1931: Deustrais d'nos amins d'la campagne se trouvithent ensemblye

Deustrais d'nos amins d'la campagne se trouvithent ensemblye dans not'e bureau avant hier et distchutaient entre ieux les dernié nouvelles.

 

Opprès aver êpuisé la tchestion d'la maladie dans les tomates, la manque de main-d'oeuvre pour en souognie comme i' faut, opprès aver ênumethé toute une liste de fermiers qu'avaient perdu d'la maintchi d'lus pliante, êgalement par la maladie, la conversation touâni sus la tchestion du Doryphore, ch'est-à-dithe le “Colorado Beetle,” qui pathaît-i' est à faithe ses ravages dans certaines parties de la France et qui m'niche d'affecter sérieusement les intéthêts des fermiers qui spétchulent sus la patate, comme font nos vaisins dans la région de St. Malo.

 

Iun d'ieux, qu'a des pathents en France est qu'est naturellement interêssi dans tout ch'qui s'passe siez nos vaisins, dêhalli d'sa pouchette une packotille de gâzettes françaises, des Ouest-Eclair et je n'sais combain d'autres publications, dans tchi qu'i' y avait des articlyes qui traitaient tous sus l'même sujet, et i' s'mins à lièthe tout chenna.

 

Deustrais de ses auditeurs l'êcoutaient avec attention réalisant bain naturellement qu'i' pouorrait s'ensuivre des dêveloppements qu'aithaient lus “répercussion,” (ch'est l'Chef qui m'a apprins chu mot-là) sus l'commerce d'Jêrri.

 

Mais iun d'la djaingue ne pathaîssait pas y prêter s'n attention et s'impatientait de oui l'autre lièthe toutes ches longues dissertations-là de tchi qu'i' n'en comprenait pas la maintchi.

 

Ch'est iun d'ches types-là comme nous en rencontre souvent d'une mentalité si insulaithe et si limitée que pour ieux, autchune chose qui s'passe en d'hors de Jêrri n'a pas d'importance.

 

I' s'appelle Théophile Sans-Gêne et ch'tait li qui, l'année qu'la djerre se dêclaithi et que j'fûmes tous appelés à faithe not's service, trouvait qu'i' s'sait temps assez d'appeler les Jerriais souos l's armes le jour que l's Allemands êprouvethaient à attêrrer ichin.

 

Et don pour vos dithe, il interrompait l'autre à touos moments et finit par li dithe, “Bah, bah, j'n'avons pas besoin d'oui tout chu niollin-là, fouorre toutes ches paperasses-là dans ta pouchette et liait les à ta grand'mèthe quand tu vaindras siez-té.”

 

Et se touânant de notre côté i' dit, “Ah ça, ch'n'est pas tout chenna! Tch'est qu'j'allons mettre Juge?”

 

“Dame!” je li raîponîmes, “ch'est ès êlecteurs de l'Ile à décider chenna, i' n'est pas du ressort des Chroniques à suggéther des candidats. I' dait y aver oquo d's hommes tout pliain, sapresti!”

 

“Oh vaithe i' y en a! L'Evening Post nos en donni toute une série hier au sé. Mais i' y en a oquo bain d'autres qu'i' n'ont pas nommé. I' y a Bill Merlespi de par siez-nous, qui n'a rain à faithe et des sous tout pliain. Il est vrai qu'i' n'a jamais fait grand'chose pour sa pâraisse ni pour l'île. Mais ch'est un homme assez intelligent et qui peut chiffrer. Il est tréjous nommé sus l'Comité pour passer les comptes du Connaîtablye.

 

Et pis il est provenu d'une bouanne race de viers Jerriais. San grand'pèthe avait 'té Cap'taine de la “Seaflower” ès Robins, dans l'temps qu'on faisait l'mêtchi d'la pêque à Terreneuve. San pèthe fut Inspecteur des C'mins pour des années, jusqu'au jour qu'i' fut mins Chantnyi.

 

Selon m'n opinion ou n'pouvez pas y mettre un miyeuthe homme.

 

Et si en cas, pourtchi pas former une députation envers Gaspard Barredemine.

 

V'là un homme qu'a passé une partie d'sa vie dans les carrièthes et qui sait bain tch'est ch'est qu'un morcé d'granit.

 

Je veurs bain admettre qu'i' n'est pas un grand sorte d'orateur, quoique il a d'la goule tout pliain quand il est un mio caud.

 

Mais ch'n'est pas les siens qui font les pus biaux discours dans l's Etats qui sont les pus utiles.

 

J'ai tréjous oui que ches sus les Comités qu'un homme fait preuve de sa valeur.

 

“Un homme comme Gaspard vaudrait san paids en or sus l'Comité pour les Grandes Routes ou sus l'Comité des Cauchies.

 

Par suite de s'n expérience i' pouorrait s'asseuther que dans toutes les constructions, que che sait sus les cauchies ou à bâti des êdifices publics, nou se servithai du miyeu granit que l'île puisse produithe et qu'les sous du public ne s'saient pas gâzouollis à acater du robbidge.

 

Et je pouorrais en nommer oquo bain d'autres à tchi qu'ou n'avez jamais pensé.

 

I y a Samuel Bliancoq, qu'a tréjous fait une spécialité d'êlever d'la volaille. V'là un homme qui, une feis dans l's Etats, n'se don'nait pas un moment de r'pos devant qu'd'aver fait passer un règlyement pour interdithe l'entrée dans l'île d'la quantité d'oeus d'origine douteuse et d'la volaille inférieure que nos arrive de la Sibérie et ailleurs.

 

Daniel Gratte-Papi, l'Enregistreux, Maît'e Frédéric Attrape-Sot, l'ancien mâtchignon, Tom Beaupré, le tcherpentchi d'navithe; Avous perdu d'veue les qualifications de ches gens-là?”

 

“Man pouore garçon,” se fit iun d's autres, “sus touos les candidats qu'tu vains d'nos nommer-là i' n'y en a pas iun qui pouorrait faithe.”

 

“Oh vraiment?” riposti l'autre, “en connais-tu iun don té, qui vaudrait mus qu'ieux?”

 

“Ah oui dame! Et pis iun qui, dans l'cas d'une êlection en f'thait des vouaix, sustous dans la campagne.”

 

“Oh bon! Et tch'est qu'est chu phénomène-là mon doux?” les autres s'êcriyithent.

 

“Eh bain, voulous que j'vos l'diche?”

 

“Oui certainement, nomme-le!”

 

“Eh bain ch'est l'CAOUAIN!”

 

Caouain

1931