1959: L'Assembliée d'Jèrriais

 L'Assembliée d'Jèrriais

 

La rêunion mensuelle eut lieu Vendrédi l'27 d'Févri dans la Salle d'Agritchultuthe, St. Hélyi, quand à bein près 80 membres lus y rêunîtent. Lé Président, l'Sieur C. P. Billot, d'mandit ès membres dé lus l'ver pour eune minute en silence en mémouaithe d'un autre décédé, l'Sieur J. C. Coutanche.

 

Suivit l's affaithes pour la séthée, et 5 nouvieaux membres fûdrent êlus.

 

Discours.

 

J'feunmes favorisés chutte séthée-là d'aver l'jane Ted Syvret à nos donner un discours entouor san viage en Améthique l'année passée. I'c'menchit par nos montrer sus la carte des Etats-Unis, la route qu'il avait fait, et en même temps nos explyitchit les difféthentes tchultuthes, etc. des pliaiches à m'suthe qu'il allait. I'nos dit étout comment que quand il attèrrit i' fut êtonné d'vaie un si p'tit Aerodrome à compather au nôtre. I'dit étout qué tous lî faithaient tant la bein-v'nue qu'i' s'trouvit à s'n aise parmi les gens tout d'suite.

 

Portraits en couleur.

 

Ted avait prîns 400 portraits en couleur dé sa viage, mais i' nos en montrit rein qu'eune partie, des bieaux certainement, car i' y'en avait qui 'taient vraiment superbes. Les bouais'sies, les montagnes, les riviéthes, les siens prîns en avion 'taient bein bouans, et montraient la difféthence dé la tchultuthe dans les difféthents cantons.

 

Dans l'district qué Ted 'tait à rester, Vermont, ch'tait pus du pâtuthage, car ichîn les fèrmiers né peuvent sé fier d'n'aver pas pus qué 90 jours par an sans g'lée, et i'nos montrit un betchet d'grain d'Espagne qui fut g'lé l'29 dé Septembre! Ch'n'est bein seux pas tout rose pour les fèrmiers là-bas!

 

Les couleurs des bouaix au S'tembre sont vraiement magnifiques, et les “Niagara Falls” êluminés en plusieurs couleurs pathaissent bein étout, mais p't-être un mio artificiel quand même! Les hauts bâtisses dé New York font les Jèrriais ouvri l's ièrs!

 

Ch'fut eune séthée bein întérêssante et l'temps s'passit trop vite et à la fin l'Président èrmèrcyit Ted pour san bouan discours et l'félicitit d'aver fait un tel succès d'san viage comme ambassadeur dé nout' pétite Ile.

 

L'Sieur Billot annoncit la préchaine rêunion mensuelle pour lé 20 d'Mars, à St. Jean, et învitit les membres à un service français à l'Eglyise de St. Louothains, l'23 d'Mars, à 8 heuthes lé sé.

 

1959