1958: Rapport dé la Rêunion Générale Annuelle, 1958

 Rapport dé la Rêunion Générale Annuelle, 1958.

 

La Rêunion Générale Annuelle eut lieu, Vendrédi l'26 d'Septembre, dans la Salle d'Agritchultuthe, St. Hélyi, et i'y'avait eune s'ptantaine dé membres présents.

 

D'vant c'menchi l's affaithes dé la séthée, lé Président payit un tribut à un membre décédé, et d'mandit ès gens d'lus l'ver eune minute en silence à sa mémouaithe.

 

Lé rapport dé la dreine Rêunion fut liu et approuvé. Lé Trésôryi avait un rapport financyi tch'avait té examiné par les auditeurs; et y'avait eune bouanne balanche en faveur dé l'Assembliée.

 

D'vant c'menchi l's êlections d'Officièrs, lé Président (l'Sieur Chs. Billot) les r'mèrcyit tous, aussi bein comme touos les siens sus les souos-conmités pour toute l'aide et tout l'support tch'il' avaient donné duthant l'année tchi s'était passée. I'dit qué l'Rédacteur, lé Sieur F. Le Maistre méthitait d'être bein r'mèrcier pour tout l'travas qui faîthait à prépather l'Bulletîn. Lé Sieur Ernest Vibert èrmercyit l'Président pour aver fait si bein duthant l'année.

 

Ensuite suivit l's êlections et né v'chin la liste des Officièrs pour l'année tchi veint:-

 

Présidents d'Honneu: Les mêssieux H. Le Riche Edwards et S. G. Crill.

 

Membre d'Honneu: Moussieu G. W. Bertram.

 

Président: Moussieu Chs. P. Billot.

 

Vice-Présidents: Mêssieux F. Trachy, H. M. Gibaut, et Mesdames K. Le Maistre et F. Perrier.

 

Trésôryi: Moussieu Ph. Le Moignan, “Cardiff House,” Coin Varin, St. Pierre.

 

Trésôryi assistant: Moussieu J. N. Richard.

 

Ségrétaithe: Mlle. E. L. Syvret, “Midhurst,” Léoville, St. Ouen.

 

Ségrétaithe assistante: Mme. A. L. Perchard.

 

Auditeurs: Mêssieux Ph. Le Ruez et R. Le Rossignol.

 

Membres du Conmité Exétchutif: Les Mêssieux F. Le Maistre, W. du Tôt, G. J. Perchard, Frs. J. Hacquoil, P. J. Romeril (Chent'nyi), H. R. de M. Taunton, J. Quérée, Mme. P. Green (Députée), Mme. E. Le Sueur, et les Dlles. L. Picot et K. Le Boutiller.

 

A la fin d's êlections l'Président dit comment qu'il avait grand r'gret qué lé Sieur Raymond Baudains avait décidé de tchitter comme Trésôryi, et i' lé r'mêrcyit pour la maniéthe qu'il avait gardé les livres pour tchiques années et pour tout l'travas qu'il avait fait pour l'Assembliée et en même temps dit qué nou-s-avait l'Sieur Ph. Le Moignan qu'avait té s'n assistant, à l'rempliaichi, et qué nou savait tous bein qué les livres es-saient acouo en bouannes mains.

 

Divèrtissement.

 

Comme divertissement les membres fûdrent d'mandés d'êprouver à trouver eune faute d'împrîmthie dans iun des Bulletîns. Tous 'taient bein intérêsis car y' avait un bouan prix à la fin, et Mlle. K. Le Boutiller l'gagnit.

 

Lé Sieur G. Perchard avait chouaisit des sujets pour des dialogues împromptus, et sept coupl'yes prîndrent part. I' nos amusîtent hardi, car y'avait dé bouans sujets.

 

A la fin des dialogues lé Président èrmèrcyit les siens tch'avaient prîns part et annoncit la prêchaine rêunion mensuelle pour Vendrédi l'24 d'Octobre, et qu'les détails es'saient dans la gâzette pus tard.