Une Visite siez l’Vétérinnaithe

 Une Visite siez l’Vétérinnaithe

par ‘Charlot’

 

Quouaiqu' je sommes que les deux en fanmillye, tchiquefais j'em demande si la Mélie a prins un louogi, car quand j'sis dans l'parleux a liéthe la gazette, j'l'entends a d'viser a la p'tite Minnette tch'est normallement endormie dans sa boête dans la tchuîsinne. Ch'est une catte assez intelligente, mais haînitcheuse, et la s'm'naine passée j' fumes oblyigis de la mener siez l'vétérinnaithe par-ce qu'oulle avait érfuser d'mangi pour au mains d'quatre jours.

 

Ch'tait pas sa preunmié visite siez l'véterinnaithe. Y'a tchique années j' l'avaimes enviée pour etre doc'trinée pensant que ch'tait un mâle cat, mais auprés l'avait endormie, le vétérinnaithe decouvri autrement, et l'operi accordant.

 

En entrons dans la salle d'attente, j'en pouvais pas craithe mes iers. Assis en attendons lus tou etaits nos viers anmins de bein a's'années, le Frainque du Pré et sa femme Flo. Le pouorre Flo avait les lermes es iers car son p’tit canârien avait avalé tchiquechose tch’avait resté collé dans son gôsyi. Le pouorre 'Coucou' 'tait êtravelé dans sa cage et n'avait pon l'air bein êvilyi.

 

"As tu éprouver a lis donner de l'huile de casto", j'em fit.

 

"Oh oui", Flo reponnit, "et Frainque y'a meme offert deux d'gouts d'ieau d'vie, mais rein n'travaille".

 

J'avais d'la peine a m'composer, pensant que p'tretre qu'el Coucou avait prins gout a la bouonne medicine, et qu'il en'tait endormi.

 

Y'avait plusieurs clients dans la salle, les uns auve lus tchian, d'autres lus cat, et y'avait même une mêthe auve son mousse tch' avaits apporté une cage remplyie de blianches souothis. Heutheusement qu'chais gens n'comprennais pas la langue jerriaise, car le Frainque auve sa forte vouaix nos assûthi bein que par siez li les southis sonts transportées sus des trappes, pas poupotées en cages.

 

Auprés une dgiexaine de minutes ch'tait l'tou a Coucou d'aller pour sa consultâtion, et l'resûltat en fût qu'el Frainque devint soulagi de tchinze louis a cause du vétérinnaithe tch'avait enl'vé une p'tite obstruction dans l'passage d'la gorge d'la p'tite criatuthe.

 

La Flo 'tait si heûtheuse de penser que son p'tit compâgnon r'etait dgêthi, mais l'Frainque avait l'mal au tchoeu d'penser tch'il avait ‘tait forchi d'debourser 'tant d'sous.

 

Quand a la catte, ou'lle a continuer a faithe du progrés suivant une înjection et du medicament du vétérinnaithe.

 

Comme tchi qu'tout change. J'em r'souvîns que dans mon pus jeune temps, des pathents n'aurais jamais penser d'envier un annima domestique siez vétérinnaithe. Nou les doc'trinné auve differents r'miedes, tchiquefais i'lus r'faissais, quandis que dans d'autres temps i' patchées lus vailes. Ches messieurs professionel étaits appelées seulement pour adminstrer en cas d'besoin parmi l's'animaux d'ferme.

 

Je liéthais y'a tchique temps entuours un vétérinnaithe tch'avait la chêrge d'une mênag'gie, et les grands risques tch'il prennait quand i fallait confronter les animaux sauvages. Ch'est une profêssion de devouément, et d'couothage et i methites nôt respé.

 

Clifford Laisney