Lettre Jèrriaise Dinmanche le 13 d'Octobre 1996

 LETTRE JERSIAISE

  

Aniet Dinmanche le 13 d'Octobre 1996, chés Clifford Laisney tch'a l'pliaisi d'presenter la Lettre Jersiaise.

 

Vivant dans une belle ile trantchil'té, et d'surabondance a tare larigot comme j'faisons ichin en Jerri, avous janmais réalisé comme tchi que'je sommes gatées d'choaix.

 

J'avons des boutiques remplyie de toutes sortes. Si j'en sommes pas satisfées auve certaine boutique j'pouvons choisi d'aller ailleurs. S'il fruit ou'l paisson d'une certaine halle na pas l'air frais, acquo une fais j'pouvons choisi. Même nos vêtements, j'pouvons trejous suivre la mode la pus moderne. Quand a acater un moto-car, j'avons l'choaix d'un Rolls Royce ou p'tit Citroyen, pour bein que la finance ne manque pas, malgré qu'aujourd'aniet une p'tite carte en plastic et du credit est bein utile dans ches circonstances.

 

S'il docteu n'peut pas déterminé not maladie, j'pouvons essayi d'aver meilleu resûltat auve un autre. Oui, je sommes vraiment gatées envers not choaix en toutes choses.

 

Acquo une fais dûthant chutte semaine, Mercredi le 16 d'Octobre pour etre exacte, j'avons acquo un choaix de grand importance. Avous decider ouaique qu'ou s'allez mettre vot croaix en ordre de choisi siez candidats pour l'office de Senateur pour les prechaines siez années. Le choaix est divers.. Dûthant l'coûothant des derniers trais s'm'naines les treize candidats tchi conteste l'election ont ieu l'opportunité d'exprînmer lus differnts qualités, morales et capabilités. Dans l'temps passé y'avait un parti d'electeurs a St. Ouen tchi s'appellaits l'Rosi, a St. Jean ch'tait les Blieus, et achteu j'en avons un traisieme tchi s'appelle les Verts. Y me r'semblye que j'entendons hardi d'chu mot Vert. J'avons la Region Verte (le Green Zone), les Ruettes Vertes (les Green Lanes), et achteu le Parti Vert (le Green Party). Quoique que je s'sait l'rose, blieu ou vert ou autchune autre couleu, j'crait que la majorité des candidats sont tous bouons a lus exprînmer, tous pleins d'promesses mais quand y vint l'moment d'agi, l'action n'est pas trejous la.

 

La s'm'naine passée dans l'journal du sé les treize candidats nos ont presenter lus manifesto pour le prechain terme de siez ans. Ils ont cirtchuler information d'lus doctrine pour l'avenin, et quand j'viagons la compagne et ville j'en pouvons selon vaie les photos des candidats parsemées sus les bouaixs, et carres de routes. Y faut bein espèther que l'moment qu'l'election setha passée, y sethonts aussi prompt d'enl'ver tuous chés affiches.

 

Le Candidat a fait son possiblye poir evilyi not intêthet. Acquo une fais le choaix est a nous, et j'espethe qu'ou s'allez tous en prendre avantage.

 

J v'nont d'celebrer la saison d'l'avout quand prepathathion est faite pour rentrer les recoltes tchi vont etre utilisées pour l'hiver.

 

Qouuaique les années lus ontes suives, ch'n'est pas une indication que l'avout est patheil. Si j'avons un eté sé ou mouilli, ch'est reflietchi sus la recolte. Ch't'année les fruits n'sonts pas en abondance comme dans d's'années, mais les recoltes de ledgumes et d'patates ont bein reponnu. Tchi difference quand nou viage l'etou d'la compagne. Dans l'temps passé nou viyait des clioseés d'raves et d'navaits pour les bêtes. Achteu chés des cliosées d'grain d'Espagne tchi d'vint mint en silo pour le soignage des bêtes en hiver.

 

Dans nos Chapelles et Eglyises chés dernier dinmanches, je v'nons de ermercier le Buoun Dgieu pour tuous ses beins en nos fournissons en abondance. Chaque année j'pouvons compter sus lyi de nos fourni la plyie, le solé, et la longeur du jour pour craitre toutes nos provisions.

 

Ch'est un pliaisi chaque année d'aller visiter les anciens, les malades, auve des p'tites pannelées d'provisions qu'ont 'tait apportées a l'eglyise en ermerciement. J'pouvons etre hardi erconnaisont de d'meuther dans une partie du monde ouaique que rein nos manque. Puis-que que j'pensons et que j'nos ramemouaithons des gens tchi'n save pas de ouaique que'l prechain r'pas veindra.

 

Achteu en finissant deux announces envers L'Assembliée D'Jerriais.

 

Premièthement, Vendredi de chutte semaine, a 7.30 dans la Salle Parouaissialle de St. Louaithains, y'etha une Sethée D'Accordeons presentée par le Sieur Steve Roxton. Prenez note. Vendredi le 18 Octobre a 7.30.

 

Deuxièmement, Le Dîner Annuel en d'Guernesy autha lieu le 7 de Novembre. Details suiv'ront pus tard.

 

J'vos souhaite a tous une bouonne journée. A LA PRECHAINE.

 

Clifford Laisney