1931: Fête Venitienne

La s'maine passée les organisateurs de la “Fête Venitienne,” à St. Aubin me firent l'honneur de m'chouaîsi pour agi comme iun des Juges.

 

Ile eurent la courtouaisie de m'adressi à notre bureau une enveloppe contenant un “badge” et un extra billet d'admission pour si j'voulais emmener un amin avec mé.

 

Mais je fus assez indiscret d'ouvri chenna en la présence de Marie Hibou, et dès qu'ou vi l'billet qu'était mertchi “Complimentary Ticket” ou s'êcriyi, “Ah bain! Je m'en vais y aller avec té. Jamais je n'y ai 'té oquo, et puisque j'peux y entrer pour rain, je m'en vais pas mantchi l'occasion.

 

J'avais fait d'autres plians, mé, et chenna ne m'arrangeit pas du tout, mais tch'est qu'je d'vais faithe?

 

Autchune objection d'ma part aithait simplyement augmenté sa dêtermination, ch'est pourtchi je li dis, “Eh bain ch'est allright ma chiéthe, mais i' n'faut pas t'attendre que tu pourras me siéthe partout quand je s'sai à jugi les classes, i' faudra qu'tu t'amuses du mus qu'tu pouorras.”

 

“Oh laisses-mé faithe,” qu'ou n'dit, je pouorrai tréjous m'arrangi.”

 

Et don, quand j'arrivîmes à St. Aubin par le train de sept heuthes il 'tait oquo pliain jour et comme i' n'y avait oquo rain en allant je nos en fûmes nos promener le long du boulevard.

 

Opprès qu'j'eûmes 'té deustrais perques ou s'arrêti tout court et s'mins à humer l'air, “Oh! tch'est qu'nou sent?” qu'ou dit, “tchi bouanne odeur!”

 

J'étions justement en fache d'une boutique ouest qu'nous était à prépather des “Fish and Chips,” et comme ch'est là san fricot favori oud it comme chenna, “Je m'en vais entrer ichin.”

 

“Vas-y s'tu veurs,” je li dis, “mais j'n'ai pas l'temps mé, i' faut que j'aille à la tente du Comité lus annoncer que j'sis arrivé. Peux-tu m'êpaîgni un couplye de chelins pour les “besoins présumés,” de la séthée?”

 

“Et pourtchi faithe, mon doux? Tu s'sas fourni de tout ch'qu'i' t'faut dans la tente du Comité.”

 

Che n'tait pas fort une pliaiche pour quémenchi à nos entre harandgi, mais finalement, à forche de la supplier, ou fouollyi dans sa bourse et m'donni neuf sous en coppeurs. Heutheusement pour mé que j'avais ieu la prévoyance d'emprunter deustrais chelins dans l'titheux du bureau.

 

En filant pus liain je rencontri iun d'nos pus êminents journalistes, qui d'meuthe à St. Aubin et i' m'dit comme chenna, “Bon! te v'là Caouain, vaint-en jusque siez-nous en aver deux p'tit d'goûts.”

 

“Mercie,” j'li dis, “n'y a pas de r'fus.”

 

Mais arrivés à sa héche tchiqu'un vouli l'vaie pour tchique affaithe pus liain sus la cauchie et en m'disant, “Attends-mé ilo, j'm'en vais r'venin,” i' dispathu et malgré que j'resti là pour un quart d'heuthe je n'le r'vu pon.

 

Un désappointement comme chenna ne fit que d'augmenter ma sai ch'est pourtchi je r'touâni d'bord et m'en fu à la tente. Dès qu'l'homme en cherge vi man “badge” que j'avais êpilé sus ma câsaque, i' me d'mandi d'entrer et m'dit “Tch'est qu'ous allez prendre.”

 

Et j'nos arrangîmes à merveille.

 

Opprès qu'les autres juges furent arrivés, je fûmes dêtaillysis pour nos difféthentes bésognes et je fus nommé avec deux autres pour aller jugi les hardelles en “beach costumes” dans l'vier marchi. Ch'tait une job qui m'pliaisait assez bain et afin de m'atchitter de ma tâche comme i' faut et donner l'drouait là ouest qu'i' v'nait je souôtenais qu'il 'tait nécessaithe de les manier un mio et d'lus pinchi la couenne comme j'avais veu les juges faithe au show des bêtes à St. Cliément, mais iun d'mes collégues me soufflyi à l'ouotheille, “Mêfie-té, Marie Hibou est à t'dgetter à travers des “railings.”

 

Et de fait, je l'avisi là avec sa fache collée contre les balustres et avec des yiers comme des pistolets et je vis l'moment qu'on s'en allait faithe une scène.

 

V'là qui m'fit perdre tout intethêt dans man travas.

 

Quand la jugegie fut finie je m'en fu me promener un mio parmi la foule et j'rencontri m'n amin Reuben, qui d'meuthe auprès du Général Don.

 

I' pathaissait tout excité et m'dit comme chenna, “Oh Caouain, vaint-en par ichin vaie chennechin.”

 

Et i' m'emmeni auprès des “swings” qui pathaissaient être à faithe du bouan bisnesse.

 

Ch'tait quâsiment toutes des jeunes filles qu'étaient à lus craûler et pour dithe la véthité la manièthe qu'i' lus habillent acheteu ne s'adapte pas fort à chu genre d'amusement-là.

 

Châque feis qu'la “swing” erdescendait le vent s'empoutchait dans lus djaix-huit pouces de “skirt” avec un rêsultat qu'interêssait partitchulièthement la mentalité de m'n amin Reuben.

 

I' voulit don, me laissi partager avec li la veue de tout chenna.

 

Mais justement comme je c'menchais à y prendre un mio d'intethêt, i' m'arrivi un coup sus l'haut d'la nuque qui failli de m'abbattre sus l'carré.

 

Ch'tait Marie Hibou qui m'avait baîlli une ouape avec san paraplyie.

 

“En v'là assez!” qu'on s'êcriyi, “ervaint-en siez-nous immédiatement par le préchain train! Je m'en vais t'en baîlli mé des “Fêtes Vénitiennes” espèce d'abruti!”

 

Et mes chiers lecteurs, en présence de la foule qu'i' y avait dans l'train, ou m'en chanti du cliai et l'êpais jusqu'à notre arrivée en ville au grand amusement de touos les passagiers.

 

Jamais le pouore Caouain n'avait ieu une si grande honte, ni avait 'té si humilié.

 

Et oquothe au but d'tout je n'avais fait rain d'ma, mé!

 

Mais i' y a une chose qu'est bain certaine.

 

Si jamais les St. Aubinais me r'demandent d'aller à lus fête, je f'thai en sorte que Marie Hibou restetha à la maison.

 

Savous bain qu'chute garce-là me ruini ma séthée.

 

Caouain

1931