1974: En c'min pâssant…

 En c'min pâssant…

 

Ottawa, Ontario, Cannada.

Lé 11 mai, 1974

 

Moussieu l'Rédacteu,

 

Quand j'sis en Jèrri et qué j'prends l'moto pour aller qu'si un pain à la boutique siez Bill Anmin, j'pense au temps qué j'soulions marchi d'la forge, ès Landes, à l'Êcole Wesleyenne touos les matîns man fréthe Fraînque et mé. Les mousses n'étaient pon poulotés dans chu temps-là. J'pâles des années 1900 à 1903. I' n'y avait pon d'motos par le c'mins et les mousses avaient à faithe sèrvi lus pids d'driéthe pour aller autcheun bord.

 

I' fallait sorti d'la maison à huit heuthes au matin pour êt' à l'êcole à neuf, et nou n'òsait pon êt' tard car lé maitre, Mait' Harry James Carter, 'tait strict et sévéthe. Si nou-s-arrivait tard, nou n'pouvait pon aller directement en clâsse. I' fallait s'mâter l'long du châchais, driéthe sén écritouaithe, et aver eune raison absolûment spéciale pour êt' tard. Autrément, ch'tait un coup d'badgette dans la main dévant aller s'assiéthe en clâsse. Les gens d'à ch't heu ichin en Améthique f'thaient un maître d'êcole êt' présenté d'vant Justice s'il avait l'malheur dé mett' la main sus lus mousses, auve lé rêsultat, sans doute, tch'i' n'ont autcheune idée d'obéissance ni d'disciplinne. Ch'tait' l'contraithe auve nous. Nou s'attendait d'aver la badgette si nou l'méthitait, et nou-s-aimait mus l'aver et en êt' tchitte qué d'êt' gardés dans l'êcole à faithe des sommes comme peunition quand v'nait l'heuthe dé s'en aller l'arlévée.

 

Lé trajet des Landes au Haut du Mathais 'tait eune aventuthe. Dans des temps nou pranait san cèrcl'ye et nou criyait qu' nou s'en allait couorre tout l'long du c'min. J'en avions tréjous d'bouans (cèrcl'yes) et d'bouans cros pour les bouler, car Papa nouos les faîsait dans la forge. Quâsi touos les mousses boulaient les leu en les tappant atout un bâton. Ché n'tait pon souvent qu' nou les boulait tout l'long du c'min car d'aut' mousses qué nou trouvait en c'min n'en avaient pon. Souvent nou pérdait întéthét dans l'cêrcl'ye et nou l'laissaît siez un mousse tchi d'meuthaît l'long d'la route ou nou l'muchait dans un clios et pis nou l'ramâssait en r'vénant l'sé.

 

Si un fèrmyi vouos pâssait auve sa vainne, nou couorrait souotre la vainne et nou s'pendait sus l'driéthe, les pids sus l'esseu si nous 'tait grand assez pour l'aveindre. Cèrtains fèrmièrs né l'pèrmettaient pon, dé peux, j'pense bein, qué nou sé f'thait du ma et tch'i s'saient considéthés responsabl'yes, et l'donnaient un coup d'fouet en driéthe pour vouos faithe laîssi couorre. Dans des temps nou-s-allait eune bouanne distance dé mème et nou pâssait des mousses tchi criyaient « Whip behind » à tue-tête au cacheux. Y'avait un fèrmyi, lé Sieur Jean Hamon d'La Fontaine, à côté d'la boutique à Maît' Fraînque Sélous, tchi nouos învitait à monter dans sa vainne. Touos' les mousses l'aimaient car il' 'taient seux d'êt' portés jusqu'à l'êcole quand i' sortait dans les huit heuthes pour aller en ville.

 

Nou n'pouvait pon marchi l'long d'eune muthâle sans la grîmper et marchi sus l'haut. J'm'èrsouveins tch'il' 'taient à bâti la cheinne tchi c'menche du carrefour où'est tch'est « Vanilla House » et tchi va (du côté sud) jusqu'au carrefour endrait l'Champ Donné. Eune fais finnie, oulle 'tait pus haute qué bein des pièches, et nou s'criyait tchiquechose dé pouver grimper sus l'haut et marchi d'ssus. V'la tchi n'faisait pon d'bein au but des bottes, tch'i' eûssent un bonnet ou pon, et nou-s-appréhendait qu' les pathents lus en apèrchevthaient. Eune aut' chose tch'ûsait hardi l'bonnet des bottes 'tait quand nou se sé m'ttait sus un g'nou à adèrchi l'allai quand nou jouait ès marbres.

 

Tchiquefais, nou-s-avait r'tèrgi en c'min et nou ouiyait la clioche dé l'êcole sonner en appréchant l'carrefour des Six Boules, et nou sé m'ttait à couorre au feu d'galop, arrivant à l'êcole touos êssoûffliés justément en temps pour sé rangi dans l'bel endrait l'entrée des clâsses.

 

En r'vénant d'l'êcole l'arlévée nou-s-avait pus temps car nous n'tait pon forchis d'arriver siez sé à la minnute. Tchiquefais nou faisait l'tou par la Route du Mathais, et nous jouait dans l'Mathais en pâssant. Et tchiquefais nou sé m'ttait dans la tête d'aller dans la boutique à Mess Le Feuvre, Potin. Nou n'avait autcheune idée d'acater rein - les mousses (à l'exception de p't-êt' eune démié-douzaine dans toute l'êcole) n'avaient pon d'sou à dêpenser - mais nou-s-aimait vaie l'potin dans la boutique.

 

Y'avait un tas d'crapauds en Jèrri dans chu temps-là, et les filles en avaient peux. D'temps en temps nou-s-en viyait iun l'long du fossé et tchique mousse 'tait seux dé l'haper et d'couorre souotre les filles atout. I' faisaient des cris, les filles, et happaient la pathe ava la route. Quand l'viyais tchiquechose dé mème, j'craingnais qué l'pouorre crapaud s'en allait aver du ma et j'faisais l'mousse lé r'mett' sus l'fossé.

 

Hélas ! Les bouans vièrs temps et les crapauds ont dispathu et les mousses d'à ch't heu n'trouvent pon d'aventuthes en c'min pour l'êcole. I' n'font qu'criailli un tas d'bêtîn à tue-tête dans les beusses!

 

George d'La Forge