1963: Ph'lip et la providence

 Ph'lip et la providence

 

à Portinfé, Saint Ou.

 

Vendredi au sé.

 

Moussieu l'Editeu,

 

J'tiomes à pâsler, la Merrienne et mé, en déjeunant à matin, quand j'avons yeu la triste nouvelle d'la mort du fanmeux Lord Nuffield.

 

“I' 'tait un homme des pûs r'merquablyes,” ou s'est faite en qu'menchant, “pour aver amâssé touos chais millions. Sans doute il a yeu toutes les chances dans l'couothant d'sa longue vie.”

 

“Ch'n'est pas la chance, ma vielle,” j'ai dit, “ch'est un don, et i' n'a jamais couothu dans notre famille. Si Lord Nuffield, quand il 'tait jeune, gâgnait quatre sous, il en faisait huit sûs tchique sens, tandis qu'mé, j'en dèspensais quatre et empruntais l'restant. Ch'nait pas tout à fait ma faute, car ch'est la Providence tchi gouvèrne chonna.”

 

“Oh,” ou s'est faite, “j'n'avais jamais comprînt chonna.”

 

“Pas êtonnant,” j'ai dit, “car i' nos est dit qu'au qu'menchment du monde Adam n'comprenait pas sa femme, et Eve ne comprenait pas s'n homme: autrement i' n'éthaient pas fait la bêtise tch'i' fîtent.”

 

“Sais-tu bein, Ph'lip,” ou s'est faite, “que jamais je n'mange un pâté d'pommes ou des pommes au fou sans y penser et pourtant y'a longtemps. Tchi dommage que n'y avait pas un betchet d'navets ou d'autres ledgumes dans chu gardin.”

 

J'nos sommes mimes a pasier de chein tchi s'arrive dans les pâraisses, et la Merrienne a r'mertchi qu'ou trouve drôle qu'à la Trin'té un comité est bliâumé pour aver résigné sans permission, “Quand i' n'y étha qu'des femmes dans l's Etats,” oulle a dit, “un comité tchi veur résigner, pouôrra l'faithe sans autchune diffitchulté. Après tout, i' faut qu'les gens aient un mio d'liberté: mais la p'tite pâraisse de Saint Mathie a fait pièthe, si nou peut craithe la gâzette.”

 

“L'affaithe a 'te r'minse es Surveillants,” j'ai dit, et, changeant d'sujet, j'li ai d'mandé tch'est qu'oulle a veu au “show” de g'vaux à Saint Louothains.

 

“Pûs d'bidets que j'éthais creu. Y'en avait des grands, des moyens et des p'tits: en un mot y'en avait pour touos les goûts. Quand i' font autchune chose à Saint Louothains, le succès est certain, car les arrangements sont tréjous parfaits.”

 

Et ch'est tout pour agniet, Moussieu, car j'si bein lâssé.

 

Ph'lip