1972: Lé vèrre dévale!

 Lé vèrre dévale!

San Antonio, Texas, U.S.A.

Lé 5 dé févri, 1972.

Moussieu l'Rédacteu,

La s'maine passée j'vouós disais qu' j'avais ieu la chance d'èrchéver deux gâzettes dé Jèrri. Eh bein, pour eune fais dans ma vie la mème sorte d'chance continnue chutte sémaine. J'ai r'chu les cheinnes du deux et du neuf dézémbre. Mais j'mé d'mande si j'sis dév'nu aveugl'ye; j'ai liu les gâzettes en entchi d'un but à l'autre pour vaie les résultats dé l'Eisteddfod (i' m'sembl'ye tch'il a tréjous lieu dans l'mais d'novembre), mais la seule mention qu'j'en ai veu est l'rapport du concèrt tch'est dans la gâzette du neuf dézembre, et lé rapporteux nouos dit qu'la séthée 'tait un d'sappointement et tch'i' sembliait y'aver tchiquechose tchi mantchait. Quant à mé, ch'tait la piéche dé thiâtre en Jèrriais, tchi mantchait. J'ai liu l'articl'ye deux fais souangneusement pour mé faithe seux, et j'n'ai veu autchune indicâtion tch'i' y'en avait eune. Y'a rein qu' deux r'citâtions en Jèrriais mentionnées, “Les Trais Leçons” par Mlle. Audrey L'Feuvre, et “F'lip et Merrienne vont à Londres” par Mlle. Enid de Gruchy, deux mangnifiques èrciteuses.

Ch'tait quâsi eune trajédie pour mé d'vaie l'concèrt donné sans la piéche dé thiâtre gangnante en Jèrriais. Est-che tch'i' n'y en avait pon l'année passée? Nou sait bein qué l'Jèrriais dispathaît à grands pas, mais j'ôse espéther tch'i' n'a pon 'couo dispathu à chu point-là et qué j'm'en vais aver la consolâtion d'vaie, dans ieune des préchaines gâzettes, tch'i' ont 'té oblyigis d'donner un deuxième concèrt en forme d'séthée Jèrriaise, et j'm'en vais garder m's ièrs ouvèrts quand la préchaine gâzette arrivetha pour vaie si ma théorie a autcheune raison d'être. J'm'èrsouveins du temps qu' La Séthée Jèrriaise 'tait seûthe dé remplyi l' thiâtre dans la rue “Gloucester”. Et i' m'sembl'ye aver ouï dans tchique temps qué ch'tait chutte séthée-là tch'apportait l'pus d'profit à l'Eisteddfod.

Lé trépas d'vièrs anmins continnue. Eune lettre érchûe d'un anmin St. Ouënnais m'annonce qué l'Sieur “Willie” L'Brun n'est pus. I' m'sembl'ye tch'i' m'dit l'année passée, à l'occâsion d'eune rêunion d' L'Assembliée d'Jèrriais, tch'il avait 83 ans. Un bouan vièr Jèrriais. I' s'en va êt' mantchi par les membres d' 'L'Assembliée. Il 'tait tréjous-là (dans l'êté atout san chapé d'paille!) quand y'avait tchiquechose en allant. Et ch'est seux qu' man bouan vièr anmin, lé Sieur Clem Rondé, s'en va l'mantchi étout, car il' allaient tréjous à l'églyise ensembl'ye au dînmanche matîn!

J'ai r'gret, étout, d'vaie l'décès du Lieut. Général Messire Edward Grasett. Jé n'm'en vais pon aver l'toupé d'l'èrcliâmer comme anmîn, et acouo nou peut dithe tch'il 'tait l'anmîn d'tout l'monde en Jèrri quand il 'tait Gouvèrneux, car eune fais tch'i' vouos connaîssait i' n'mantchait janmais d'vouos dithe bonjour en passant. Quand j'arrivis en Jèrri en 1946 auprès eune absence d'eune vîngtaine d'années, l'Connétabl'ye L'Boutilli d'St. Ouën m'îinvitit à aller ès ormèrs ès Mîntchiers la préchaine année dans l' “remorqueur” Duc de Normandie. Lé Général 'tait iun d's învités à bord, et j'eûnmes eune longue convèrsâtion ensembl'ye viyant tch'i' dêcouvrit qu' jé v'nais d's Êtats-Unis et li du Cannada, et qu' j'avais 'té dans l'sèrvice du gouvèrnément et dans la Milice du Cannada mé-mème. Il 'tait un charmant moussieu.

Ch'tait à ch't occâsion-là qu' à nouot' arrivée es Mîntchiers j'vînmes la couleu Française au haut du mât à tèrre. Lé Gouverneux fit v'nîn l'moussieu Français tchi l'avait mîinse à haut, à bord du Duc de Normandie, et lî dit qué comme èrprésentant d'Sa Majesté Britannique ch'tait san d'vé d'lî d'mander dé d'valer la couleu d'France, et d'lî dithe par tch'il autorité tch'i' l'avait mînse à haut. L'moussieu Français fut bein courtouais, et li donnit l'nom d'un cèrtain Préfet comme étant l'autorité. Et pis il eûdrent eune fais à baithe, nou dév'thait p't êt' dithe un manniéthe dé vîn d'honneu, à la santé d' Sa Majesté Britannique et du Président d' La France, et l'moussieu Français s'en r'fut à tèrre et d'valit la couleu Française du mât, et j'mînmes lé “Union Jack” à haut à sa pliaiche. J'ai ouï d'pis qué ch't încident-là fut lé tout c'menchement des pourparlers tchi finnîdrent par lé verdict, favorabl'ye pour Jèrri, dé la Cour Înternationale de Justice de La Hague.

J'tais surprîns d'vaie qu' un garagiste avait 'té mîns à l'amende pour aver donné l'ordre dé changi l'nombre d'milles sus l' “indicateur de vitesse” d'un moto dé s'gonde main d'vant l'èrvendre. Jé n'veurs pon dithe tch'i' n'lé méthitait pon, mais j'crai tch'il avait raison quand i' dit à la Police qué v'la tch'i' s'fait hardi. Ch'est r'mèrquabl'ye dé vaie qu' la justice est si bein administrée en Jèrri. Ichîn, en Améthique, j'gage qué les milles sont changies (en bas, sans doute!) sus quâsi touos les motos dé s'gonde main dévant êt' èrvendus. L'acateux est sus ses gardes à chu sujet-là, mais jé n'crai pon qu' j'avons eune louai contre.

George d'La Forge.