1947: New Year Resolutions at Portinfer

New Year Resolutions at Portinfer

 

 

Moussieu l'Editeu,

 

L'autre sé j'tiomes dans la tchuîsine la Merrienne et mé. Je v'nais d'liéthe le dernié chapitre d'la vie d'chu Rouë d'Angliéterre tch'avait mathié síez fais, et la bouannefemme tait assise aupi du feu à rabillyi des cauches. Le tchan dormait souos la grand'chaise, et la catte, tchi s'en va célebré la nouvelle année yun d'chais jours comme oulle a couôtume de faithe touos les trais mais, tait couochie aupi d'mé sûs l'sofa.

 

“Ecoute,” j'dis à la Merrienne, “as-tu pensé tch'il est grand temps qu'tu faiche de bouonnes résolutions pour ch't'année?”

 

Ou me r'gardit en d'sûs d'ses lunettes, mint sans travâs bas, épis - “Et té,” qu'ou s'fit, “en as-tu fait d'chais résolutions?”

 

“Mais ben seûx qu'j'en ai fait,” j'l'y raiponnit. “J'en fais touos l's'ans, comme tu dais savé.”

 

“Sans doute,” ou s'accordit, “mais j'n'en ai jamais veu yunne duthé pûs d'tchînze jours. Allons, dis nous tchêsque tu'as fait chutte fais.”

 

“Chu coup,” je qu'menchit, “j'ai décidé d'allé à l'eglîse pûs souvent.”

 

“Deux fais l'année passée,” murmuthit la bouonnefemme. “Une fais pour un bâpteme et une fais pour un entêrrement. Tu n'dév'thais pas avé grand' peine à gardé chette-là.”

 

“Deuxiêmement,” j'continuit, “j'ai présque décidé d'pardonné chu peûle de Jean Nicolas, tch'y tait v'nu m'accaté chutte g'niche plienne pour la r'vendre deux fais autant l'préchain jour.”

 

“Et pourtchi présque?” ou s'fit. “Ch'n'est qu'à maintchi d'une résolution chonna. Et n'oublie pas qu'tu y'avais joué une drôle de farce en l'y vendant chais p'tits animaux tchi crevîtes, dans sa cotte le lend'main, et l'y tch'avait péyi argent comptant.”

 

“Eh ben,” j'dis, “faut dithe que je l'pardonne compliétement. Ach'teu j'ai décidé étout d'être pûs poli au Vingt'gni quand y veindra d'mandé san rât.”

 

“Et il bétôt temps,” s'fit la Merrienne. “L'année passé tu fut ben prêt d'être présenté par le Connêtable pour insultes. Après tout le Vingt'gni n'faisait qu'san d'vé, et tu'éthais deu save mûs.”

 

“P't'être ben, ma chiéthe,” j'l'y dis, “mais ch'tait ben du d'être hauchi trais quartchiers pour un minséthablye poulaillyi dans la cârre du gardin. Enfin, ch't'année j'paiethai sans un mot, et si y'a deux d'gouts d'litcheu dans l'armouéthe j'invit'tai l'Vingt'gni à béthe a la santé d'la maison.”

 

“Et est-che-là tout?” ou d'mandit.

 

“Nânin, ch'n'est pas tout. J'ai décidé de m'faithe trimmé la barbe touos les trais mais, et les g'veux étout.”

 

“Ajouôte à chette-la qu'tu lav-thâs des pids au mains une fais la s'maine, et qu'tu n't'en îthâs pas t'couochi avec les mains d'un ramouneux, et t'éthas ben fait,” s'fit la Merrienne. “Et tandis qu'tu y'est, tu pouôrrais étout décidé d'netti tes bottes et tes gaiteurs 'quand tu t'en vas sorti.”

 

“Ah, mais, arrêté un mio,” j'l'y dis, “Y n'faut pas allé trop vite, bouonnefemme. Si j'fais trop d'chais résolutions, ben seûx que je n'les gardéthai pas toutes. A m'n'âge la mémouéthe peut mantchi.”

 

La Merrienne dit tchi n'tait pas tchestchon d'mémouéthe mais de bouanne volonté. “Quant à mé,” ou continuit “si j'fais une résolution ch'est pour la gardé. Autrement, ben mûs n'en faithe pas du tout.”

 

“Je sommes d'accord sûs chu point-là,” j'l'y dis. “Mais tandis qu'j'y sommes, dis-mé si tu'en as fait, té, des résolutions, et tchêsque ch'est.”

 

“Oui, j'en ai fait,” ou raiponnit. “J'ai décidé, à qu'menchi que ch'est té tch'y s'en va allumé l'feu touos les matins, que ch'est té tch'y s'en va m'apporté une tâsse de tais au liet, que ch'est té tch'y s'en va mettre la tablye et prépathé l'dêjeuné, que ch'est té tch'y s'en va gardé maison quand j'voudrai allé m'prom'né, et qu'ch'est té tch'îtha boulé les p'tits à la Liza et la Mary Jane dans lûs p'rams quand y f'tha bé. En veur tu d'autres?”

 

Hélas! Moussieu l'Editeu, mé v'la pathé!

 

 

Ph'lip.

1947