1973: La nouvelle année

 La nouvelle année

 

San Antonio, Texas,

U.S.A.

Lé 30 dézembre, 1972.

 

Moussieu l'Rédacteu,

 

Eh bein, nouos v'la en veue du c'menchement d'eune nouvelle année. Ch'est sans doute un êvènement tchi s'arrive touos l's ans, mais i' m'sembl'ye tch'i' r'veint pus vite tch'i' n'soulait à m'suthe qué l'temps s'pâsse. Nou-s-a d'la peine à craithe qué douze mais ont dispathu d'pis la dreine fais qu' j'avions célébré l'année tchi veint dé s'pâsser. Espéthons qué la nouvelle s'en va apporter la paix, l'bonheu, la santé et la prospéthité à tout l'monde.

 

Ichin en Améthique l's affaithes n'ont pon changi fort duthant l'année tchi veint d's'en aller prendre sa pliaiche dans l'histouaithe du monde. Ch'est acouo l'pays Améthitchain d'richesse et d'pauvrété – ouaithe qué nou peut dithe qué pèrsonne n'a bésoin d'mouothi d'faim s'il a l'avis d'faithe à saver sa dêtresse ès autorités. Ch'n'est pon manque d'êprouver à amender l'sort des pauvres tch'i' y'en a. Lé gouvèrnément dêpense des millions d'dollars à y'êprouver – bêtement, à m'n idée – car nou n'peut pon enrichi un publyi. Tant pus d'sou qu' nou donne au pièrcheux ou au mendgian, tant pus il en d'mande et tant pus i' n'sé gêne pon d'trouver du travas. Nouos louais ichin sont si généreuses à chu sujet-là qu' un homme tchi r'chait d'la pâraisse n'a pon bésoin d'accepter un aut' empliai tchi lî pathaît payi mains tch'i' n'gangnait quand i' fut mîns bas.

 

Quand eune pèrsonne peut r'chéver assez du gouvèrnément pour vivre sans travailli, ou n'chèrche pon d'travas. Quand j'tions à Gaspé, au Cannada, l'Député Ph'lippe de Veulle et mé, y'a tchiques années, j'tions à pâler à des d'scendants d'Jèrriais dans l'Hôtel Baker, et i' nouos donnîdrent eune bouanne idée dé chein tchi s'pâsse là-bas. L'hôtel avait bésoin d'main-d'œuvre, par exempl'ye, mais d's hommes en plieine santé tch'étaient là à s'lovier pour lus pâsser l'temps viyant tch'i' r'chévaient d'la pâraisse et n'avaient pon à travailli pour gangni lus vie, n'voulaient pon lus laîssi êt' embauchis dé peux d'pèrdre les sou tch'i' r'chévaient du gouvèrnément d'Tchubec à rein n'faithe, et d'peux, étout, qué s'il' 'taient mîns bas à la fîn d'la saison touristique il' éthaient p't êt' d'la peine à sé r'mett' sus la pâraisse. Sans vouler touanner Communiste, jé n'peux sénon admither l'dgide Russe tchi nouos disait, quand j'tions à Moscou : “En Russie, j'criyons qu' ch'est un honneu d'travailli, et les cheins tchi n'veulent pon l'faithe sont env'yés en Sibérie !”

 

Y'a quand-mème ieu des bouannes choses dans l'couothant d'l'année tchi veint dé s'pâsser. J'avons ieu la chance dé garder l'Président Richard Nixon dans la Maison Blianche à Washington. Un moussieu tchi n'a pon d'peux d'sa peine, ni des grosses têtes des syndicats des travailleurs. La dgèrre au Viet-Nam est, j'l'espéthons, sus l'pus. Nouos astronauts ont marchi sus la leune acouo eune fais. Y'a acouo des gens tchi disent qué ch'est des sou env'yés à la route et qué Washington éthait deu les donner ès pauvres à la pliaiche, mais comme j'l'ai dêjà mentionné, nou n'peut pon enrichi un publyi, et la Bibl'ye nouos dit qué les pauvres es'sont tréjous auve nous. Si j'avions laîssi la Russie c'mander l'espace des cieux sans y mett' lé pid nouos-mêmes, oulle éthait peu m'nichi tout l'monde d'en haut. Y'a, étout, la tchestchion des r'source dé matériel dé natuthe dé minnéra pour les bésoin d'l'industrie du monde entchi, tchi, d'après les savants, s'en vont êt' entchièthement faites sèrvi dans eune quarantaine ou chînquantaine d'années, et i' s'sa p't êt' pôssibl'ye d'en aver d'la leune. V'la tchi vouos r'sembl'ye probabliément riditchule mais les géologues Améthitchains ont dêjà chutte possibilité-là en veue, et ch'est ieune des raisons tchi les fait vouler analyser les rotchièrs et d'chets, probabliément volcaniques, tch'i' trouvent sus sa surface.

 

Eune aut' bouanne chose tchi s'est passée ch't année est qué l'Congrès à Washington s'est întérêssi dans les m'suthes nécessaithes pour aboli l'empouaîsonnement d'l'air par les gaz d'êcappe des tchuyaux d' “échappage” des motos. L'èrmiède s'en va prendre tchiques années d'vant êt' pèrfectionné. L'êcappe des motos fabritchis à ch't heu laîsse couôrre mains d'gaz empouaîsonneux, et il' ont l'ordre dé l'aboli entchièthement d'ichîn tchiques années. L'Congrès a passé des louais, étout, pour empêchi l'empouaîsonnement des rivièthes et des grand lacs, autrément tout l'paîson d'dans éthait péthi.

 

Ch'est assez drôle qué ch'est l'progrès tchi nouos a apporté l'aîse et l'confort tch'est en train d'empouaîsonner l'air tchi garde nouos poumons en allant et l'tchoeu battant, mais ch'est eune bouanne chose qué nouos gouvèrnéments s'en sont appèrchus en temps et tch'i' sont en train d'y r'miédgi.

 

Et tch'est tchi s'pâsse en Jèrri? Jé n'sai pon. La dreine gâzette èrchue est du 21 d'septembre. Jé n'sai pon tch'est tch'a gângni la Coupe des Enfuntchis à l'Eisteddfod ni l's êlections du mais passé. Mais v'la tch'i' n'm'empêche pon d'vouos souhaiter à tous eune raide bouanne et heutheuse nouvelle année tchi, j'l'espéthe, vouos apportétha toutes les bouannes choses qu'ou pouver d'sither pour vous-mêmes !

 

George d'La Forge.