1951: Les d'vis du Bouan'homme George

 Les d'vis du Bouan'homme George.

 

"I' va chèrchi la ville par lé vièr châté, ch't'ila !” nouos dît ma belle-méthe : “Est-che p'pèe qu't'entends, Maman ? Françouais lî d'mandit : “Nannîn, Françouais,” ou lî rêponnit: “Dgieu mèrci, tan p'pèe n'est pon si bête ! Ch'n'est pon d'lî qué j'pâlais, - ch'est d'un homme qué tu n'connais pon !” "Pourtant, m'mée,” Mêrayeu lî dit: “I' n'tait pon achocre quant il fait janne !” “Tu dév'thais bein saver, té, Mêrayeu ! “j'lî dis: “Dépis tch'i' t''faithait la carre!” "Ch'n'est pas vrai !” ou m'dit: “Et tu l'sai bein ! Tchi chance qué j'avais d'aller auve un aut' janne homme - auve té à m'sièthe partout et m'mèe à t'en couothagi ?”

 

“V'la tchi montre qu'ta m'mèe avait bouan goût, ma femme !” j'lî dis : "Véthe, George,” s'fît ma belle-méthe : “Mais tu n'avais pon les deux pids dans un sou'yer n'tout ! I' n'té fallait pon fort d'encouothagement. Enfin : Ou' n'avez pon 'té trop malheutheux.” “P't'êt bein, m'mèe,” s'fît Mèrayeu: “Mais tu sai bein té-mème tch'i' faut s'graie d'ité comme nou-s a ! Dis nous, don, tch'est qu'tu-as ouï entouor' chu pouor' Ph'lippe Rondé. J'tions à l'êcole ensembl'ye, mais je n'l'ai pon r'veu d'pis qu'i' tchittit l'êcole pour aller au Collége !”

 

“Pour vous en dithe la véthité,” ma belle-méthe nouos dît : “I' n'a janmais fait grand'chose qué d'dêpenser I'bein qu'san péthe lî laissit. I' n'avait janmais travailli sus la fèrme viyant tch'il avait 'té à l'êcole toute sa vie. A la pliaiche dé tchultiver ses tèrres, i' s'mînt dans la tête tch'i' d'vait l'y-aver eune maniéthe dé faithe des sou pus vite qu'a craître des patates. Tchique âmice lî dît tch'i' l'y-avait eune forteune à faithe à êl'ver des poules, - et qu'l' y-avait des machînnes en Améthique pour faithe des pouochîns ?” “P'pèe,” s'fît Douard : “Comment qu'des machînnes peuvent faithe des pouochîns ?” “Eh bein, Douard,” j'lî dis : “L'y-a des machînnes pour couer l s'œux, - mais laisses don Maman nouos raconter s'n'histouaithe !

 

“Lé Ph'lippe a trejous fait tout à l'arbours !” ma belle-méthe contînuit : “S'il avait acaté ches machînnes-là en Angliétèrre, i' l's'éthait ieus à millieu marchi, mais nannîn, - i' fallait les faithe vénîn d'Améthique. Lé v'la don auve un tas d'ches maniéthes dé bouaites-là sus les bras. I' les mînt dans la tchèrquéthie en attendant pour des œux à met' dédans. A la pliaiche d'en acater, i' pensit qu'ches-sait millieu marchi d'acater des poules pour en pondre, ch'est pourtchi il eut l'janne Fraînque Le Feuvre, tch'avait apprîns à tchèrpenter siez Mess De Caen Fred, a lî bâti un bieau grand poulailli, et il acatit eune chentaine dé poules. I' mînt l's' œux dans les machînnes à couer, mais les pouochîns n'dèhallaient pon ! L'pour' Ph'lippe né savait pon tch'i' fallait les cauffer, - et pis, étout, l's'œux n'valaient rein pour couer viyant tch'i' n'avait pon acaté d'côs pour met' parmi les poules !”

 

“Dans tout chu temps-là ses tèrres 'taient à paître ès coucous, et i' viyait tant d'pîsse-en-liets partout qué v'la tchi lî donnit l'idée d'êl'ver des lapîns et les vendre au marchi ! I' décidit qu'ses machînnes à couer des pouochîns f'thaient d'fichues belles casses à lapîns, ch'est-en-tchi i' vendit ses poules et acatit des lapîns. Il avait veu dans un livre ioù qu'nou pouvait en acater à bouan marchi en Angliétèrre, et né v'la not' Ph'lippe marchand d'lapîns !

 

“I' n'fut pon longtemps d'vant dêcouvri qu'ches p'tit animaux-là pouvaient mangi quâsi autant comme des couchons, et i' n'pouvait pon ramâsser assez d'pîsse-en-liets pour les engraissi! Il ouffrit douze sou par séthée à touos les mousses dé l'êcole tchi voulaient l'i-en ramâsser, et quant i' cartchulit combein d'sou tch'il avait dêpensé dans une sémaine pour souangni ses lapîns, i' décidit d'les vendre et d'aller à san jour pour gagni sa vie !”

 

George d'La Forge.

1951