Lettre Jèrriaise. Dimanche le 10 d'Fevri 1991

 Lettre Jèrriaise. Dimanche le 10 d'Fevri 1991

 

 

Bonjour Bouonne Gens. Chais Clifford Laisney d'La Forge a St. Ouen qu'a l'pliasi acquo une fais d'vos presenté la Lettre Jerriaise aniet Dimanche le 10 d'févri 1991.

 

Premierement j'voudrais coumme Trésoryi D'L'Assembliée D'Jerriais faithe rammemouaithér es membres chi n'ont pas acquo payi lus souscription pour c'h't'année qu'il est temps de faithe paiement, et que je s'sais bein heutheux d'erchever vôt louis au pus vite possiblye.

 

Chaque matin, quand j'tourne que je s'sait le radio, ou l'television chais auvec une certaine apprehension que j'écoute les nouvelles. Dans chu temps si incertain jeu’ne savons pas chi qui nos pend sus la tête. Je es'sait si pliaisons d'entendre chique nouvelles chi nos erlev'thai l'choeu au lieu d'entendre trejous des nouvelles chi nos abbates les esp'rits.

 

Une grand partie d'gens chi m'entendes a matin sonts a vivre lus deuxieme guerre, et y'ont a meme chi s'r' appelle la guerre 1914. Dites mé, ch'est que j'avons profité au resulta de toutes chaisdgerres. Des millions d'vies ont 'tait sacrifiés, des gens ont était bliéssés, et pour chi? Seulement pour la gourmandise d'l'houmme. Le pus que j'en avons, le pus que j'en voulons, et c'henna s'montre dans la vie que j'vivons chaque jour. Je souffrons tous a un certain degré d'la meme maladie. Je soummes pas satisfés, je soummes jalous de nôt vaisin.

 

La dgerre chi s'passe dans l'Gulf ont est un bouon examplye. Sans doubte si les pays concernés navais pas tant d'richesse en l'huile y'aurai pas tant d'intêthet par les autres nations. Et acquo une fais les nations lus en battes pour la richesse, mais bouonnes gens ch'nais pas les grosses têtes chi lus en battes, chais l's’armeés d'terre, d'l'air et d'mé, et y'n faut pas oublier les civiliens chi nont auchune defense. Y' a trejous yeu des dgerres, mais le pus qu'el l'temps s'passe, le pus cruel chi deveins. Quand nou pense qu'un pays peut faithe envier des bombes des chents milles pour faithe detruithe lus objet, et qu'au' jour d'aniet chais bombes peuve etre remplies de gas et toute sorte de salopthie pour tué la population civil. Nous en r'fraidgle de penser a toutes chais choses si horrib'lye.

 

Dans nou't vie moderne, un ennemi peut espionné sus l'autre parti auve l'aigde de gadgets electroniques chi recorde tout chi s'passe sus l'terrain en dessous de chi qu'il circlye, l'houmme est devenu trop savant. Y s'detruitha par sa savanté.

 

Une personne me questionni y'a chique temps pourchi que Dieu permetter de telle choses a s'passer dans l'monde. J'li réponni que Dieu avait mint l'houmne en cherge de la terre, et coumme y'avait d'bouns cultivateurs aussi bein que d'mauvais, y'avait cru des mauvaises serclyes parmi les bouonnes graines, et que chais sercl'yes 'tais a etouffé les recoltes, chais a dithe que de temps en temps la bounté’que Dieu a créerest gatée par la mauvaitchi d'l'houmme.

 

Bouonnes Gens coumme j'vos ai déja dit, chais l'houmme qua tort. Il est envieux, jalous, tétouagne, mauvais. Quand nation apprendra a vivre auvec nation en pleine sincerité auve Dieu a la barre, j'vos assuthe qu'el resultat estcha positive.

 

J'vos pris a tous chi m'écoutes a matin d'refleitchi sus l'evenements du jour. Prennez chique minutes aniet en d'mandant a Dieu notre souverain Sauveur de soulagi les souffrances des soudards, les civiliens, les siens qu'ont perdu d'lus familles en dgerre, les bliessés, et priez que les nations vendrons a realisé l'importance de s'reuni en paix. Une paix Eternel.

 

Dreinement j'avons y'eut plusieurs amins et membres de l'Assembliée qu'ont passer l'pas, et d'autres ont souffert d'la maladie, et acquo d’autres de nos amins qu'ont subit d's'operations en hopita. Dans vot tristesse a tous, j'vos offrons not sympathie, et j'prions pour l’amendement de tuous les malades, espethont d'vos r'vais bein vite a nos reunions.

 

Mercie pour m'avait ecouté a matin. J'vos souhaite a tous une bounne journée.

 

A Bêtot.

 

Clifford Laisney