1954: Un candidat pour Sénateur

 UN CANDIDAT POUR SENATEUR

 

(Par Isaac Bêtasse)

 

 

J'prends ma pluime à la main pour annoncé que je m'portethai candidat pour Sénateur à la preumié vacance. Par chein qu'j'en comprends, ch'est justement la djobbe tchi m'faut, car les sièges dans l's'Etats sont si confortablyes que nou peut dormi quand nous a sommé, et ach'teu tch'il a tait décidé que l'Député d'Saint-Ou n'dait pas être membre d'autchun Comité, sans doute un Sénateur de la même pâraisse r'chév'tha l'même compliement pour n'être pas embêté d'allé couore en Ville deux ou trais fais la s'maine quand il a du travas à faithe siez-l'y.

 

Mais ach'teu, y faut que j'vos pâsle de mes qualifications pour vos dêmontré que Isaac Bêtasse d'la Ville au Bas, dans la noblye pâraisse de Saint-Ou, n'est pas d'la p'tite bièthe. Quand j'vos dis qu'man grand'pèthe du bord de Mémée avait tréjous voté Louôthi, ou comprendrez qui ch'n'tait pas un imbécile. Il est vrai tch'y tait gratteux d'routes et qu'man pèthe poursuivait l'même mêtchi, mais quand v'nait l's'êlections, y pouvaient tréjous gratté aut-chose étout, tch'i prouve que ch'tait d's'hommes intélligents, tch'y réalisaient qu lûs vouaix valait tchiquechose.

 

Dans chu temps-là piupart des mousses de par ichin n'allaient pas à l'êcole pus qu'chonna et don je n'vos dithai pas que j's'y un homme trop bein êdutchi, mais j'peux lièthe Ph'lip et Merrienne dans Les Chroniques en êp'lant les longs mots un mio à la fais, et j'peux tréjous conté man change quand j'vais à la boutique, en contant un sou à la fais. Par chein qu'j'en vais ch'est assez pour un Sénateur tch'y ne d'sithe pas être membre du Comité d'Education ou du Comité des Finances.

 

Il est vrai que j'qu'menche à prendre d'l'âge, car j'ai prèsque nonante ans, mais j's'y ocquo solide sûs mes gambes, et n'y'en a pas yun dans la Tchillétte de Millais à m'prendre à don ou a nap, car j'y vait aussi cliait comme autchun d'yeux. Et si j'entends un mio haut, j'n'en s'sait pas d'pièthe dans l's'Etats, car mes vaisins m'disent que les trais-quarts de chein qu'nou ouait là n'est qu'du gniolin, et qu'tandis qu'un campagnard sait dithe “contre,” ch'est tout ch'qu'y faut.

 

Sans doute ou voudrez savé si j's'y mathié. Eh bein, nânin, car ch'tais l'seul êfant, et quand j'avais quarante ans Pepée m'app'lait l'Mousse et Mémée le P'tit Garçon. Y'avait une fille que j'éthais bein mathié à l'âge de djais-huit ans, mais san pèthe tait pauvre comme un rat, et ou n'avait autchun prospect d'héthité un quartchi d'rente ou une pérque d'terre, épis quand Pépée entendit que j'avais tait à la r'condithe un Dimanche au sé, et l'dit à Mémée, y m'en contites de tant d'sortes que j'n'ôsit pas même sorti du bel d'vant qu'nou vint nos dithe siez mais après qu'la hardélle avait dêcampé avec un soudart. Faut dithe étout, qu'au sujet du mathiage; Pépée et Mémée, n'taient pas encouothageants, car y disaient touos les deux que ch'tait la pûs grande bêtise qu'une personne pouvait faithe. J'aime à craite tchy sont heutheux ach'teu, pourvu tch'ils aient monté pûs haut, car les prédicateurs nos disent que n'y'a pas d'mathiage là.

 

Quant à la tchèstchon d'caractère, y'en a tch'y veulent dithe que j's'y un aggravé fini, et j'ai même ouï un pendard affirmé que j'vendrais ma grand'mèthe à un chiquetchi pour quatre sous. Ch'n'est pas vrai, bouonnes gens - pas pour quatre sous! J'admets quand même que je n's'y pas dêpenseux d'ma sorte, mais y m'semblye que si y'en avait pûs comme mé dans l's'Etats, les sous du public ne dispathaitraient pas comme y font au jour d'agniet, et les taxes diminuethaient bein vite.

 

Quant à la tchéstchon d'politique, une fais qu'je s'sait dans l's'Etats je d'mand'dait au Greffi de m'prépathé tchiques Projets, comme chonnechin :-

 

Preumièthement : Un Projet pour aboli la maintchi des Comités, car y'en a bein trop. Nou pouôrrait s'graie par exemplye, sans l'Comité des Travaux Publiques, du Comité d'la Santé Publique, du Comité pour bâti des maisons et une douzaine d'autres.

 

Deuxièmement, un Projét pour r'mettre nos Recteurs dans l's'Etats, après avé envié les Députés d'la Ville à lûs couochi.

 

Traisièmement, un Projét tchi dithait qu'les femmes ne sont pas éligibles pour des sièges dans l's'Etats. Tch'y restent siez-yeux à gardé bouon feu pour lûs hommes quand l'temps est fraid, et à lûs prépathé un bouon fricot quand y r'veinnent au sé.

 

Quatrièmement, un Projét disant à chais mêssieux tch'y si souvent en Angliétêrre à nos frais tch'y peuvent y'allé aussi souvent comme y voudront pourvu tch'y paient les dêpenses hors de lûs pouchéttes. J'garantis qui si chonna tait fait, nous n'ouïthait pas si souvent d'chais députâtions importantes.

 

J'voudrais étout qu'y'éthait tréjous un môteur à la disposition d'un Sénateur tch'en éthait besoin et un neu fa d'habits touos les Lundis d'Pâques, quand un homme tch'y s'réspecte veur être bein habillyi. Epis, bein seux, les Sénateurs dév'thaient être salariés. Je n'crais pas qu'chinq chents louis s'sait trop. En finissant, j'voudrais vais l's'Etats rêtablyi le vier système en cas d'l'êlection d'un Juré-Justicier, et pûs d'bouons viers Jêrriais dans la Cour Royale.

 

Tchèsqu'ous en dites de man programme? Ous en approuvéz, j's'y bein seux et ach'teu quand veindra le jour d'êlection, votéz pour Isaac Bêtasse, un Jêrriais d'la vieille trempe et ou n'vos en r'pentithéz pas.

 

1954