1948: Flip et Merrienne vont au Lanchon

 Flip et Merrienne vont au Lanchon.

 

 

Pour des années et d'sannées Merrienne Le Gresley, du Ville au Veslet, quand v'nait le mais d'Septembre, disait à san Flip : “Il est temps r'raller au lanchon, man vi.” Si y'avait des patholes qui l'y touchaient l'tchoeu ch'tait chlà.

 

Mais y'avait une chose que la Merrienne ne savais pas, t'ch'tait que l'Flip n'allait pas au lanchon du tout. Quant y v'nait a la Rocque y trouvait les Rocquais et jouait une gamme de Dominos, et quant les pêcheurs ramontaient y n'acatait un couple et douzaines pour sa Merrienne, car si sa missis avait seut la véthité, sa vie n'était pas vallu chi. Mais un bouan jour, la Merrienne s'esmancipi d'aller au lanchon avec Flip, et quant ou l'y dis, y manchi s'esvani. Mais chi faithe, et chi dithe? Fallait t'y menti? Est ch'qué la Merrienne l'avait happé? Dans s'nexcitement y l's dis qui faudrait mouilli ses pis, et que ch'tait bein mauvais pour ses corps. “Pouorre niggot,” ou l'y réponni, “n'y rein milleu que d'eau sallée.” “P'têtre bein,” s'fit Flip, “mais si tu veut attrappé le grand lanchon, faudra que tu mouille tes gn'ors et p'têtre en d'sus, ma pouorre Merrienne. Assez pour attraper une salle bordée de romatices.”

 

Mais oulle tait determinée raique comme une femme peut être. Et don un bouan jour v'la hors pour la Rocque, et l'Flip en trembyait comme une fielle, et il avait honte car la Merrienne tait grosse comme une boulotte, car oulle avait mins deux or trais cotillons et un long skirt, sans paler d'autres choses.

 

Quant ils arrivitent a la Rocque ses amins 'taient a l'attendre comme d'habitude, mais quant y vites la Merrienne y lus boufirent a rithe, et le Flip lus touanni une pathe d'yers et, drièthe le dos à Merrienne, lus faisait des signes avec ses bras, d'lus taithe. La Merrienne fillait bouan rond ava la côte et Flip la suivait pendent l'huelles comme un chon foutté.

 

Quant ils arrivites au bord d'eau la Merrienne s'en fut tout drait a la pêque. Mais mon Flip tait pas pressi et il aperchu deux or trais jeunes filles avec des p'tites courtes et brais. Y restit ecstathie de toutes sortes et d'idées l'y passit travers l'esprit. Comme y disait a l'y même : “Cheunne chin me vaut une tonique. Ch'est p'têtre bein t'chla qu'il appelle Le New Look.” La Merrienne etait si occupée a râtlé, qu'oulle avait oublié Flip, mais ou n'happé rein autrement, que deux ou trait gros comme son p'tit dait.

 

A forche d'esprouvait ou houcchi t'chique chose que son râté en r'binfrit, ou criait qu'oulle avait happé une anguelle et pis quant ou vins a vais ch'tait une escalle de bênit. La v'la marris chutte fais et ou ratli si bein qu'oulle en happi un de douze pouces. Oulle tait si excitée qu'ou pichit son râté en haut et en éprouvant a l'mette dans la bouette y s'escapi. Ou c'menchi a courre s'ouentre, mais le p'tit mégéan y fis deux ou trais tours le tout d'Merrienne et s'couli dans son creux, bein erconnaissant d'etre hors des griffes a Merrienne.

 

Oulle 'tait futhieuse et an même temps oulle aperchu l'Flip qui n'avait pas bouggit, y tait resti la pianté comme une émanue. Ou l'y fait le pus laid cri qui menchi dans sautait hors dans ses brais. Oulle 'tait si enragie qu'ou râtlé que tout en brûlé, tout que si bein qu'ou houque son jethe drièthe dans son skirt et s'en fut les quatre foulles en l'air et resti assise sus une parti d'son dos justement comme une cannotte. Ou l'ammouchi ses cotillons le tout d'yi et fis les plus grands cris, comme si n'ou avait té a la tué.

 

Tout l'monde couthaient a son s'cours mais quant y vites la grosse Merrienne y riaient et riaient assez pour en bosté d'rithe. Comme se faisait les jeunes hardelles a courtes et braies, en lus r'troussant l'nez : “Hold your skirt, Missis.” Y'en avait y'un la des pâthaisses d'amont ch'la nous appelle un p'tit bossu, y riait tant qui tippi sa bouette et tout son paisson s'en fut a l'yeau, mais comme y disait : “I'y n'ya pas d'soin, il en valait bein la paine, quand j'éthait tait pour vais la Merrienne.” Une toute petite mousse, tout en souriant, dis : “Garde, pepé, la bouanne femme a fait la calipette.” Jusqu'a son p'tit frèthe tait tout gêné et comme un mousse dis : “Ou s'en va etre mouillie, pepé.”

 

Le Flip ne bougeait pas et savait pas si d'vé rithe ou pieuthé, mais il avait grand honte. Heutheusement, le Sieur Le Brocq, un grand amin a Flip et Merrienne, tait à cherchi une histouethe, et hors de pitché, happe la Merrienne par une main et la r'met sus ses pis. Ou ramassit son râté et sa bouette et fis deux or trais sermons au Flip en l'y disant : “Fiche me l'quant l'avant, grand bachouard.”

 

Ah, j'vos guarantis que l'Flip n'avait pas les deux pis dans l'meme souillet, y fillait l'avant comme un epart de feu et la Merrienne vos l'suivait d'près et ou cacté et l'insulté, le pourre mégéan, et ou continuit pour des s'maines que l'Flip n'en dormait pas.

 

Jamais la Merrienne l'y dis d'raller au lanchon.

 

A tous l'hommes qui veurs aller au lanchon, allez s'yi, avise le Flip, mais si votre femme suggèthe de y'aller etout, j'vous en pris, Restez siez vous!

 

 

S. P. Le Ruez.

1948