Lettre Jerrsiaise Dinmanche le 14 Mai 2000

 Lettre Jerrsiaise Dinmanche le 14 Mai 2000

 

Dinmanche le 14 de mai l'année 2000, et ch'est auve grand plaisi que Clifford Laisney vos presente la Lettre Jerriaise.

 

La s'm'naine tchi vint d'se passer nos a ram'ner acquo une fais hardi d'memouaithes de la liberation de chinq années d'otchûpation.

 

Es-ti possiblye que chinquante chinq années lus sont passées dépis probabliement iune des pus importantes occasions dans la vie des gens tchi m'écoute a matin.

 

Quoaiqu' la memouaithe n'ést pas aussi apre auprés une telle longeur de temps, quand-même nou s'rappelle vividement des extremes nécéssaithe en orde de survivre chés longues années d'captivité.

 

La Paraisse de St Ouen, lieu de ma naissance, n'est pas drièthe la porte quand vint l'occasion d'organiser, et chutte semaine tchi vint d'se passer a porter temoin a une liste d'evenements organisées pour celebrer le Millenaire, la Liberation, et l'jummelage d'la Paraisse auve la Ville de Coutances.

 

Ayant signer le charte de jummelage samedi passer les fêtes de Liberation continnuites auve un service speciale dans la grande eglyise. Dûthant la s'm'naine les celebrations ont continnuer auve une magnifique exhibition de photographies dans la Salle Paroissialle, deux jours de fêtes dans les superbes alentours du Mangnyi d'St Ouen et pis pour en fini l'eglyise a 'tait la v'nue pour un superbe festin d'flieurs érprésentant une célebration de chent ans d'nôt hethitage. Chaque sethée j'avons rejoui de concerts musicales dans l'eglyise, et a cés sé a 6.30, j'abouttants les fêtes en chants d'jouaie et d'ermérciement pour tuous nos bountées. L'Eglyise est ouverte toute la journée et ou's etes tous invitées et bein'v'nues d'visiter l'festin d'flieurs et d'joindre dans les 'Songs of Praise' a 6.30 p m.

 

De temps en temps nou se d'mande comme tchi qu'la vie sethait si i'n y'avait pas ieu d'liberation. Je s'saimes ti au pair auve les pays comme la Romanie, la Yugo-Slavie. J'authaimes ti toutes les luxes que j'prennons comme not drouait? A la pliaiche d'aidgi a chés pays tch'enhannes, i s'peut que-je sethait nous tchi sethaits du but d'érchever.

 

 Chenne-chin m'mêne au point du tchi que j'vos addreche a matin.

 

I´n se passe presque une s'm'naine que j'n'erchevons pas tchique demande par la poste nos enchergonts d'contribuer a une charité ou l'autre. Ch'est impossiblye de repondre d'une manniethe positif a toutes les d'mandes, mais souvent quand nou liet des souffrances, manque de nourrituthe, manque de méd'cinnes, le d'gas causer par innôndation d'ieau et d'tempêtes, maisons detruites par trembliement d'terre, les fanmines en Afrique et dans l's'Indes, et les d'gerres tchi continnussent dans differentes parties du monde, nou n'peut selon mettre sa  main dans sa pochette et aidgi a soulagi lus minsêthes.

 

C'mmenchant aniet et la s'm'naine tchi vint est ch'la que-je connaissons comme 'Christian Aid Week', et j'avons tous l'opportunité d'expresser nôt bouon tchoeu en faissant not possiblye d'aidgi es gens tchi'n rejouisses pas des luxes et benefices que-je connaissons.

 

Des gens volontaires sont vont vos laissi d's'envelopes, et chés a nous d'considether not position et d'sacrifié un p'tit d'not bein en orde de sout'nin les gens tch'in sont pas aussi chancheux qu'nous.

 

Achteu j'men vais diverti sus un tout a fait different topique. Est-ous interéssis dans l'sport? Siez nous, Veronica et mé, j'sommes fascinnés par le 'snooker'. Ayant pus d'temps sus nos mains que j'n'avaimes dans l'temps passé nos donne l'opportunité d'suivre les differents joueurs auve l'ambition de soul'vé pas seulement la trophie du gagnant, mais d'erchever une somme d'argent exorbitante. Ch'est érmèrquablye comme tchi qu'les jouers peuvent deviser un systême de pliaichi les balles exactement dans la position d'lus chouaix. Comme toutes chose, ch'est la pratique tchi fait l'parfait.

 

Aujourd'aniet, j'pouvons suivre tuous sports que je s'sait l'football, le cricket, les courses d'ch'vaux, les courses d'môtos, dans l'comfort d'eune grand chaise au d'vant d'la television.

 

Malheuthesement, la majorité d'sports sont avronés par la masse d'argent accordée es joueurs. Comme bein d'autes choses, le mot 'moderation' na pas appathence d'exister dans l'vocabulaire pas seulement des gens d'sport, mais parmi etout les hauts salaires que les directeurs de compagnie erchêve, mais ch'la ch'est pour un autre sujet possiblyement pour une lettre a l'av'nin.

 

J'vos souhaite a tous une bounne journée, et a tuous les malades j'vos souhaite bouon couôthage, éspethant que Dgieu vos soulag'tha d'souffrance et qu'ou connais'saits sa presence a tuous temps.

 

A LA PRECHAINE

 

Clifford Laisney