1947: Jersey-French night at Springfield

 Jersey-French night at Springfield

 

Ph'lip and Merrienne were there

 

 

Moussieu l'Editeu,

 

Sam'di au sé, la Merrienne et mé, nos en fûmes en ville pour la séthée Jèrriaise. Une fais que j'fut assis je r'gardit autou d'mé, et ch'tait ben pliaisant d'vais tant d'mes viers amîns dans la salle. Y'avait d's'hommes là que j'n'avais pas veu avec lûs femmes pour vingt-chinq ans.

 

Quant ês r'citâtions y faut dithe que j'fut un mio d's'appointé. Les femmes, sinon la missis Biampid pathaissaient nerveuses et j'pensit à mé-même que s'y taient v'nues siez nous un couplye d'fais êcouté la Merrienne me dithe s'n'opinion d'mé pour, un bouan quart-d'heuthe sans prendre haleine v'la tchi lûs éthait donné un mio pûs d'couothage.

 

“L's' hommes taient pas tant pièthes, mais quand y s'méttaient à pâslé d'vier garçons y'avait ben d's'hommes mathiés aupi d'mé tch'y soupithaient, et pûs d'eune jeune hardelle tch'y faisait des grimaches. La Merrienne me dit pûs tard que l'sieur Dutot méthitait une bouanne paffe, mais à man goût y s'en dêhallit raide ben.

 

J'avais grand r'gret après d'n'avé pas entré pour les discours que n'ou n'a pas yeu l'temps d'prépathé, car j'ethais peut lûs raconte d'belles histouêthes au sujet d'l'iau d'canelle.

 

Quand j'tais mousse ma mémée m'prenait tchiquefais ov l'yi quand oulle allait visité une vaisine tch'y r'était à bas après un tchinze jours au liet. Ou disait “oh, le p'tit chier,” ou “oh, la p'tite chièthe,” comme toutes les autres, êpis les v'la à bèthe d'l'iau d'canelle. Mé j'en avais deux d'gouts pour me rêcauffé l'estoma, mais pus d'une fais j'ai veu d'grôsses bouonfemmes en avalé bétôt une démie-pinte sans s'dêrangi.

 

Chen qu'j'aimit l'mûs de toute la séthée j'fut Saint-Ou et Saint-Pièrre dans lûs p'tits plays. Etant Saint-Ouennais mé-même, j'éthais donné l'prix a missis Biampid et sa compagnie, mais y faut admettre que la femme à Frâinque Trachy m'fit grand pliâisi.

 

Comme se faisait la Merrienne quand l'Frâinque couothait ichin et là, tandis qu'sa bouonnefemme capuchait d'sûs, "n'en v'la yunne tch'y sait ben s'prendre.” Mais mé j'pensais, “Si tu'étais ma femme, ma vieille, j'te fich'chais eunne cliamûse que tu n'oubliethais pas pour une pôse.” Mais j'avoue que j'n'ai jamais ôsé l'faithe à la Merrienne, car san grand-pèthe tait forgeux, et oulle en tchein.

 

Je r'vînmes siez nous tout-à-fait contents. J'avions rit pour en être malade, et j'avions pâssé une raide bouonne séthée. L'année tchi veint j'espèthe d'être sûs l'estrade à raconté ès bouonnes gens les malheurs d'un homme tch'est bête assez de s'mathié.

 

Ph'lip

1947