1951: À Saint-Louothans Mêcredi

 À Saint-Louothans Mêcredi.

Merrienne est déterminée.

 

Moussieu l'Editeu,

 

Ch'tait Jeudi au sé qu'la Merrienne se fit après l'tais. “Eh ben, man Ph'lip, ne v'là l's'êlections bétôt toutes finies, et ch'est p't'être tant mûs.”

 

“Sûs un sens, vèthe,” j'l'y dit, “mais avec chonna j'ai grand dêpié qu'Saint-Ou a laissi l'occâsion passé si trantchillement. Après tout ch'n'est qu'une fais par trais ans, et nou dév'thait avé drouait a un mio d'fun.”

 

“Sans doute,” ou dit, “mais au mains la pâraisse à trouvé un bouon candidat. Y ne s'sa pas dans l's'Etats pour dithe 'même opinion', le Mâjeur.”

 

“Ah, damme, nan,” j'l'y dit, “car il a une tête ch'ty-là. Mais te r'souveins-tu d'l'êlection y'a trais ans?”

 

“Je n'la r'oubliethai pas,” ou raiponnit. “Y tchiyait d'la plyie à verse, et y'avait du pité bétôt jusqu'au g'nou. Je fut trempée jusqu'à la pé, de tchi qu'j'en fut au liet pour presque une semaine. Quant à té, aussi ben n'en pâslé pas.”

 

“Ah, mais, êcoute, Merrienne,” j'l'y dit, “si je n'me trouvait pas trop ben l'préchain matin, au mains je n'réstit pas souos les lincheurs quand vint l'temps pour me l'vé.”

 

“Nan,” ou dit, “ch'est vrai. Tu n'réstit pas souos les lincheurs parsque tu'attrapit un couplye de bouons co-d'pids dans l'dos. Ch'tait avec ben d'la peine que tu t'habillyit, et quand tu d'vallit les d'grès tu faillyit t'rompre le co. Mais n'en v'là assez d'chutte bordée-là. Chen que j'voudrais savé ch'est tchèsqu'y s'en va s'arrivé à Saint-Louothains.”

 

“Et mé étout,” j'l'y dit, “mais quand y y'a trais candidats pour deux postes y peut s'arrivé d'ben drôles de choses. Te r'souveins-tu d'l'êléction pour Chantgniers ichin à Saint-Ou quand l'candidat tch'y n'avait autchune chance tchiques jours devant, vint l'preumyi par deux vouaix?”

 

“Oui,” ou dit, “y'eut du drôle de travas chutte fais-là. Mais absolûment, Ph'lip, un homme tch'a sérvi la pâraisse pour d's'années comme Chantgni et Chef de Police, et tch'est actuellément Député, dait methité un mio de r'connaissance. Et san collègue étout. Il a fait un bouon Chantgni, et s'y veur être Député, pourtchi pas?”

 

“Tu'as raison là,” j'l'y dit, “et si ch'avait tait aut'fais y n'éthaient yeu rain à craindre, ni yun ni l'autre. Mais, comme j'l'avons dit ben des fais, bouonnefemme, les temps sont changis et l'monde étout. Aut'fais quand un homme avait fait un bouon Chantgni ou Député, nou l'méttait Connêtablye, et sûs ses viers jours nous en faisait un Juré-Justicier, mais ach'teu n'y' en a pas yun tch'y n'est pas en dangi d'être fichi à la porte. Ch'est les femmes tch'ont fait chonna. Ch'est yeu tch'y sont résponsablyes pour le fait qu'un homme en poste n'a autchune seûzeté.”

 

“Ch'est un mensonge,” ou dit. “Si nou donnait l'drouait d'vouaix ès femmes seulement, n'y'éthait pas tant d'bêtises de faites. Mais, chu tràisieme candidat à Saint-Louothains, le connais-tu?”

 

“De veûe, seulement,” j'l'y dit, “mais yun d'ses supporteurs m'a asseûthé tch'il a la langue ben pendue et tch'y s'sait ben utile dans l's'Etats.”

 

“Quant à chonna,” ou dit, “j'ai tréjous r'mértchi que l's hommes tch'y font pûs d'ma dans l's'Etats ch'est les siens tch'y peuvent bâillyi d'lûs béques. Pour mé ch'n'est pas une r'quémendâtion qu'un candidat à la langue ben pendue. Je s'y pérsuadée que si touos les membres entendait haut comme des chouques, et n'pouvaient pas dithe un mot, l's'affaithes îthaient mûs.”

 

“Une drôle d'idée,” j'l'y dit. “A qu'menchi, personne ne séthait de tchi qui s'agissait, et comment qu'un homme se prendrait pour dithe 'contre'?”

 

“Y pouôrrait tréjous châtchi sa tête,” ou dit. “Mais, êcoute, Ph'lip; y faudra allé à Saint-Louothains Mêcredi au sé pour entendre le r'sultat. Le Bram s'y'en va, et sans doute y nos r'apportétha.”

 

“Vèthe, mais, Merrienne,” j'l'y dit, “as-tu câltchulé tch'y s'sont longtemps à conté les vouaix, et qu'chonna finitha assez tard?”

 

“Je n'm'en fiche pas mal,” ou dit. “Je m'y'en vais, et si l'faut, j's'y prête à resté là jusqu'à quatre heuthes du matin.”

 

Ph'lip.

1951