1958: Ph'lip va au Show d'l'Île

 Ph'lip va au Show d'l'Île.

 

Moussieu l'Editeu,

 

Ch'est drôle assez, mais savous bein que toutes les fais que j'vais à un grand show d'bêtes je n'vaut pas quatre sous l'préchain jour. Je n'sais pas si ch'est l'temps ou l'excitâtion quand tchique bouonne clâsse est dans l'ring, ou même l'êffet d'ma mârisson quand la vaque ou g'niche que j'ai chouaisi est minse au mauvais but d'la ligne, mais seux et cértain que l'jour d'après tout chein que j'veur faithe ch'est d'm'êtrav'lé sûs l'sofa, avec ma pipe et tchiquechose à lièthe. Ch'est drôle, Moussieu, comme j'vos l'ai dit, mais ch'est d'même. La Merrienne, bein seux, éxplique chonna d'sa faichon, mais ch'n'est pas vrai, Moussieu, car j'vais à un show pour vais les bêtes, et si tchiquefais, par accident, je m'trouve dans la bar, j'n'y reste pas pûs d'une dém'ieuthe ou d'même.

 

Ach'teu, bein seux, ou voulit savé tchèsque avait gâgni les prix et j'fit d'man mûs pour la satisfaithe. J'l'y dit, en qu'menchant, que dans les boeux le Jack A'Court avait yeu un raide bouon jour. Preumyi dans les boeux d'deux ans, preumyi dans les viers boeux, et pûs qu'chonna, le championnat et l'rêserve champion.

 

“Oh!” ou s'fit, “eh bein, ch'n'est pas tant pièthe, mais après tout y fallais s'y'attendre, car le John est bouon Saint-Ouennais. Mais, dis-mé, tchèsque le Frainque Avri a fait?”

 

“Raide bein étout,” j'l'y dit, “mais à prendre yun dans l'autre ch'tait l'jour à Jack A'Court. L'année tchi veint ch'pouôrrait être le tou au Frainque.”

 

“Et dans les vaques,” ou d'mandit, “les Juges ont-y fait à tan goût? Par exemplye, approuvais-tu d'la bête tch'ils ont chouaisi pour le championnat?”

 

“Damme, oui,” j'l'y dit. “Ils éthaient yeu une djobbe à s'trompé-là. La minute que j'l'ai veue j'ai seu tchi faudrait tchiquechose d'éxtra pour la battre.”

 

La bouonnefemme me d'mandit a tchi qu'oulle appartenait.

 

“Au Jack Rondé, des P'tits Canons,” j'l'y dit. “Ch'est bein r'gréttablye, mais je n'crais pas qu'ch'est yun de tes couôsins.”

 

Ou châtchit la tête. “J'n'ai autchune mémouaithe de chu nom-là dans notre famille,” oulle admint, “mais, dis-mé, Ph'lip, mes couôsins d'Saint-Martin, les Richardsons, d'vaient aver tchiquechose là.”

 

“Oh vèthe, ma vieille,” j'l'y dit, “le Gerald avait une jeune vaque tchi vint traisième dans sa classe et rêserve pour le championnat.”

 

“Ah!” ou s'fit, “et sans doute ch'est une bouonne bête?”

 

“Vèthe,” j'l'y dit, “mais comme prèsque toutes les vaques que la famille Richardson ont montré, j'trouvais qu'ou n'avait pas assèz d'bathi. Tu sais, Merrienne, les vaques sont comme les femmes; y'en a tch'en ont trop, et y'en a tch'y n'en ont pas assez.”

 

“Oh, mais, Ph'lip,” est'che-là d'tchi dithe?” ou s'êcriyit.

 

“Je n'sais pas, Merrienne, mais ch'est la véthité,” j'l'y dit. “Quant à chutte vaque, oulle est bouonne, mais ch'n'est pas la fameuse Graceful Lady.”

 

“Ah, chétte-là,” ou s'fit, “nou n'en vait pas comme la Graceful Lady touos les jours. Te r'souveins-tu, Ph'lip, que j'taimes là touos les deux le jour qu'ou fit l'championnat d'l'Ile à l'âge de douze ans? Nou ne r'vêrra jamais chonna.”

 

“Nan”, j'l'y dit, “mais ch'tait une vaque bein r'mêrquablye. Ach'teu, pour en fini. Dans les boeux d'un an, le quatrième au mais d'Mai vint preumyi, le preumyi au mais d'Mai n'fit rain, et l'deuxième au mais d'Mai eut une djobbe à v'nin quatrième.”

 

“Mais,” ou s'fit, “absolûment les boeux n'peuvent pas changi tant dans trais mais. Je n'comprends pas chonna du-tout.”

 

“Ch'n'est pas tant les boeux tchi changent, ma vieille,” j'l'y dit, “ch'est les Juges. Ach'teu, j'n'ai pas tout-à-fait fini. Dans les g'niches r'nouv'lées tout fut assez bein, sûs un sens, car les trais preumiéthes montraient d'gros piéchots et 'taient en raide bouonne condition. Y fûtes hallées assez vite, mais après chonna les Juges ne pathaissaient pas trop bein savé tchi faithe. Y'en avait yunne tchi ne r'gardites pas que j'éthais mint quatrième ou réserve, mais ch'tait une assez sale clâsse à jugi après les trais preumièthes, et nou n'pouvait pas s'plaindre. Dans les viaux d'un an y'eut des surprinses et des d's'appoint'ments.  Par éxemple, la g'niche tch'avait fait l'preumyi au mais d'Mai, après avé tait le junior champion au show des trais pâraisses de l'Est, n'pliut pas ès Juges chutte fais, mais y faut dithe étout que dans m'n'opinion, oulle avait yeu pûs qu'ou n'méthitait au r'nouvé. Et ne v'là tout que j'ai à t'dithe du show, Merrienne.”

 

“Bon,” ou dit, “tu n'as pas fait tant pièthe: R'endors-té.”

 

Ph'lip.

1958