Lettre Jerriaise Dinmanche le 19 d'Octobre 1997

 Lettre Jerriaise Dinmanche le 19 d'Octobre 1997

 

 

Aniet Dinmanche le 19 d'Octobre 1997, chés acquo un pliaisi d'vos addrechi et l'honneu étchaie a Clifford Laisney d'passer chinq minutes a exprimer tchique reminiscences dans not ancienne langue. J'pense bein que la Vautiethe, la Grisotte, la Bisson, et la Conneresse ne sonts pas des mots tchi signifie grand chose a la majorité d'gens t'ch'écoute a matin, mais j'vos d'm'nande d'értchuler l'temps, faut dithe une quarantaine d'années. Les gens tchi 'taits en fermage lus r'souven'rons que toutes animaux d'établye étaits connus par lus nom.

 

Aujourd'aniet j'comprends que ch'est essentiel de garder un grand nombre d'bêtes a cause d'économie, et d'même ch'n'est pas possiblye d'accorder l'attention individuel que j'faisaimes quand une ferme contenant une dgiexaine de bêtes était considethée mouoyenne.

 

Ch'est rare aujourd'aniet d'vaie une rangie d'vaques attachies au lion, sans pasler d'les vaie en'v'loppées en couvertuthes de telle ou pouque a bran.

 

Ch'tait la couteunme quand l'temps 'tait mauvais qu'aussitôt tch'i entraits a l'établye nous lus offrait une écaudeuse de bran. En orde de cauffer ieau i 'tait nécessaithe d'alumer le cappeur.  Devant que la machinne a traithe fusse inventée, la couteunme 'tait de traithe a la main et normallement ch'nna 'tait la responsabilité du maitre, sa femme et l'domestique. Une personne tchi trier siez vaques a l'heuthe etait considethé bouon trieur, et quand i fallait aver l'lait prêts pour le marchand d'lait a siez et d'mie du matin ch'tait pas une affaithe de rester entre les lincheurs a s'entre catouilli.

 

Dûthant l'temps d'l'otchupation ch'tait m'n'habitude de bêthe une verrée d'lait caud aussitot trait, une chose que j'pourraits pas faithe achteu pour autchune somme.

 

Quand les vaques couochées dehors dûthant la saison d'Eté nous aller traithe au clios et souvent dans l'haut d'Eté quand les moques tormentées les pourres bêtes, ch'tait si emm'lassons d'aver une bête tchi piedtonner et tchi vos lacher un coup d'coue a travers les ouothelles.

 

J'avaimes un tchian tchi s'app'ler 'Dick', et trejous quand j't'aimes a traithe le tchian s'assievait a coté d'nous, ouvrer sa bouoche et d'temps en temp nou li mither l'tron. I 'tait si émerciant.

 

Plusieurs fais par jour fallait ermouer les bêtes, et ch'tait important d'aver un bouon maillot, car souvent en temps d'sequeressse la terre dev'nait dûthe et quand l'maillot bûché fallait servi du talon.

 

J'en sait pas pour achteu, mais l'temps passé ch't'ait commun quand une vaque r'nouv'ler ch'tait suivi par une fievre d'lait, et y'avait des gens tchi pompées l'pîechot en orde d'aidgi la bête a controller sa temperatuthe. Vos en r'app'lous des p'tits ribans tchi 'taits attachis a chaque trôn en orde j'pense, d'ertenin l'air tch'avait 'tait forchi dans l'piechot. Souvent, si les bêtes 'taits sus un nouvieau pid d'pathuthe, i dev'naits gonfliées, et la seul manniethe de les traiter etait de les engardichoner auve une medicine du vet, et dans des cas nou lus fououiller un patchet d'molle graisse, papi et tout avât l'gôsi.

Dans l'temps fallait marchi des milles en route ou faithe servi le ch'va et la vanne a banneaux par-ce-que ch'tait si important de faithe service d'un tel et tel boeu a cause de la race et pedigree des animaux, et souvent i 'tait nécessaithe de r'tour'né plusieurs fais devant aver succées. Aniet chés tout accomplyi a l'artificiel.

 

J'nai pas touchi sus la tchestchion des vieaux, mais j'sis seux qu'yon a d'vous tchi vos rappelles d'la patience tchi fallait quand nous offrer l'lait au nouvieau né et souvent nou perdait patience car l'anima ne voulait pas bêthe. Une manniethe etait d'y'offri l'dé, mais souvent l'boûtchet et con'tnu finissait dans l'fond d'l'aithe. Enfin, la prèchaine fais d'epreuve, auprés avait beuler une partie du jour i'n fallait pas 'tant d'encouothagement…

 

Bouone gens la vie 'tait dûthe dans l'temps passé. J'crai que j'lés pouplotaimes bein d'trop. La seule difference etait que j'lés connaisaimes toutes paR LUS NOM, ET ACHTEU COMME NOUS, I SONTS CONNUES PAR UN NUMETHEO

 

Mais une chose ne change pas. Que-je fusse i'a quarante ans ou l'jour d'aniet chés acquo une tache de sept jours la s'm'naine. L'homme na pas acquo inventer une machinne tchi pourra freunmer la porte d'l'établye du Vendredi au sé jusqu'au Lundi matin.

 

Mercie a tous gardeurs de bêtes tchi produithes un produit si riche et beinfaisant comme le lait de la vaque Jerriaise.

 

Mercie pour vot attention a matin.

J'vos souhaite a tous une bounne journée.

 

                                                         A LA PRECHAINE.

Clifford Laisney