1949: Flip, Merrienne et la mousse vont à Londres

 Flip, Merrienne et la mousse vont à Londres.

 

 

La Merrienne Le Gresley avait tréjous desclaithé a son Flip que jamais ou n'vendrait sa bouanne vache, “La Jenny.” Ch'tait la milleuthe vache du vaisiné pour le lait. Mais un bouan jour la merveuilleuse “Jenny” abandonnit tout d'un coup et pas une goutte de lait ne v'nait. Dans un rein d'temps ou vint maigre comme une hache et ou n'valait pas chinq chelins.

 

Un bouan jour ne v'la un Anglais q'arrive et en offrit vingt-chinq louis. En bein! s'fis Merrienne : “L'en vl'a une achorche.” Ou l'tait si contente qu'ou dis au Flip : “Si touous l's'Anglais sont aussi bête comme le sien qu'a achaté notre bête de vache j'allons aller a Londres.” Le Flip protesti, mais coumme une partie touous l's'hommes y n'tait que l'bouffon et fallit bein y consentit. La mousse dis a sa mèthe : “Mémês, faudra que pépès achate des pyjamas.” “Les pyjamas!” s'fis Merrienne, n'ya que l'Gouverneux qu'en met, qui prend sa grand ch'imsole. J'nai pas idée de passer mes gniets a cauffer ses pis.

 

Yen eu tintamarre dévant que l'balichon fut près, et les siens qu'éthaient peut vaient l'contenu éthaient bosté d'rithe. Des cotillons par la douzaine, et des robes qui l'taient si usées qui l'taient couleur de cuckoo.

 

Quant y vinrent au baté la brave Merrienne prins des billets de deuxième classe, mais tu sait bein Flip, j'allons allé dans la premièthe classe. On n'avait pas réalisé que l'inspecteur voudrait vais les billets. Vos billets, Mrs., y l'y dis. “J'peux pas vos les montrer, j'ai l'sé mins dans ma pouchette de sous. Ou n'pouvait pas l'vé sa robe en d'vant tout l'monde, chez pourchi ou s'mins a gnors et la mousse et Flip se minrent le tout d'yi, mais hélas quant ou éthaient yeu une pathe de longues veux ou n'éthaient pas seulement veut l'but d'ses ortès. Ou l'tait futhieuse, notre Merrienne.

 

A l'arrivée à Southampton fallait passé la Douanne et quant l'Monsieur vit la Merrienne y l'y d'mandit si oulle avait du s'no. “Est-ce la une question a me d'mander, ou s'fis. Y l'y dis pas, mais y vit bein que son nez était un mio croutteux. Y la fis ouvri son balichon mais quant y vit l'contenu y riait comme un bossu et l'y dis bein vite de fremé la boutique. Ou dis a yi même “p'tit senteux, grand salope.” “Mémès, s'fis la Mousse, j'ensais que touos l's'anglais étaient des bêtes.” “Ma laid p'tite garce,” se fis la mèthe, et l'y fianchit une bouanne chliamuse.

 

L'affaithe n'avait pas tounné coumme n'ou s'attendait. Avec les milles minsèthes y trouvirent une hotel, et y t'est si lassées qui s'en furent tout drait a haut. Le pourre Flip eut la pus mauvaise d'mehieuthe de sa vie. Ou n'fut pas assuthée devant que l'Flip eu ergarder souos l'yièt. N'ya rein la, autrement qu'la grande tasse, y lis dis. Chez bein, met l'yiet contre la porte.

 

Notre brave couple n'avaient pas oui pâler de la veue electrique. Pour t'chi avaient t'y la veue au haut du pliafond. Comment s'y prendre a la soufflier. La Mousse monti sus s'espaules a son pèthe. Le Flip monti dans une chaise et soufflit qu'il en vint a but d'vent, mais la boustre d'veue n'en changeait pas, tans que si bein y perdi sa patience, prend sa botte et la fiche a travers du bulb. “La, y dis, la v'la souffliée.”

 

Dans la gniet la Mousse se resveillit et ouit t'chique chose graté. “Mémès,” ou dis, “j'entends une southie.” La Merrienne fis une tait saut que l'Flip en sauti hors du yièt et s'trouvi dans l'fond d'la chambre. Ils ecoutirent pour deux minutes et y crurent que ch'tait des nouveaux mathiés en d'sus d'yeux.

 

A peine le soleil l'vé les v'là en route. Au Zoo fallait vaies les marmoussées, mais quant ils aperchurent la Merrienne y lus minrent tous sus lus jethets d'rièthe a la l'regarder. Chez pourre petits animaux sans doute virent une ersemblance. Les v'là aller au théâtre, mais quant Flip vit les belles jeunes filles, y vint manièthe d'excité, quasiment mauvais, et la Merrienne criait qui s'nallait prendre le mors ès dents.

 

L'affaithe allait de pièthe en pièthe, mais l'adjièvement du pliat ch'tait quant y furent dans l'train souos terre. Quant la Merrienne mins son pid sus la montée electrique ou s'trouvit emportée et fis l'pus laid cri : “Flip! Flip! j'men vais au ciel, soigne de la catte.” Et bein minse s'fis Flip, si s'sis pas pu important qu'la catte le ciel est trop bon pour y'i. “Pépès!” s'fis la mousse, “j'allons être portées nous, j'nai pas d'peux, mai.” Quant y vinrent au haut la Merrienne tait a gnors. T'chi d'jâtre et que tu'est a faithe la, s'fis Flip. “J'pensais que ch'tait la fin du monde, et t'chest a prié.”

 

Par chu temps là tous en n'avaient yeu lus t'choeu content, comme nou di ten pliat Jerriais y n'avaient yeu plien lus braies, Flip voulait du lard et des dumplings, Merrienne avait mat dans l'corps et faisait la peignole comme une poule qu'a la pépie, et la mousse tait d'mauvais humeur, un vrais trépi, j'vos l'garantis. Y s'en n'virent bein vite en Jerri. Y l'éthaient bein béni le sien qu'avait achaté la “Jenny”. Si ch'est qui vint d's'anglais lus offrir un bouan prix pour auchune de lus vaches, y l'accepteront, et mettront lus sous a la Banque. Quant a yeux, Jerri est la mielleuthe pieche du monde.

 

Deux ou trais jours après le Flip avait attachi un bouan dîner et tout tranquillement dis :

 

            “Merrienne,”

            “J'avons tait et sommes ervenus touos les deux,

            N'ya pas doute l'Angleterre chez merveilleux.

            Par les Anglais Londres est ercherchi,

            Mais quant a nous j'aimons t'y le p'tit Jerri.”

 

 

S. P. Le Ruez.