthique ches jours, et ieune des choses tchi m'frappe lé pus est l'avarice tchi sembl'ye gouvèrner l's idées des gens. Par exempl'ye, quand des groupes dé travailleurs démandent pour un hauchissement d'gages, i' n'sont pon satisfaits d'en aver iun d'donné, il' insistent tch'i' faut qué tel hauchissement s'sait retroactif à eune date bein èrtchulée pour qué ch'la apporte eune grosse somme en blio en d'ssus du hauchissement d'gages actuel. I' n'lus d'mentent janmais qué dans l'cas qu' ch'est L'Êtat ou l'gouvèrnément (v'la tchi veurt dithe lé pouorre publyi) tchi paie les gages, v'la tchi veint d'la pouchette du contribuabl'ye tch'a ieu, dans bein des cas, fort à faithe à vivre ou mème vivoter.

 

L'estchuse qué l'hauchissement lus est deu à c'menchi du jour tch'il ont fait lus d'mande est, à m'n idée, riditchule. Et quant à l'îndex du couôtement d'la vie étant eune autre estchuse pour pus d'gages, v'la tchi sembliéthait raisonnabl'ye si les gages dévalaient auve l'îndex, mais i' freunment les ièrs quand ch'la s'arrive et l's ouvrent touos grands quand l'îndex monte un d'mié point! Et pis, châque fais tch'i' y'a un hauchissement d'gages v'la tchi fait l'îndex monter, car la marchand'die dé tout chein qué nou-s-acate couôte pus, et l'affaithe n'en finnit janmais.

 

Nouot' dollar a baissi en valeu. Sans doute, ch'est d'nouot' faute. Ch'est presqu'încriyabl'ye, quand nou-s-y pense, mais la générôsité et l'esprit d'humanité d'nouos chefs auprès la deuxième dgèrre mondiale en r'mettant les nâtions ravagies par chutte dgèrre sus lus pids d'driéthe, auve des dons et des prêts, nouos a couôté chent chînquante billions d'dollars. Et criy'ous qu' les nâtions à tchi ches sou-là ont r'donné la prospethité nouos en sont r'connaîssants? Mais nannin - ch'est l'contraithe! Mais ch'n'est rein d'nouvé dans l'histouaithe du genre humain. Ou savez bein tch'est qu' nou dit en Jèrri qué l'vilain fait quand nou lî fait du bein! Et pis, j'avons bâti d's aéroports à l'êtrangi, et des maîsons à gogo pour louogi nouos aviateurs et soudards et lus fanmilles tch'étaient là pour arrêter l'avanchement du Communisme tchi s'pliante tréjous là ou'est tch'i' y'a du troubl'ye et d'la mînséthe. Et quand les nâtions tchi dév'thaient èt' èrconnaissantes nouos mettent à la porte, il' empaûtent tout chu foncyi-là sans payi un sou pour.

 

Et l'couôtement d'la dgèrre au Viet-nam, eune dgèrre entréprînse pour arrêter l'Communisme d'envahi l'térritouaithe des Îndes, dé l'Îndonésie et finnalement d'l'Australie, et garanti la libèrté et la paix du monde libre, est formidabl'ye en millions d'dollars étout. Mais à la pliaiche dé loûser l's Êtats-Unis pour aver entréprîns eune tâche si îngrate, un tas d'monde les bliâment. Ch'est tréjous d'mème. Bouan Dgieu sait tch'est tchi'i' s'arrivetha quand touos les soudards Améthitchains tchit'tont l'Viet-Nam. Ch'est à saver si les troupes du pays pouorront continnuer à s'battre touos seurs contre un ennemîn souôt'nu par La Russie et p't êt' La Chine étout. Si nouot' Président peut faithe autcheune chose pour aver Les Chinnouais à s'êcarter d'chu souôtchien-là, san viage en Chine n'étha pon 'té en vain. Chutte visite en Chine né pouorrait pon être en miyeu mains, et j'espéthons tous qué v'la tchi s'en va amender l'espé d'la paix dans l'monde.

 

Nou créthait qu' avec l'êducâtion, la prospéthité du monde en général, et l'fait qué les nâtions tchi profitent d'eune abondance dé bein-être sont dispôsées à aidgi ès cheinnes tchi n'en ont pon, ou tchi sont trop jannes pour aver ieu l'temps d'en atchumuler, les dgèrres n'éthaient autcheune raison d'êcliater, et acouo j'en ai veu six ou sept dans ma vie. La cheinne des Boërs à c'menchi les deux grand' dgèrres mondiales, la dgèrre entre La Russie et l'Japon, en Corée, et l' Viet-Nam, sans pâler des dgèrres dé courte duthée entre l's Êgyptiens et Israël.

 

Et l'Angliétèrre, gangnante et résistante quand l's aut' nâtions 'taient abattues, s'est ruinnée en gangnant, et L's' Êtats-Unis sé sont quâsi ruinnés en r'mettant les pèrdus sus pid. Tchil' histouaithe pour les êtudiants des siécl'yes à v'nin! Et ch'est seux tch'i' y'en étha, des siécl'yes qué jé n'vèrrons pon, car lé psalmiste dit à L'Êternel (Psaume 90, vèrset 4, page 257 dé La Litourgie) : “Car mille ans sont devant Tes yeux comme le jour d'hier qui est passé, et comme une veille en la nuit”. V'la tchi nouos ramémouaithe qué nouos jours sont dé p'tit accompte quand nou pense à l'êtérnité!

  

George d'La Forge.