1972: L'amour est aveugl'ye!

 L'amour est aveugl'ye!

 

Trenton, Michigan, U.S.A.

Lé 25 novembre, 1972.

 

Moussieu l'Rédacteu,

 

“Ch'est vrai tch'i' faut qu' la jannêche s'atchitte!”, Missis Lesbithé dît à Manman quand j'la rencontrînmes tout près d'l'êcarceux d'l'aut' côté d'la route où'est qu' Mess Hubert “Genteel” 'tait en train d'bâti la belle pétite maîson appelée Rosedale, en nouos en r'vénant d'la boutique à Mess Sélous à La Fontaine. “Mais ch'la n'veurt pon dithe que les filles peuvent rester à galvauder les c'mîns à toutes heuthes au sé. Nou n'sait janmais tch'est tchi'i' peut s'arriver dépis qu' les garçons ont c'menchi à hanter l's aubèrges au sé à la pliaiche d'aller ès Assembliées d'Priéthes!”

 

“I' pathait,” Manman lî dît, “qu' ch'est quand i' vont soudarder dans la Milice tch'i' c'menchent à les hanter, l's aubèrges.”

 

“Eh bein,” Missis Lesbithé lî dît, “nou créthait qu' à ch't heu, en l'année mil huit chent nénante-neu, qu' les jannes es'saient pus êclîaithis qué d'vouler passer lus séthées parmi les niaumîns tchi hantent les aubèrges!

 

“Dans man janne temps,” Missis Lesbithé continnuit, “nou n'viyait pon d'jannes filles dans les rues dans l'mitan d'la niet. Man p'pèe m'éthait bein vite donne eune tournéoualipe si j'tais r'vénue pus tard que dgiex heuthes quand j'sortais. Et pis, y'avait du feu d'satchi s'i' n'aimait pon l'janne homme tchi v'nait m'èrcondithe auprès l'églyise au Dînmanche au sé. Ch'est vrai tch'il 'tait un mio trop r'gardant, car jé n'tais pon aîsie à pliaithe mé-mème. I' fallait qu' un janne homme fûsse dé bouanne fanmile pour qué j'lî donnîsse pèrmission dé m'prendre lé bras en sortant d'l'églyise. Ch'n'est pon viyant qu' ch'est mé, mais pour en dithe la véthité, l's aut' jannes filles 'taient un mio jalouses dé mé car y'avait tréjous eune racachie d'jannes hommes tchi voulaient m'èrcondithe. Ch'n'est pon qué j'veurs m'en vanter, ou viyiz, mais j'tais assez belle fille dans chu temps-là!”

 

“J'vouos crai bein,” Manman lî dît, “nou n'dithait janmais qu'ou-s-avez septante ans!”

 

“Septante?”, s'fît Missis Lesbithé, “ou-s-avez bésoin d'neuves leunettes, ma pouorre Missis Le Feuvre. Septante? Ou r'dotez, don - j'n'en ai qu' chinquante-six!”

 

“Ah,” s'fît Manman, “estchûsez-mé, Missis Lesbithé. Ch'est que j'tais à penser à l'année mil huit chent septante - l'année qu' man grand fut né, et l'mot 'septante' m'a êcappé. Mais ch'est bein aisi d'vaie qu' ou-s-avez l'air toute janne!”

 

“Véthe,” Missis Lesbithé lî dît, “j'n'ai pon changi fort!

 

“Eune séthée,” ou continnuit, “ch'tait mème la séthée qué j'm'engagis à Mess Lesbithé, j'l'avais dêjà r'fûsé trais ou quat' fais, mais i' r'vénait tréjous, i' m'disait tch'i' m'avait tréjous aimée d'pis qué j'lî avait fliantchi eune talmoûse quand il êprouvit à m'embraichi driéthe les bouais quand j'tions au thée des trais pâraisses dans l'Gardîn d'Olivet. I' viyait bein, i' m'dit, qué j'tais espritée et que ch'tait eune femme dé mème tchi lî fallait pour prendre soin d'san mènage. Il en gangnit à la fin. P'pèe l'aimait bein viyant tch'il 'tait l'seul êfant et principal hétchitchi, prîncipa d'pâraisse et Înspecteur des C'mîns. Et du côté d'sa m'mèe, il 'tait pathenté à un Seigneu d'un fieu tch'appartchient à la Reine Victoria à ch't heu.

 

“Mais, pour êrvénin à la séthée qué j'nouos engagînmes, ch'n'est pon pour m'en vanter mais, criyiz mé ou n'mé criyiz pon, deux jannes hommes lus battîdrent pour décider l'tché des deux tch'i' veindrait mé r'condithe. Ch'tait eune séthée d'nièr beurre siez man couôsîn à St. Louothains. Lé Ph'lippe Vènement, tchi m'était pathenté du côté d'man Tonton Fraînque, avait gagi auve Cliément L'Boeuf, un grand haut maigre d'St. Pièrre, tch'i' veindrait m'êrcondithe chutte séthée-là, car san p'pèe et l'mein avaient joué ès tchilles ensembl'ye à l'Hôtel dé l'Êta. Cliément lî rêponnit tch'il 'tait seux qu' un p'tit pèrrot comme li, haut comme un pot d'cidre et auve des dents comme des madelles dé heche et les gambes vèrques, n'éthait janmais la chance dé r'condithe eune belle janne fille comme mé, et les v'la à lus entre battre dans l'bel de driéthe!

 

“Tch'est tchi gangnit?”, Manman d'mandit à Missis Lesbithé.

 

“Eh bein,” ou lî rêponnit, “jé n'sai pon trop bein. J'sai bein tch'il' 'taient acouo à lus entre-camâilli auprès d'la tchèrquéthie, et qu' lus bras allaient comme des aubes dé moulîn à vent, quand Mess Lesbithé, tch'avait 'té toute la séthée à rêmouer l'nièr beurre dans l'bachîn, arrivit dans l'bel et m'prînt par lé bras. 'Vein-t'en, ma chiéthe,' i' m'dît, 'laîsse ches pouorres achocres-là lus entre capuchi; j'm'en vais t'èrcondithe, mé!' Et ch'tait chutte séthée-là tch'i' mé d'mandit d'lî faithe l'honneu d'mathier la pus belle fille dé St. Ou!”

 

“Né v'la eune histouaithe tchi m'fait penser,” Manman m'dit quand Missis Lesbithé nouos tchittit “tch'i' y'a un tas d'véthité dans l'vièr diton tchi nouos dit qu' l'amour est aveugl'ye!”

 

 

George d'La Forge.