1958: L'Assembliée d'Jèrriais

 L'Assembliée d'Jèrriais

 

La dreine rêunion pour ch't année eut lieu Vendredi l' 12 dé Décembre dans la Salle Parouaîssiale dé St. Brelade. Lé temps n'tait pon bein encouothageant, mais à bein près 120 membres lus y rêunitent quand même. Et ch'est seux qu'i' fûdrent tous contents d'y être v'nus, car ch'fut eune raide bouanne séthée d'Noué. La salle 'tait bien caoffée et décorée auve un bouaix et toutes sortes dé décorations d'Noué. Les danmes du Conmité Dramatique avaient bein travailli l'arlévée!

 

D'vant c'menchi l's affaithes pour la séthée, l'Président, l'Sieur C. P. Billot, fit la bein-v'nue au Connêtablye Chevalier et à sa danme qui 'taient v'nus passer lus séthée auve nous.

 

Lé rapport du mais d'Novembre fut liu et approuvé et deux nouvieaux membres fûdrent êlus.

 

Lé Président annoncit qué l'Conmité Dramatique avait arrangi l'restant d'la séthée, et i' mînt l'affaithe dans les mains du Sieur G. Le Masurier, l'Président d'chu Conmité là.

 

Divèrtissements.

 

L'Sieur Arthur Querée nos r'citit eune pièche et Mme. Blampied et l'Sieur du Tôt nos donnitent un dialogue; comme chansons j'eunmes tous l'pliaisi d'oui la belle vouaix au Sieur B. Amy et les Messieux G. Perchard et G. Le Masurier nos amûsitent hardi avec eune chanson entouor des soudards.

 

Y'eut des gammes dé pus d'eune sorte, des excitantes et des pus tranchiles; enfin, y'en avait pour touos les gouts. Pour fini la séthée, tous chantîdrent dé bouan tchoeu des bieaux cantiques dé Noué et “L' Bouan Vièr Temps.”

 

Raffraichissements.

 

Quand vînt dgiex heuthes, les danmes dé St. Brelade et du Conmité Dramatique nos servîtent un bouan souper qui fut bein appréchié.

 

Annonces.

 

Lé Sieur Le Masurier èrmercyit touos les siens qu'avaient prîns part ou aîdgi sus autchun sens pour faithe eune si bouanne séthée. L'Président annoncit qué l'Dîner Annuel etha lieu Vendredi l' 23 d'Janvyi, à l'Hôtel Bree, et en même temps souhaitit un “Bouan Noué” à touos les membres.

 

Avis: Si 'ous avez idée dé v'nin au Dîner, vos pliaît-i' payer vot' souscription au pus vite - si ou' n'l'avez pas dèjà fait - R'gardez étout dans la gâzette du 3 Janvyi pour des dêtails. Un Bouan Noué à Tous!

 

1958