1964: L'Êcole du Dinmanche

 L'Êcole du Dinmanche

 

En Améthique,

Lé 10 d'juillet, 1964.

 

Moussieu l'Rédacteu,

 

Dans ma lettre du 19 dé Mai, 1964, j'vouos racontais l's aventuthes dé ma janneche quand j'allais à l'Êcole Wesleyenne au Haut du Mathais à St Ouën. Aniet, j'm'en vais vouos pâler d'l'Êcole du Dînmanche dé chu temps-là.

 

Quand j'tais en Jèrri l'êté passé et que j'viyais les mousses dé l'aut' côté d'l'Églyise dé St George jouarder et pliailyi dans les bels et dans la route à la pliaiche d'êt' dans l'Êcole du Dînmanche, j'pensais au temps qué j'tais mousse mé-même et qu'les pathents faisaient l's êfants aller à l'églyise.

 

J'n'avions pon la vie si aîsie dans chu temps-là comme les mousses l'ont à ch't heu'. Touos les sanmedis i' fallait bliatchinner les bottes et souliers dé toute la maisonnée, pour êt' prêts à les mettre lé lendemain. Les pathents n'pouvaient pon êpaingni grand' sou à donner ès jannes, mais y'avait tréjous tchiques pénîns pour mett' dans la collecte. Lé dînmanche matîn, nou m'ttait ses bouans habits et une dgène emp'sée pour aller à l'Êcole du Dînmanche à l'Églyise dé St. George. Comme j'vouos l'disais dans ma lettre du 17 d'avri, 1964, Mess Maugi, Laïesse, 'tait l'Surîntendant et maître d'la preunmié classe. Moussieu Francis Philip Hâcou, pus tard Connêtabl'ye 'tait Surveillant d'l'églyise. Nou peut dithe qué Moussieu êt Madanme Hâcou et lus fanmile 'taient les pilyèrs dé St. George. Dé nouos jours, jé n'crai pon qu'les gens savent tchi bein tch'il' ont fait pour ch't églyise-là, et lus fis, Moussieu Fraînque, et sa danme y vont acouo touos les dînmanche!

 

I' fallait être à l'églyise a dgiex heuthes, et l'êcole duthait eune heuthe. La preunmié classe des garçons s'assiévait dans l'banc dé d'vant du côté d'l'Êpitre dé l'Autel, la deuxième dans l'deuxième banc, et l's aut' classes en drièthe l's eunes des autres, les pus p'tits l'pus drièthe. À m'suthe qué l's années s'passaient nou s'viyait appréchi du banc de d'vant et nou-s en n'tait ordgilleurs. À m'suthe, étout, qué nou montait d'classe, les leçons dev'naient pus avanchies. Dans l'banc dé d'vant i' fallait apprandre la Collecte et l'Êvangile du jour, et les saver par tchoeu. Les filles otchupaient les bancs dans l'même ordre d'l'aut' côté d'l'allée - lé côté d'l'Êvangile dé l'Autel. Dans chu temps-là i' n'taient pon assises parmi les garçons. Y'avait assez d'mousses à l'Êcole du Dînmanche pour en assièthe des deux côtés d'l'allée.

 

Ch'tait Maît' Tanminne Lé Cornu tch'était organiste, et les sèrvices 'taient en Français. Nou v'nait à saver quâsi tout l'service par tchoeu, et hardi des cantiques étout. Iun des favoris 'tait “Soleil de Justice”. Messieux Ph'lippe et Charles L'Cornu du Manyi d'Vînchelez dé Haut 'taient dans l'tchoeu, et v'la tchi valait la peine dé ouï Maît' Oualteur Perrée chanter la basse. I' fallait rester pour tout l'sèrvice, et j'lé trouvions long, prîncipalement quand ch'tait La Litanie. I' nouos sembliait qu'y avait eune chentaine de prièthes dédans tchi c'menchaient atout les mots “Qu'il Te plaise!” Les minnistres prêchaient d'longs sèrmons et nou-s avait d'la peine à s'garder rêvilyis. Nou n'ôsait pon êt' mêchant dans l'églyise viyant qu'nou-s éthait ieu honte si les pathents l'avaient ouï.

 

Y'avait deux choses tchi 'taient împortantes dans la vie du mousse y'a 65 ans. Lé Thée Annuel d's églyises des trais pâraisses, St. Ouën, Ste. Mathie et St. Pièrre, et l'Dînmanche des Prix. Tchi d's'appointement quand i' tchiyait d'la plyie l'jour du Thée! Nou-s avait attendu fête toute l'année pour chu jours-là. Nou-s allait pour eune belle prom'nade dans eune vainne auve des couossièrs à s'assièthe dessus. Tchiquesfais y'avait deux j'vaux. La fête 'tait à eune difféthente pliaiche touos l's ans, au Gardîn d'Olivet, au Manyi d'Samathés, au Haut du Mathais d'St. Ou. Les mousses s'assiévaient dans eune grand' tente sus des bancs l'long des tabl'yes à mangi de finnes beurrées et d'la gâche. Pour un tas d'nous ch'tait la seule gâche qué nou mangeait dans l'couothant d'l'année. Auprès l'thée y'avait des courses et des jeus.

 

Lé Dînmanche des Prix, à trais heuthes l'arlévée, pathents et mousses allaient à l'églyise, le pathents pour vaie lus mousses èrchéver lus prix. Il' 'taient arrangis sus eune tabl'ye dans l'allée et en d'vant d'l'Autel.  Auprès un cantique et la priéthe châque classe, c'menchant par la preunmièthe, sé mâtait d'vant la tabl'ye et l'Recteur criyait l'nom d'châque mousse et lî donnait san prix, et i' fallait dithe “Mercie Moussieu!” et aller sé r'assiéthe. D'habitude, les prix pour les touos p'tits 'tait eune Litourgie, eune Bibl'ye pour la préchaine classe et “La Nourriture de l'Ame” ou “Le Voyage du Chrétien” pour la traîsième. Quand nou v'nait dans la preunmié classe nou pouvait aller deux ans pour eune grand Bibl'ye, et ch'tait l'ambition des grands garçons et filles d'en gangni ieune.

 

Pour un tas d'nous la jannèche s'est passée mais, Dgieu Merci, l'habitude d'aller à l'églyise engendrée dans l'Êcoles du Dînmanche, est restée à nous êcliaithi lé c'mîn d'la vielleche!

 

George d'La Forge.